О́tken aptada Qazaqstan Respýblıkasynyń Syrtqy ister mınıstrliginiń qoldaýymen Caspian Publishing House baspasy daıyndaǵan “Qazaqstan-EQYU-2010” kitaby jaryq kórdi.
Atalmysh toptama sheńberinde toǵyzynshy ret shyqqan basylym, avtorlardyń paıymdaýynsha, aǵymdaǵy jyly Qazaqstannyń qoǵamdyq ómirindegi eń mańyzdy oqıǵaǵa arnalǵan. Syrtqy saıasat taqyrybymen qatar, avtorlar oqyrmandar nazaryna elimizdiń qoǵamdyq-saıası, ekonomıkalyq jáne mádenı damýynyń jan-jaqty sıpattamasyn usynǵan.
Basylymnyń avtorlary Qazaqstan men EQYU-nyń ózara yqpaldastyǵynyń 18 jyldyq tarıhyn ońtaıly taldap, respýblıkamyzdyń 2010 jyly atalǵan Uıymǵa tóraǵalyqqa saılanýy Alash eli táýelsizdigine qol jetkizgen jyldardyń ishinde saıası, ekonomıkalyq jáne qoǵam damýynda qol jetkizgen biregeı jetistikteriniń moıyndalýy bolyp tabylatynyn aıqyn dáleldeıdi. Sonymen qatar, oqyrmandar nazaryna EQYU-daǵy qazaqstandyq tóraǵalyqtyń negizgi basymdyqtary men birinshi jartyjyldyq sheńberindegi qyzmetiniń alǵashqy qorytyndylary usynylǵan.
Kitaptyń negizgi bólimderiniń biri Qazaqstannyń Tuńǵysh Prezıdenti Nursultan Nazarbaevtyń eýrazııalyq jáne ǵalamdyq qaýipsizdikti nyǵaıtýǵa qosqan aıtarlyqtaı úlesine jáne jaqynda Vashıngtonda ótken Ǵalamdyq ıadrolyq sammıtte álemdik qaýymdastyq tarapynan tıesili moıyndaý tapqan elimizdiń ıadrolyq qarýdan bas tartýmen shektelmeı, beıbitsúıgish saıasatymyzdy odan ary jalǵastyra bilgen Elbasy sheshimderiniń tarıhı mańyzdylyǵyna arnalǵan.
Úsh tilde (qazaq, orys, aǵylshyn) jaryq kórgen bul kitap joǵary polıgrafııalyq deńgeıde jáne baı ıllıýstrasııalarmen basylyp shyǵarylyp, Qazaq eliniń saıası damýynan habardar bolǵysy keletin oqyrmandarǵa arnalǵan.
“Egemen-aqparat”.