Almatyda «Qazirgi zamanǵy qazaq romany» ádebı jobasynyń qorytyndy keshi ótti. Bul jobanyń qazaq prozasyn damytý, jańa avtorlardy qoldaý jáne qoǵamdaǵy rýhanı suranysty arttyrý baǵytyndaǵy mańyzy joǵary, dep habarlaıdy Egemen.kz.
Baıqaýǵa 3 000-nan astam ótinim túsip, olardyń ishinen úzdik dep tanylǵan segiz qalamger fınalǵa joldama aldy. Fınalısterdiń jeteýi 3 mıllıon teńge kóleminde qalamaqyǵa ıe bolyp, olardyń shyǵarmalary 1 000 danamen jaryq kórdi. Kesh barysynda atalǵan romandardyń tusaýkeseri ótip, oqyrmanǵa usynyldy. Ár kitaptyń 750 danasy Ulttyq kitaphanaǵa tabystalyp, elimizdiń ár óńirine taratylady.
Fınalıster qatarynda Dýman Ramazan («Synaq»), Qýanysh Jıenbaı («Aralqumdaǵy aqyrǵy aıaldama»), Nurjan Qýantaıuly («Opasyz oıyn»), Asqar Altaı («Kaskad»), Murat Almasbek («Eki jaǵalaý»), Qýat Borash («Táýbe»), Aıym Aqyltaı («Qaryz») sııaqty tájirıbeli jáne jas qalamgerler bar. Al bas júlde – 15 mıllıon teńge Júsipbek Qorǵasbekke «Kelndegi kókjal» romany úshin berildi. Sonymen qatar bul týyndy negizinde kórkem fılm túsirý josparlanyp otyr.
Ádebıet oqyrmansyz ómir súre ala ma?
Joba ERG dırektorlar keńesiniń tóraǵasy Shýhrat Ibragımovtyń qoldaýymen júzege asty. Ol óz quttyqtaýynda ulttyq qundylyqtardyń mańyzyn atap ótip, qazirgi ádebıettiń jańa býynǵa baǵyt-baǵdar beretin kúsh ekenin aıtty. Onyń pikirinshe, búgingi ádebıet jańa zaman keıipkerlerin qalyptastyrýǵa tıis.
Saltanatty keshte Mádenıet jáne aqparat mınıstri Aıda Balaevanyń quttyqtaý haty oqyldy. Sondaı-aq is-sharaǵa Mereke Qulkenov, Qanat Samatuly, Beksultan Nurjekeuly, Baýyrjan Jaqyp, Ǵazıza Qudaıbergenova, Temirǵalı Kópbaı, Qaınar Oljaı, Qanat Áýesbaı sekildi zııaly qaýym ókilderi qatysty.
Ádebıettiń aıbozdary anyqtaldy
Jalpy, «Qazirgi zamanǵy qazaq romany» jobasy jeńimpazdardy anyqtaýmen shektelmeı, qazaq ádebıetiniń jańa kezeńge qadam basqanyn kórsetti. Bul bastama ulttyq prozany jańǵyrtyp, jańa esimderdiń qalyptasýyna jol ashatyn mańyzdy mádenı alańǵa aınaldy.