Egde volonterdiń eleýli isi

Batys ǵalymdary volonterlikpen shuǵyl­danatyn qarttardyń erikti bolýǵa yqylasy joq qatarlastaryna qaraǵanda oıy sergek, kóńili shat, izgilikke  qulshynysy joǵary bolatynyn aıtady. Taǵy bir dáıek, egde jasta erikti atanyp, qoǵamdyq jumysta belsendilik tanytqan jandardyń ımmýndyq júıesi berik bola túsedi.

Memleket basshysy Qasym-Jomart Toqaev bıylǵy qańtarda ótken volonterler forýmynda sóılegen sózinde eriktilerdiń qoǵamdy izgilendirý jolynda ıgi is arqalap júrgen naǵyz otanshyl azamattar ekenin, erikti bolý – ıgi ister jasaý, jaqsylyq istep, basqaǵa úlgi kórsetý ekenin, Otanyńa adal qyzmet etý, týǵan jerińe janashyr bolý ekenin atap aıtty. 

«Nıeti túzý, jany taza adamdar osy joldy tańdaıdy, eriktiler qataryna qosylyp, qajyrly eńbek etedi. Eriktilerdi ozyq oıly qoǵamnyń aınasy dep aıtsaq, artyq bolmaıdy. Naǵyz volonter tutas qoǵamnyń ıgiligin oılaıtyn, elimizdiń murat-múddesin bıikke qoıatyn sanaly azamat ekeni sózsiz. Qınalǵan adamǵa qolushyn berý – ultymyzdyń bo­ıynda bar asyl qasıet. Babalarymyz jaqy­nyńa janashyr bolýdy, tabıǵatty aıalaýdy adamgershiliktiń belgisi sanaǵan. Árdaıym yntymaq pen birlikti saqtap, tatý-tátti ómir súrýdi urpaǵyna ósıet etken. Uly Abaı «tolyq adam» bolýdyń bir sharty – jurtqa jaqsylyq jasaý, shapaǵatyńdy tıgizý degen. Sizder osy ósıetke saı eńbek etip, «Adal azamat» degen atqa laıyqty isterdi atqaryp júrsizder. Ási­rese syn saǵattarda volonterlerimiz kez kel­gen sharýaǵa zor jaýapkershilikpen qarap, bel­sendi jumys isteýde», degen Prezıdent syn sá­tinde eńbektiń alǵy shebinen tabylatyn erik­tilerdiń eńbegi eren ekenine erekshe toqtaldy.

Elimizde volonterlerdiń bir ulttyq, 20 aımaqtyq front-ofısi jumys isteıdi. Jyldan-jylǵa eriktiler qatary qalyńdap keledi. Osydan alty jyl buryn olardyń sany 50 myńnyń aınalasynda edi, búginde 300 myńnan asady. Astana qalasyndaǵy «Belsendi uzaq ómir súrý ortalyǵy» «Kúmis volonterler» klýbynyń úılestirýshisi Lázzat О́teǵulova zeınet jasyndaǵy eriktilerdiń qatary da jyl sanap artyp kele jatqanyn aıtady. 

– «2021 jyly Astana qalasy «Belsendi uzaq ómir súrý» ortalyǵyna erikti bolyp tirkelgen edim. Alǵashynda «Aıkýne» halyqtyq gımnastıkasynan aptasyna eki ret jattyǵý ótkizdim. Keıin ortalyq basshysy uıymdastyrýshy qyzmetine shaqyrdy. Sol kezde negizgi jumysymmen qatar «Kúmis eriktiler» klýbyn júrgizýge de ruqsat suradym. Buǵan deıin de Almaty qalasyndaǵy dál osyndaı ortalyqta 2019–2020 jyldar aralyǵynda «Kúmis volonter» klýbynyń belsendi múshesi bolyp, birshama ıgi is atqardyq. Qoǵamǵa paıdaly túrli aksııaǵa qatysyp, «Qaıyrymdylyq kerýeni» respýblıkalyq baıqaýynyń «Meıirim jolynda» atalymymen marapattaldym.  Bizdiń mindet – osyndaı klýbtar quryp, búgingi býynǵa kóne salt-dástúrimizdi, ádet-ǵurpymyzdy dáripteý. Búginde «Kúmis volonterler» klýby tórt baǵytta  jumys atqarady. Jastarǵa patrıottyq tárbıe berýde olardyń boıyna  tarıhymyz ben ulttyq qundylyǵymyzdy sińire otyryp, kitap oqýǵa degen súıispenshiligin arttyrý, otansúıgishtikke baýlýdy kózdeımiz. Tól murany dáripteý jolynda qolóner men ulttyq taǵamdardyń jasalý joldaryn úıretý arqyly sheberlik sabaqtaryn ótkizýdi qolǵa aldyq. Inklıýzıvti volonterlik baǵytynda klýb músheleri zeınetkerler men múmkindigi shekteýli jandarǵa ulttyq oıyndardy úıretip, ertegiler oqyp berý, qoıylymdarǵa qatystyrýǵa kúsh salady. Qorshaǵan ortany qorǵaý baǵytynda jastar, kolledj, joǵary oqý oryndarynyń stýdentterimen birge senbilik uıymdastyryp, qoǵamǵa úlgi bolyp keledi», deıdi L.О́teǵulova.

Lázzat apaı zeınet jasyndaǵy volonter­lerdiń «Ulaǵat» klýby ádebı-tanymdyq baǵytta da ıgi sharalardy iske asyryp jatqa­nyn maqtanyshpen atap ótti. Klýb músheliginde ǵylym kandıdattary, tájirıbeli ustazdar, «Y.Altynsarın» tósbelgisin alǵan bilikti pedagogter de bar. Sonymen qatar «Ájeden qalǵan  asyl mura», «Ulttyq taǵamdar qupııasy» klýbtary umyt bolǵan qazaq ashanasy men qolónerimizdi qaıta jańǵyrtý maqsatynda jas urpaqqa ónege kórsetip keledi.

2024 jyly Atyraý qalasynda ótken Ulttyq quryltaıda Prezıdent Q.Toqaev kitap oqıtyn ultqa aınalyp, tanym kókjıegin keńeıtý mádenıetin qalyptastyrý mańyzdy ekenine toqtaldy. «Kúmis volonterler» klýbynyń músheleri de «Belsendi uzaq ómir súrý» ortalyqtarynda balanyń kitapqa degen mahabbatyn ashý maqsatynda «Ájemniń ertegisi» aıdaryn júrgizedi. Mektepterge de jıi kezdesýge baryp, oqýshylardyń kitap oqýǵa degen qulshynysyn arttyrady. О́ner mektebimen baılanys ornatyp, jas býynnyń uǵym-túısiginen kómeski tarta bastaǵan  kıiz basý, alasha toqý, quraq quraý, keste tigý, qamshy órý syndy ulttyq qolóner týyndylaryn da dáriptep júr.

«Kúmis volonterler» 2024 jylǵy qyr­kúıekte Astana qalasynda ótken Dúnıe­júzilik kóshpeliler oıyndarynda eriktilerdiń qataryn tolyqtyryp, eren eńbek sińirdi. Ásirese shet tilin jetik biletin ájeler syrttan kelgen týrısterge ulttyq qundylyqtarymyz ben salt-dástúrimizdi dáriptep, eldigimizdi tanytty.

Elordadaǵy «Belsendi uzaq ómir súrý orta­lyǵyna» qarasty «Kúmis eriktiler» klýbynda 100-den asa zeınetker bar, olar 61-75 jas aralyǵyndaǵy qart kisiler. Erikti ata-ájeler Astana qalasynda ótetin qaıyrymdylyq aksııalary men ekologııalyq senbilikterge belsene qatysady, sheberlik sabaqtaryn ótki­zip, urpaqtar sabaqtastyǵy aıasynda qala mektepteriniń oqýshylarymen, stýdent jastarmen birlese túrli sharalardy júzege asyrady.  Sonymen qatar «Ulttyq volonterlik  jeli» zańdy tulǵalar birlestigi, «Astana jastary» resýrstyq ortalyǵymen memorandým jasasyp, birqatar ıgi isti júzege asyryp jatyr. Zeınet jasyndaǵy eriktiler qaıyrymdylyq is-sharalardyń da basy-qasynan jıi tabylady. Máselen, Nura aýdanynyń «Kúmis eriktiler» klýbynyń músheleri «Sharapat» qarttar úıinde konsertter, «Jansaıa», «Nurly júrek» áleý­mettik qyzmet kórsetý ortalyqtarynda qaıyrymdylyq aksııalaryn ótkizdi. Bos ýaqyttarynda klýb áje­leri múmkindikteri shekteýli balalarǵa arnap kıim-kıshekter toqyp, túrli kádesyılar tartý etedi. 

«Jyl boıy kúmis eriktilerdiń bastamasymen birqatar qaıyrymdylyq ári áleýmettik aksııalar ótkizildi. «Júrekten jú­rekke» aksııasy aıasynda kommýnaldyq qyzmetkerlerge ystyq shaı men baýyrsaq taratyldy. «Taza Qazaqstan» ekologııalyq aksııasy aıasynda senbilikter uıymdastyrylyp, aǵash otyrǵyzý, jasyl aımaqtardy kútip-baptaý jumystary júrgizildi. Balalardy qorǵaý kúni qarsańynda ortalyq ardagerleri medısınalyq mekemelerdegi shala týǵan nárestelerge arnalǵan qolmen toqylǵan bas kıim men shulyqtar daıyndap, qaıy­rymdylyq aksııasyn ótkizdi. Sondaı-aq erekshe qajettiligi bar balalarǵa arnalǵan áleýmettik ortalyqtarda konsertter, sheberlik sabaqtary men sporttyq týrnırler uıymdastyryldy. Kúmis eriktilerdiń belsendi eńbegi qoǵamda úlken qurmetke ıe. Olar ózderiniń ómirlik tájirıbesimen bólisip, jastar men qoǵam arasyndaǵy baılanysty nyǵaıtýǵa, áleýmettik qoldaý men qaıyrymdylyq mádenıetin damytýǵa mańyzdy úles qosyp keledi», deıdi  Perspek­tıvti damý jáne áleýmettik jobalar bóliminiń mamany Raıhan Ýdergenova.

Byltyr Dúnıejúzilik eriktiler kúnine oraı «Astana jastary» men Ulttyq volon­terlik ujymdarymen birlesip ótkizgen is-sharalar qorytyndysynda ortalyqtyń bir­neshe kúmis volonteri, naqty aıtqanda, 26 kúmis erikti zeınetker «Urpaq sabaqtastyǵy», «Mádenı-rýhanı jáne sporttyq baǵyt», «Saýyqtyrý baǵyty», «Qaıyrymdylyq baǵyty», «Ekologııalyq baǵyt» syndy ata­lym­darda alǵyshat alyp, qurmetke bólendi. Qaıyrymdylyq qashanda izgiliktiń jarshysy ekenin isimen áıgileıtin zeınetker «kúmis eriktiler» jas býynǵa árdaıym úlgi.