nemese aqyly joldarda jeńil kólikter tegin júrýi ábden múmkin
Astanada «Nurly Jol» baǵdarlamasyn iske asyrý maqsatynda qaralǵan bıýdjet qarajatyn tıimdi jumsaý jáne oǵan baqylaý ornatý boıynsha Májilistegi «Nur Otan» partııasy fraksııasy janyndaǵy komıssııanyń otyrysy ótti. Jıynǵa Májilis depýtattary, birqatar mınıstrlikterdiń, ulttyq kompanııalardyń laýazymdy tulǵalary jáne «Samuryq-Qazyna» ál-aýqat qory men «Báıterek» holdınginiń ókilderi qatysty.
Jıyndy ashqan Májilis depýtaty, «Nur Otan» partııasy fraksııasy jetekshisiniń orynbasary Nurtaı Sabılıanov «Indýstrııalyq, energetıkalyq ınfraqurylymdardyń damýy, shaǵyn jáne orta bıznesti qoldaý», sondaı-aq, «Kólik-logıstıkalyq ınfraqurylym» taqyryptary boıynsha keńinen áńgime órbite kelip, osy baǵyttarda elimiz boıynsha júzege asyrylyp jatqan iri jobalarǵa toqtaldy.
Sondaı-aq, ol bıýdjet qarjysyn tıimdi jumsaý jáne ony baqylaý jónindegi «Nur Otan» partııasy fraksııasy janyndaǵy komıssııanyń kásipkerlik sýbektilerimen óńirlerde júrgizgen jumysynyń nátıjesinde anyqtalǵan keıbir túıtkilderge toqtaldy.
Onyń aıtýynsha, nesıe somasynyń málimdelgen kólemi 50 paıyzǵa qysqarýy, múliktik kepildiktiń tómen baǵalanýy, bankterdiń kásipkerler ótinishterin qaraý merziminiń uzaqtyǵy ózekti másele bolyp tur. Sondaı-aq, bankter talap etetin qujat paketteriniń kóptigi de kásipkerlerdiń qolyn baılaýda.
Buǵan qosa, Nurtaı Sabılıanov Memleket basshysy Nursultan Nazarbaevtyń tapsyrmasymen bankterdiń problemalyq nesıeler qorynyń jarǵylyq kapıtalyn ulǵaıtýǵa qarastyrylǵan 250 mlrd. teńge Úkimettiń rezervin kóbeıtýge bólingenin jetkize kelip, «Komıssııa Ulttyq bankten problemalyq nesıeler jóninde aqparat suraǵanynda, olar bul aqparattar bank qupııasy qataryna jatatyndyǵyn aıtady. Osyǵan baılanysty ekinshi deńgeıli bankter týraly zańǵa ózgerister engizýdi josparlaýdamyz. Biz muny bastama etip kóteremiz», – dedi.
Elbasy bastamasymen elimizde júzege asyrylyp jatqan jobalardyń jumysy men olardy qarjylandyrýdyń tetikteri jáne bıýdjetten bólingen qarajattardyń jaratylý barysy jan-jaqty baıandalǵan bul otyrys barysynda Májilis depýtaty Muhtar Tinikeev, Investısııalar jáne damý mınıstriniń birinshi orynbasary Jeńis Qasymbek jáne taǵy basqalar sóz sóıledi.
Jıynda belgili bolǵandaı, Investısııalar jáne damý mınıstrligi aqyly joldarda jeńil kólikterdi tegin júrgizý isin qolǵa alýda. Bul jóninde vıse-mınıstr Jeńis Qasymbek:
– Aqyly joldar boıynsha búgin másele kótermedik, degenmen, men úlken habar aıtqym kelip otyr. «Astana – Býrabaı» tájirıbesinen kórip otyrmyz, 80-85 paıyz paıdany júk kólikteri men avtobýstar túsiredi. Biz bolashaqta aqyly joldarmen jeńil kólikterdi tegin júrgizýimiz múmkin. Tek júk kólikterinen aqy alatyn bolamyz. Menińshe, bul qısyndy bolar edi. Eger depýtattar kelesi sessııada qoldasa, zańnamaǵa tıisti ózgerister engizýge daıynbyz, – dedi.
Basqosý sońynda «Indýstrııalyq, energetıkalyq ınfraqurylymdardyń damýy, shaǵyn jáne orta bıznesti qoldaý» jáne «Kólik-logıstıkalyq ınfraqurylym» baǵyttary boıynsha bıýdjettik qarjylardyń jumsalýyna qatysty aralyq qorytyndy shyǵaryldy.
Joldybaı BAZAR,
«Egemen Qazaqstan».