Ishki ister mınıstriniń orynbasary Sanjar Ádilov elimizdiń birneshe óńirinde polısııa qyzmetkerlerine jasalǵan shabýyldarǵa qatysty pikir bildirdi, dep habarlaıdy Egemen.kz.
Onyń aıtýynsha, Qylmystyq kodekste polısııa qyzmetkerlerine qarsy jasalǵan áreketter úshin jaýapkershilik qarastyrylǵan. Atap aıtqanda, 380-bap «Bılik ókiline qatysty qorqytý nemese kúsh qoldaný áreketteri».
«Qostanaıda 380-baptyń 6-bóligi boıynsha úsh kúdikti qamaýǵa alyndy. Sondaı-aq Atyraý men О́skemen qalalarynda da kúdiktiler ustaldy. Qostanaıdaǵy jaǵdaıǵa kelsek, qyzmetten tys júrgen polısııa qyzmetkeri eskertý jasaǵan kezde oǵan shabýyl jasalǵan. Qylmysker ustalyp, qazirgi ýaqytta tergeý júrgizilýde», dedi Sanjar Ádilov.
Onyń aıtýynsha, sot sanksııasymen polısııa qyzmetkerlerine kúsh qoldanǵan barlyq tulǵalar qylmystyq jaýapkershilikke tartylyp, qamaýǵa alynǵan.
Semeıde er adam polısııanyń qyzmettik kólikterin órtep jiberdi
Sondaı-aq ol quqyq qorǵaý organdaryna qarsy agressııanyń sebepteri týraly suraqqa jaýap berdi.
«Qoǵam polısııa jumysyna oń kózqaras tanytyp otyr, «Zań jáne tártip» qaǵıdaty tolyq qoldaý tapty. Bul baǵytta quqyqbuzýshylyqtardyń aldyn alý jáne olardy ashý jumystary júrgizilip jatyr. Jalpy, elimizde quqyqtyq mádenıet joǵary deńgeıde. Alaıda jekelegen kúsh qoldaný jaǵdaılary oryn aldy. Barlyq kúdiktiler jaýapkershilikke tartylyp, túpkilikti sheshimdi sot qabyldaıdy», dedi ol.
Eske sala keteıik, 3 sáýirde Atyraý oblysynda qyzmettik mindetin atqaryp júrgen polısııa qyzmetkerlerine shabýyl jasalyp, saldarynan eki quqyq qorǵaýshy zardap shekti.
Buǵan deıin Qostanaıda qoǵamdyq tártipti buzǵany úshin eskertý jasaǵan polısııa qyzmetkerine mas kúıdegi birneshe turǵyn shabýyl jasaǵany habarlanǵan bolatyn.
Sondaı-aq О́skemende polısııa qyzmetkeri ózine tıesili qarýdan jaraqat aldy. Polısııa derekterine sáıkes, mas kúıdegi eki er adam quqyq qorǵaý qyzmetkerine qarsylyq kórsetken.