Qazirgi tańda bizdiń elimizde bilim men ǵylymnyń damýyna erekshe mán berilip otyr. Ǵylymnyń strategııalyq mańyzǵa ıe ekendigi, onyń strategııalyq basymdyq ekendigi jańa Konstıtýsııada aıqyndaldy. Sol sebepti ǵylymǵa, bilimge nazar aýdarylyp jatyr. Bul ǵylymdy qarjylandyrý kóleminiń artýynan, ǵylymnyń materıaldyq-tehnıkalyq bazasyn jaqsartýdan, jas ǵalymdardyń áleýmettik jaǵdaıyn kúsheıtýden anyq kórinip keledi.
Kez kelgen órkenıetke umtylǵan, damýdy kózdeıtin memlekette, árıne, birinshi kezekte adam kapıtalynyń damýyna, onyń ishinde ǵylymnyń óristeýine erekshe mán beriledi. Ǵylymy damyǵan el, ásirese qoldanbaly ǵylymy damyǵan el, damýdyń aldyńǵy qataryna shyǵyp, básekege qabilettiliktiń de joǵary deńgeıine kóteriledi. Sondyqtan da ǵylymnyń strategııalyq mańyzǵa ıe ekendigi osy jerden kórinedi.
Ǵylym kúni qarsańynda Prezıdentimizdiń ózi qatysqan saltanatty jıyn ótti. Memleket basshysy birqatar azamattarǵa memlekettik nagradalar tapsyrdy, birneshe jas ǵalymǵa páter kiltin tabys etti. Sol mamandardyń qatarynda men de «Eren eńbegi úshin» medaline ıe boldym.
Qazirgi ýaqytta Memlekettik basqarý akademııasynda «О́ńirlik ekonomıka» bilim berý baǵdarlamasy boıynsha dáris oqımyn. О́ńirlik damý magıstrleriniń birneshe býynyn daıarlap shyǵardyq.
Bul akademııanyń bilim berý traektorııasynyń ereksheligi – professor-oqytýshylar quramynyń jetpis paıyzǵa jýyǵy tájirıbeden kelgen, is basynda júrgen, memlekettik saıasatty júzege asyryp júrgen azamattar. Sondyqtan da bul eń aldymen, jastarǵa, onyń ishinde Prezıdenttik jastar kadrlyq rezerviniń músheleri sanalatyn jas ǵalymdarǵa, sondaı-aq men sııaqty praktık zertteýshilerge berilgen joǵary baǵa, úlken senim ári zor jaýapkershilik dep esepteımin.
Aıbol ARYNǴAZINOV,
Prezıdent janyndaǵy Memlekettik basqarý akademııasynyń qaýymdastyrylǵan professory