«Bul men úshin baı qýanysh»

– deıdi Elbasyna hat jazǵan 91 jastaǵy Baıqýanysh aqsaqal Qazaqstan halqyna Úndeýinde Prezıdent Nursultan Nazarbaev: «Ásirese, osy kúnderde maǵan júzdegen hattar kelip túsýde», dep Soltústik Qazaqstan oblysynyń jasy toqsannan asqan turǵyny Baıqýanysh Sársembın aqsaqaldyń hatynan úzindi keltirgen bolatyn. Bul, árıne, barsha soltústikqazaqstandyqtardyń mereıin asyra tústi. Elbasy aýyzǵa alǵan aqsaqalmen kózbe-kóz jolyǵysyp, suhbattasý jónindegi redaksııanyń shuǵyl tapsyrmasyn alysymen oblys ortalyǵynan shetkerileý ornalasqan Jumysshy kenti shaǵyn aýdanyna jol tarttyq. Toqsannyń tórine ozǵan aqsaqal dıvanda teledıdar kórip otyr eken. Ádemi júzine kúmisteı saqal men murt jarasyp tur. Jınaqylyǵy men nyq otyrysy ádemi qartaıa biletin jannyń keıpin elestetti. – Ata, aldymen Prezı­den­timizge hat jazýǵa ne sebep bolǵanyn aıta otyrsańyz? – Qaraǵym, ótken ǵasyrda halqymyz basynan ótkergen tarıhı oqıǵalardyń bárine kýámin. Asharshylyqty da, saıası qýǵyn-súrgindi de, alapat soǵysty da, tyń ıgerýdiń asyra silteýshiligin de, jylymyq kezeńdi de, qaıta qurýdy da kórdik. Azattyqtyń alǵashqy tańdary araılanyp atqanda jetpisti alqymdap qalǵan edim. Shekaramyz ańǵal-sańǵal, turmysymyz júdeý, tilimiz orasholaq edi. Endi, mine, shırek ǵasyrǵa jýyq ýaqyt bederinde Qazaqstandy álem tanydy. Elimiz damýdyń dańǵyl jolyna tústi. Oza damyǵan otyz memlekettiń qataryna jetýge umtylyp kelemiz. Jaratqan Iem halqymyzdyń baǵyna Nursultandaı dana kemeńgerdi, suńǵyla saıasatkerdi berip, qoı ústine boztorǵaı jumyrtqalaǵan tamasha zamanǵa jetkizdi. Mundaıda qazaq «óshkenimiz jandy, ólgenimiz tirildi» dep shattana qýanǵan. Men – asarymdy asap, jasarymdy jasaǵan qart adammyn. Jetken jetistikterimizdi oı eleginen ótkize otyryp, nege biz sııaqty ata býyn atynan Elbasyna alǵys aıtpasqa degen sheshimge keldim. Bir jaǵynan, jastarymyz Táýelsizdiktiń, atamekenniń, Otannyń qadir-qasıetin bile, tanı tússin degen tilekten týdy. Qolmen jazý qıynǵa soqqandyqtan, hatty jazýy marjandaı shóbereme jazdyrttym. Teledıdardan Elbasymyzdyń halyqqa Úndeýin tyńdap otyryp, atym atalǵanda selk ete qaldym. Ras pa, ótirik pe degendeı ań-tańmyn. Úıdegiler de «ata, ata» dep shýlasyp jatty. Biz sııaqty qarttardy elep-eskergenine rızamyn.  – Báıbisheńiz janyńyzda. Názıma apaımen bir shańyraq astynda 60 jyl tútin tútetip kele jatyr ekensiz. – Aldymen Allanyń, sosyn osyndaı jaıly qarttyqqa jetkizgen Elbasymyzdyń túzý saıasatynyń arqasy. 5 ul-qyzdan nemere, shóbere súıip otyrǵan jaıymyz bar. Balalarym da, nemerelerim de joǵary bilimdi, ár salada qyzmet etedi. Kempirime qaraǵanda men tyńmyn. Onyń qulaǵy aýyr estıdi. Alda-jalda telefon soǵyla qalsa, sóılesetin de, mal-jan amandyǵyn aıtatyn da, jańalyqqa qanyqtyratyn da – ózim (kúledi). Kóp jylǵy eńbegimdi baǵalady, 80 myń teńgege jýyq zeınetaqy alamyn. Aýyq-aýyq ústemelep otyrady, rahmet. Ardager qarııa retinde qamqorlyqqa kenelip otyrmyn. – Sizdiń ómirden túıgenińiz, toqy­ǵanyńyz kóp. Keıingi urpaqqa ne tilek aıtar edińiz. – Jambyl jákemniń izin qýyp kele jatsam da, zerdem áli myqty, kókiregim ashyq. «Temir jáshiktiń» jańalyqtaryn qalt jibermeımin. Qazir jurt saılaý týraly kóp áńgime aıtyp jatyr. Qalyń kópshiliktiń tilegin Prezıdent qabyl aldy. Saıasattan alystaý bolsam da, bir shyndyqty aıtaıyn. Neshe saılaý ótse de halqymyz úshin Elbasy bireý, ol – Nazarbaev! Qazaqstan men Nazarbaev egiz uǵym dep aıtyp júrgen dýaly aýyzdardyń pikirin tolyq qostaımyn, aınalaıyn! Elbasyna hatta jazǵanymdaı, dál qazirgideı Altyn ǵasyr halqymyzdyń basynda eshqashan bolǵan emes. Odan ári «Nurly Jolmen» jetelep, «Máńgilik Elge» jetkizýine shyn júrekten tilektespin. Elbasymyz elimizdi bıikterge bastaı bersin degen aǵalyq tilegimdi arnaımyn. Al Prezıdenttiń atymdy atap, hatymnan úzindi keltirgeni – men úshin baı qýanysh. Ata-anam atymdy azan shaqyryp qoıǵanda osyndaı baqytty kúnge jetsin, qýanyshqa baı adam bolsyn dep yrymdaǵan shyǵar. Shúkir, jettim sol kúnge! Áńgimelesken О́mir ESQALI, «Egemen Qazaqstan». Soltústik Qazaqstan oblysy. Sýrette: qyzy Aıgúl, neme­resi Tóle­gen, Baıqýanysh aqsa­qal, nemeresi Marat, kelini Dá­metken.  Sýretti túsirgen Amangeldi BEKMURATOV.