Áleýmettik jelide bloger Ádilethan Moldahannyń ustalǵany jáne onyń qylmystyq quqyqbuzýshylyqqa qatysy bolýy múmkin ekeni týraly aqparat taralyp jatyr. Osyǵan baılanysty Almaty prokýratýrasy buǵan deıin qaralǵan istiń mán-jaıyn túsindirip berdi, dep jazady Egemen.kz.
Almaty qalasy Túrksib aýdany prokýratýrasy bóliminiń bastyǵy Dıdar Qabaevtyń aıtýynsha, áńgime 2021 jyly jasalǵan qylmys týraly bolyp otyr.
«Sol kezde men Almaty qalasy Naýryzbaı aýdany prokýratýrasynda memlekettik aıyptaýdy qoldaý bóliminiń bastyǵy qyzmetin atqardym. Atalǵan is boıynsha memlekettik aıyptaýshy bolǵan joqpyn. Alaıda qylmystyq istiń materıaldary men sot úkimin zerdeledim. Istiń qysqasha sıpattamasy mynadaı: jábirlenýshi Almaty qalasynan baspana satyp almaq bolyp, 1,5 mln teńge kóleminde aldyn ala tólem jasaý úshin Taraz qalasynan kelgen. Bul týraly onyń tanysy bilip, Ádilethan Moldahanmen birge qylmystyq jospar qurǵan. Olar jábirlenýshini jolda kútip alyp, jol-kólik apatyn uıymdastyrǵan. Sodan keıin ashyq túrde 1,5 mln teńgeni tartyp alǵan. Keıin kúdiktiler ustaldy. Olarǵa qatysty qamaýǵa alý sharasy qoldanyldy», dedi Dıdar Qabaev.
Kúdiktiler der kezinde ustalyp, qamaýǵa alynǵan. Dıdar Qabaevtyń aıtýynsha, is qaralyp jatqan kezde aıyptalýshylar kinásin tolyq moıyndap, keltirilgen shyǵyndy ótegen.
«Tergeý barysynda olar kinálaryn tolyq moıyndap, keltirilgen zalaldy ótedi. Qylmystyq is Qylmystyq-prosestik kodekstiń 382-babyna sáıkes, qysqartylǵan tártippen qaraldy. Qysqartylǵan tártip kináni tolyq moıyndaýdy jáne talap-aryzdardy daýlamaýdy kózdeıdi. Mundaı jaǵdaıda istiń barlyq materıaly jan-jaqty zerttelmeıdi, tek sottalýshylar men jábirlenýshiler ǵana jaýap beredi. Osydan keıin jaryssóz bastalyp, sot úkim shyǵarý úshin keńesý bólmesine ketedi. Nátıjesinde sot árqaısysyna úsh jyl merzimge bas bostandyǵyn shekteý jazasyn taǵaıyndady. Úkimge shaǵym túspedi jáne ol zańdy kúshine endi», dedi Dıdar Qabaev.
Osylaısha, Ádilethan Moldahan tonaý qylmysyn jasaǵany úshin kináli dep tanyldy. Sot qylmystyń aldyn ala oılastyrylǵan jospar boıynsha, jol-kólik oqıǵasyn qoldan uıymdastyrý arqyly jasalǵanyn anyqtady. Aıyptalýshylar kinásin moıyndap, keltirilgen shyǵyndy ótegen, nátıjesinde olarǵa úsh jyl merzimge bas bostandyǵyn shekteý jazasy taǵaıyndaldy.
Buǵan deıin zańger ári bloger Ádilethan Moldahan qamaýǵa alynyp, quqyq qorǵaý organdary zańgerge qatysty jalǵan aqparat taratý faktisi boıynsha sotqa deıingi tergeý júrgizip jatqanyn habarlaǵanbyz.