Sońǵy jyldary Qazaqstanda vaksınadan bas tartý jaǵdaılary artyp keledi. Bul týraly Syrtqy kommýnıkasııalar qyzmetiniń brıfınginde Ulttyq qoǵamdyq densaýlyq saqtaý ortalyǵynyń Immýnoprofılaktıka ortalyǵynyń jetekshisi Nurshaı Azımbaeva málimdedi, dep habarlaıdy Egemen.kz.
Onyń aıtýynsha, elimizde juqpaly aýrýlarǵa qarsy kúreste aıtarlyqtaı jetistikterge qol jetkizilgen. Máselen, sońǵy 50 jylda ımmýndaý náreste ólimin shamamen 40 paıyzǵa azaıtqan. Al parotıtpen syrqattaný deńgeıi 12 194 jaǵdaıdan 1 jaǵdaıǵa deıin tómendegen. Gepatıt A aýrýy 80 eseden astam, gepatıt V 94 eseden kóp, al qyzamyq 180 eseden artyq azaıǵan. Sonymen qatar polıomıelıt 1996 jyldan beri, al dıfterııa 2009 jyldan beri tirkelmegen.
Qazirgi tańda ımmýndaý baǵdarlamasy 21 juqpaly aýrýǵa qarsy vaksınany qamtıdy. Balalarǵa arnalǵan vaksınalardyń sapasy Dúnıejúzilik densaýlyq saqtaý uıymynyń sertıfıkatymen rastalǵan.
Balalaryna vaksına salǵyzýdan bas tartatyndar kóbeıdi: Sebebi nede?
Soǵan qaramastan, mamandar halyq arasynda juqpaly aýrýlardyń qanshalyqty aýyr ótetinin umytý úrdisi baıqalyp otyrǵanyn aıtady. Sonyń saldarynan vaksınadan bas tartý kóbeıgen. 2025 jyly elimizde 25 myńnan astam ekpeden bas tartý faktisi tirkelgen, bul 2021 jylmen salystyrǵanda shamamen 3,5 ese kóp.
Sońǵy úsh jylda qyzylsha men kókjótel aýrýlarynyń órshýi baıqalady. Mamandardyń dereginshe, qyzylshamen aýyrǵandardyń 75 paıyzdan astamy, al kókjótelmen aýyrǵandardyń 89 paıyzǵa jýyǵy ekpe almaǵan balalar.
Densaýlyq saqtaý salasynyń ókilderi mundaı úrdis ujymdyq ımmýnıtettiń álsireýine ákelýi múmkin ekenin eskertip, ekpeniń mańyzyn atap ótti.
Endi qyzylshaǵa qarsy vaksına mindetti: Astana aýrýhanalaryna bala qabyldaý erejesi ózgerdi
Sondaı-aq ekpe týraly resmı ári naqty aqparatty egu.kz saıtynan jáne 7701 jedel jelisi arqyly alýǵa bolatyny habarlandy.