Aksııa barysynda Prezıdent Qasym-Jomart Toqaev sóz sóılep, eki jyl buryn taǵylymy mol, mán-mazmuny aıryqsha «Taza Qazaqstan» jalpyulttyq aksııasy bastalǵanyn aıtty, dep habarlaıdy Egemen.kz.
«Halqymyz ejelden «tazalyq» uǵymyna erekshe mán bergen. Jurtymyz «taza» sózin keń maǵynada qoldanady. Mysaly, arly, nıeti túzý, adal adam týraly aıtqan kezde «ary taza, oıy taza, júregi taza» adam dep sıpattaǵan. Babalarymyz árdaıym tabıǵatpen etene baılanysta ómir súrgen, qorshaǵan ortany qorǵaý qasterli mindet dep sanaǵan. «Obal bolady» dep, jas urpaqty tabıǵatqa eshqandaı zııan keltirmeýge úıretken. «Bulaq kórseń, kózin ash» dep, Jer-Anaǵa janashyr júrekpen qaraýǵa tárbıelegen. Mine, búgin de tazalyq uǵymy ultymyzdyń bolmys-bitimine tán asyl qasıetke, qoǵamdyq máni zor qundylyqqa aınalyp jatyr. «Taza Qazaqstan» tujyrymdamasy – sonyń aıqyn kórinisi. Tazalyq – órkenıetti qoǵamnyń aınasy, damýǵa umtylǵan kez kelgen eldiń myzǵymas ustanymy. Aq peıilmen, túzý nıetpen qolǵa alǵan árbir is berekeli bolady. «Taza Qazaqstan» – dál osyndaı biregeı bastama. Bul joba mıllıondaǵan otanshyl azamatymyzdyń adal eńbeginiń arqasynda jalpyhalyqtyq qozǵalysqa aınaldy», dedi Qasym-Jomart Toqaev.
Memleket basshysy aksııaǵa atsalysqan otandastarymyzǵa, ásirese, jastarǵa rızashylyǵyn bildirdi.
«Taza Qazaqstannyń» negizgi qozǵaýshy kúshi jáne arqaýy jastar desek, artyq bolmaıdy. Ul-qyzdarymyz ortaq iske belsene atsalysyp, jaýapkershiliktiń tamasha úlgisin kórsetip júr. Búgingi mańyzdy is-sharaǵa jasampaz ári jańashyl jastar qatysyp otyr. Elimizdiń jarqyn bolashaǵy – sizder sııaqty rýhy myqty, otanshyl, erik-jigeri kúshti azamattardyń qolynda. Túptep kelgende, bizdiń Qazaqstannan basqa Otanymyz joq. Barymyz da, basty baılyǵymyz da – qasterli Otanymyz Qazaqstan. Sondyqtan qasıetti jerimizdiń, kıeli elimizdiń Ozyq, Qaýipsiz, Kúshti ári Taza bolǵany tek bizge ǵana kerek. Osyny durys túsingen abzal. Bul jobanyń túpki máni – tabıǵatty aıalaý, tazalyq pen tártipti dáripteý, sanaly urpaq tárbıelep, sapaly ult qalyptastyrý», dedi Prezıdent.
Eske sala keteıik, búgin Memleket basshysy «Taza Qazaqstan» respýblıkalyq ekologııalyq aksııasyna qatysty.
Qazaqstanda 46 jańa ekoaýmaq paıda bolady