Almatydaǵy Ulttyq ortalyq mýzeıde «Bir aspan astynda» atty halyqaralyq zamanaýı óner kórmesi óz jumysyn bastady. Aýqymdy mádenı joba álemniń túkpir-túkpirinen kelgen sýretshilerdiń basyn qosyp, ónerdiń shekarasyz keńistigin taǵy bir márte dáleldedi, dep habarlaıdy Egemen.kz.
Kórmege Eýropa, Azııa, arab álemi, AQSh, Reseı, Moldova, Armenııa jáne О́zbekstan elderinen 70-ten astam sýretshi qatysyp otyr. Olar beıneleý óneri, sándik-qoldanbaly óner, fotografııa, sán dızaıny, vıdeoart jáne materıaldyq tájirıbeler baǵytyndaǵy týyndylaryn Qazaqstanda alǵash ret kópshilik nazaryna usyndy.
Joba ınklıýzıvti halyqaralyq platforma retinde uıymdastyrylǵan. Onyń basty maqsaty – ártúrli mádenıetter men kórkemdik kózqarastardy bir keńistikte toǵystyryp, shyǵarmashylyq arqyly ózara túsinistik pen úılesimdilikti nasıhattaý. Kórme adamzattyń ortaq qundylyqtaryn alǵa shyǵaryp, aıyrmashylyqtardy emes, birlikti dáripteıtin ıdeıaǵa negizdelgen.
Kórmeniń arnaıy bólimi zamanaýı arab ónerine arnalǵan. Bul bólimde Parsy shyǵanaǵy elderi – Bahreın, Saýd Arabııasy, Birikken Arab Ámirlikteri, Katar, Oman, sondaı-aq Iordanııa men Irak sýretshileriniń jumystary qoıylǵan. Avtorlar dástúr men zamanaýılyqtyń arasyndaǵy baılanysty zerttep, mádenı mura men qazirgi kórkemdik izdenisterdi ushtastyrǵan.
Joba aıasynda Saýd Arabııasynyń tanymal sýretshisi Ahmed Ál Maglýttyń jeke ekspozısııasy da usynyldy. Onyń shyǵarmalary qoǵamdyq qatynastardy, dástúrli ómir saltyn jáne áıelderdiń qoǵamdaǵy ózgerip jatqan rólin tereń ári shynaıy beıneleýimen erekshelenedi. Sonymen qatar sýretshi qaıyrymdylyq baǵytyndaǵy bastamalarymen de tanymal.
Kórmege qatysýshylar qatarynda BAÁ-den Kalsam Belselah, Katardan Farhan Ál Sheıh Ál Saıed, Saýd Arabııasynan Djamela Álherz, Iraktan Mohannad Ál-Daýd, Lıvan/BAÁ ókili Krıstın El Ojeıl, sondaı-aq Sara Albannaı, Alı Ahmadı, Maram Hasan syndy sheberler bar. Olardyń týyndylary ulttyq bolmys, mádenı jady, sımvolıka men zamanaýı estetıkany túrli qyrynan kórsetedi.
Japon ónerinen shabyt alǵan kawaii estetıkasy da kórmede erekshe oryn alǵan. Bul baǵyt názik sıýrrealızm men emosıonaldyq kópqabattylyq arqyly ishki álem men psıhologııalyq tereńdikti beıneleýge negizdelgen.
Eýropalyq sýretshiler – Ulybrıtanııa, Ispanııa, Italııa, Polsha jáne Avstrııa ókilderi zamanaýı ónerdegi eksperıment pen sýbektıvti kózqarastardy usynady. Al Reseı men Armenııa avtorlary sándik-qoldanbaly ónerdegi avtorlyq jumystarymen erekshelenedi.
Almatyda KITF 2026 kórmesine 6 myńnan astam adam qatysty
Qazaqstan sýretshileri de kórmege belsendi qatysyp jatyr. Olar ulttyq dástúr men mádenı biregeılikti oıý-órnek, sımvolıka jáne túster arqyly beınelegen. Qatysýshylar qatarynda Gúlnar Súıinbaeva, Serik Taınov, Qabyl Halyqov, Gúlnara Tabanova, Elena Fýrsa, Marjan Baqytbekova, Aıgúl Saparbekova jáne Bıbigúl Smaqova bar.
Jobanyń teń kýratory ári uıymdastyrýshysy – sýretshi, pedagog, Qazaqstan Respýblıkasy Dızaınerler odaǵynyń múshesi Bıbigúl Smaqova.
Kórmeniń ashylý saltanatynda sýretshiler men seriktesterge Londonnan shyqqan Britrise brendiniń BritAlma syılyǵy tabystaldy.
Astanada «Nur shashý» halyqaralyq kórmesi ashyldy
«Bir aspan astynda» kórmesi – mádenıetter dıalogyn damytyp, óner arqyly adamzatty biriktirýge baǵyttalǵan mańyzdy halyqaralyq joba.