Astanada «AMANAT» partııasynyń Kásipkerler qanaty energetıka salasynyń ókilderimen kezdesý ótkizdi. Jıyn barysynda tarıf saıasatyn jetildirýden bastap, energetıkalyq kásiporyndardy kadrmen qamtamasyz etýge deıingi salany damytýdyń mańyzdy máseleleri talqylandy, dep habarlaıdy Egemen.kz.
Tolǵandyrǵan máselelerdi sheshý boıynsha birlesken josparlar quryldy. Kezdesýge Energetıka mınıstri Erlan Aqkenjenov, Ekologııa jáne tabıǵı resýrstar mınıstri Erlan Nysanbaev, sondaı-aq Májilis depýtattary, salalyq qaýymdastyqtar men energetıkalyq kompanııalardyń basshylary qatysty. Partııanyń óńirlik fılıaldary beınekonferensbaılanys arqyly qosyldy. Búginde el aýmaǵynda energetıka salasynda shamamen 100 myń adam eńbek etedi.
«AMANAT» partııasy jańa jobany iske qosty
Májilis Spıkeri, «AMANAT» partııasynyń Tóraǵasy Erlan Qoshanov energetıka salasy memlekettiń ornyqty damýynda strategııalyq mańyzǵa ıe ekenin málimdedi. Ol Memleket basshysy salanyń saldarymen kúresýden – júıeli jańǵyrtý jumysyna kóshý mindetin qoıǵanyn erekshe atap ótti. Osy baǵytta keshendi jańǵyrtýǵa, jaýapkershilikti kúsheıtýge jáne uzaqmerzimdi josparlaýǵa betburys jasaldy. Sonyń nátıjesinde búginde memleket tarapynan salany retteý jumysy júıeli túrde júrgizilip, qordalanǵan máseleler sheshimin tabýda. Bul iske «AMANAT» partııasy da aıryqsha atsalysýda.
«Búgin biz osy salada sizderdi tolǵandyrǵan negizgi máselelerdi qarastyrdyq. Energetıka mınıstri atap ótkendeı, jaǵdaıdy retteý maqsatynda Úkimet tarapynan júıeli sharalar qabyldanýda. Bul másele Memleket basshysynyń tikeleı baqylaýynda. Biz saıası partııa retinde jáne sizder kásibı qaýymdastyq retinde birlesip, tıimdi tepe-teńdik tabýymyz kerek. Salaǵa ınvestısııa tartý, boljamdy erejeler qalyptastyrý jáne qarjy qaıtarymyn qamtamasyz etý úshin túsinikti jaǵdaı jasaý qajet. Alaıda azamattardyń múddesi, tarıf saıasatynyń ádildigi, áleýmettik turaqtylyq jáne júktemeniń artýy aýyrtpashylyq etetin azamattarǵa ataýly qoldaý kórsetý máseleleri de asa mańyzdy. Sondyqtan sizderdiń taraptaryńyzdan kóterilip otyrǵan máselelerdiń sheshim tabýy endi partııamyzdyń nazarynda bolady», dedi Erlan Qoshanov.
Májilis Spıkeri búginde energetıka salasyna qatysty memlekettik saıasat júıeli kezeńge kóshkenine nazar aýdardy. Alǵash ret «Jylý energetıkasy týraly» Zań qabyldandy, energetıka jáne kommýnaldyq sektorlardy jańǵyrtýǵa, sondaı-aq kómir generasııasyn damytýǵa baǵyttalǵan Ulttyq jobalar júzege asyrylýda. «Tarıfti ınvestısııaǵa aıyrbastaý» baǵdarlamasy iske qosyldy. Tarıftik jáne ınvestısııalyq saıasat qaıta qaraldy. Nysandardyń tehnıkalyq jaı-kúıin qadaǵalaý jumysy kúsheıtilip, jańa qýat kózderi iske qosylyp, jelilik ınfraqurylym damýda. Nátıjesinde tehnologııalyq aqaýlar sany azaıyp, qyzyl aımaqtaǵy JEO sany qysqardy.
Erlan Qoshanov «AMANAT» fraksııasy depýtattary energetıka salasyn damytý isine zańnamalyq qoldaý kórsetý baǵytynda aýqymdy jumys atqarǵanyn aıryqsha atap ótti. Olar energetıka salasyndaǵy jalaqyny óńirdegi ortasha salalyq deńgeımen baılanystyrýǵa zań júzinde bastamashylyq etti. Sonyń nátıjesinde keıingi eki jylda sala qyzmetkerleriniń jalaqysy 40%-ǵa ósti. Búginde ınvestısııalyq jobalarǵa qatysty rásimderdi jeńildetý jáne ekologııalyq kelisim alý merzimderin ońtaılandyrý boıynsha túzetýler ázirlendi. Tulǵalar tobyna kiretin kompanııalar úshin negizgi jabdyqtarǵa ınvestısııalyq kelisimder jasaý múmkindigin engizý usynylýda. Sondaı-aq energııamen jabdyqtaýshy kompanııalardyń qyzmetin lısenzııalaýdy engizý josparlanyp otyr. Bul túzetýler kásibı qaýymdastyqtyń suranysyna jaýap retinde ázirlendi. Olardy osy sessııa aıaqtalǵanǵa deıin qabyldaý josparlanýda.
Kezdesý barysynda qatysýshylar saladaǵy ózekti máseleler boıynsha pikir almasty. Atap aıtqanda, uzaqmerzimdi ári boljamdy tarıftik saıasatty engizý, qýat kózderi men jelilerdiń ábden eskirýi, iri júıequraýshy energetıkalyq jobalar úshin ákimshilik kedergilerdi azaıtý máseleleri nazarǵa alyndy. Sondaı-aq kómirtegi kvotalarynyń Ulttyq josparyn memlekettik baǵdarlamalar aıasynda iske qosylatyn energetıkalyq qýattar kólemimen úılestirý, kadr máselesi jáne ózge de taqyryptar talqylandy.
«Amanat» partııasy Kásipkerler qanatyn qurdy
Energetıka mınıstri Erlan Aqkenjenov óz baıandamasynda dástúrli jáne jańartylatyn energetıkany qatar damyta otyryp, energııa kózderin arttyrý baǵytyndaǵy júıeli sharalarǵa toqtaldy. Búginde elimizdiń energojúıesinde 245 qýat kózi bar. Onyń 166-sy – jasyl energetıka nysandary. 2035 jylǵa deıingi energetıka salasyn damytý Jospary aıasynda júıeli jumys júrgizilýde. Soǵan sáıkes, qýatty 26 GVt-tan asyrý kózdelip otyr. Qazirgi jobalardy júıeli júzege asyrý qadamy aldaǵy jyldary ekonomıkanyń elektr energııasyna degen suranysyn tolyq óteýge jáne turaqty profısıtti qamtamasyz etýge múmkindik beredi.
Sondaı-aq is-shara barysynda «OAEK» AQ aksıoneri Sergeı Kan, «QKJ» JShS aksıoneri Dinmuhammed Ydyrysov, «Qarajyra» AQ Basqarma Tóraǵasy Ilıar Nızamov, MAEK BPU jetekshisi Anatolıı Jdanov, Ekibastuz MAES-1 BPU tóraǵasy Serik Serıanov, Qazaqstan Elektroenergetıkalyq Qaýymdastyǵynyń Basqarma Tóraǵasy Talǵat Temirhanov jáne ózge de azamattar sóz sóıledi.
Kezdesý sońynda energetıkalyq kompanııalardyń birqatar ókili «AMANAT» partııasyna qosyldy. Olardyń qatarynda «KEGOC» AQ Basqarma Tóraǵasy Nábı Aıtjanov, «Samuryq-Energo» AQ Basqarma Tóraǵasy Qaırat Maqsutov, «Qaraǵandy Energosentr» JShS bas dırektory Flıýr Garıpov, «Shardara SES» AQ Basqarma Tóraǵasy Rashıd Eshojın, «GRES-2» AQ Basqarma Tóraǵasynyń jalpy jáne áleýmettik máseleler jónindegi orynbasary Gaýhar Nuǵmanova jáne ózge de azamattar bar.
Sonymen qatar energetıka salasynyń bir top ókili salany jáne el ekonomıkasyn damytýǵa qosqan úlesi úshin partııanyń «Belsendi qyzmeti úshin» tósbelgisimen marapattaldy.