Memleket basshysy Halyqaralyq kınologııa federasııasynyń prezıdenti Tamash Iаkkeldi qabyldady. Kezdesýde qazaqy ıt tuqymdaryn saqtaý jáne turaqty genetıkalyq qoryn qalyptastyrý isinde halyqaralyq federasııamen yntymaqtastyq perspektıvasy talqylandy, dep habarlaıdy Egemen.kz.
Qasym-Jomart Toqaev qazaq tazysyn aldyn ala tanýǵa oń septigin tıgizgeni úshin Tamash Iаkkelge alǵys aıtty. Bul sheshim 2024 jyly Amsterdamda ótken Halyqaralyq kınologııa federasııasy (FCI) Bas komıtetiniń otyrysynda qabyldanǵan edi.
Memleket basshysynyń aıtýynsha, tazy jáne tóbet tuqymdaryn saqtaý tek kınologııa turǵysynan emes, sondaı-aq dástúrli turmys saltymen tyǵyz baılanysty tarıhı-mádenı qundylyq retinde aıryqsha mańyzǵa ıe. It – qazaq halqynyń dúnıetanymynda jeti qazynanyń biri sanalady.
Júıeli jumys nátıjesinde búginde Qazaqstan kınologtar odaǵynyń Biryńǵaı asyl tuqymdy ıtter kitabynda 4 myńǵa jýyq tazy tirkelgen. Tıisti zańnamalyq aktiler qabyldandy.
Budan bólek, kóp uzamaı Jetisý oblysynda suryptaý jumystarymen aınalysatyn jáne ıt asyraýshylarǵa ǵylymı-kınologııalyq qoldaý kórsetetin Ulttyq ortalyq ashylmaq.
Halqymyzdyń asyl qazynasyn dáripteý maqsatynda bıyldan bastap 3 qyrkúıekte Qazaqy tazy men tóbet kúni atalyp ótedi.
О́z kezeginde Tamash Iаkkel qazaqy ıt tuqymdaryn saqtaýǵa aıryqsha qamqorlyq kórsetip otyrǵan Memleket basshysyna rızashylyǵyn bildirdi.
Sonymen qatar Prezıdentke álemniń 100 elin biriktiretin FCI qyzmeti týraly málimet berdi.
Memleket basshysy Qasym-Jomart Toqaev elimizdegi kınologııa salasyn damytýǵa qosqan úlesi úshin Halyqaralyq kınologııa federasııasynyń prezıdenti Tamash Iаkkeldi II dárejeli «Dostyq» ordenimen marapattady.