Qazaqstanda antıbıotıkterdi reseptisiz satýǵa qatysty talaptar kúsheıdi. Densaýlyq saqtaý mınıstrligi dárigerdiń taǵaıyndaýynsyz antıbıotıkterdiń satylýyn, sonyń ishinde onlaın-servıster men sıfrlyq platformalar arqyly taralýyn qatań baqylaýǵa alýdy josparlap otyr, dep habarlaıdy Egemen.kz.
Vedomstvonyń málimetinshe, bakterııaǵa qarsy preparattardy baqylaýsyz paıdalaný mıkroorganızmderdiń dárige tózimdiligin arttyryp keledi. Qazirgi tańda antımıkrobtyq rezıstenttilik densaýlyq saqtaý salasyndaǵy eń ózekti máselelerdiń birine aınalǵan.
Ulttyq qoǵamdyq densaýlyq saqtaý ortalyǵynyń basshysy Erık Baıjúnisov bul máseleniń medısınalyq sheńberden shyǵyp, ulttyq densaýlyq qaýipsizdigine áser etetin faktorǵa aınalǵanyn aıtty.
Medısınadaǵy revolıýsııa: Qazaqstanda biryńǵaı sıfrlyq kontýr quryldy
Mınıstrliktiń deregine sáıkes, elde mıkrobtarǵa qarsy preparattarǵa tózimdilikpen kúres jónindegi 2027 jylǵa deıingi jol kartasy iske asyrylyp jatqanymen, ózdiginen emdelý jáne antıbıotıkterdi zańsyz satý máselesi áli de ózekti bolyp otyr.
Mamandardyń aıtýynsha, kóptegen azamattar antıbıotıkterdi dárigerdiń taǵaıyndaýynsyz satyp alady. Bul ınfeksııalarǵa qarsy qoldanylatyn dárilerdiń tıimdiligin tómendetip, antıbıotıkke tózimdiliktiń kúsheıýine sebep bolady.
Densaýlyq saqtaý mınıstri Aqmaral Álnazarovanyń tapsyrmasymen antıbıotıkterdi reseptisiz bosatýǵa baqylaý kúsheıtilip, dárilerdi tańbalaý júıesi keńinen engiziledi. Sonymen qatar tózimdilik qaýpi tómen preparattardy tirkeýge basymdyq beriledi.
Medısına salasyndaǵy túıtkil: Emhanalardaǵy kezek qashan qysqarady?
Budan bólek, antımıkrobtyq rezıstenttilik máseleleri medısınalyq joǵary oqý oryndarynyń, magıstratýra, rezıdentýra jáne doktorantýra baǵdarlamalaryna engiziledi. Sondaı-aq epıdemıologııalyq baqylaý kúsheıtilip, óńirlerdegi mıkrobıologııalyq zerthanalardyń jumysy jetildiriledi jáne sala mamandaryn qosymsha oqytý josparlanyp otyr.