Kassasııalyq sot Saltanat Núkenovany óltirý isi boıynsha sottalǵan Baqytjan Baıjanovtyń shaǵymyn qarady, dep habarlaıdy Egemen.kz.
Sot úkimdi ózgerissiz qaldyrdy.
«Baıjanovqa qatysty qylmystyq is boıynsha shyǵarylǵan úkim ózgerissiz qaldyrylsyn. Advokattardyń kassasııalyq shaǵymy qanaǵattandyrylmasyn», dedi sýdıa Erlik Seralın.
Bıshimbaev Saltanat Núkenovanyń qaza tapqan kúni týraly aıtty
Sottyń málimetinshe, Baıjanov Núkenova qaıtys bolǵannan keıin qylmysty kóre tura, onyń izin jasyrýǵa tyrysqan. Ol meıramhanaǵa kirmek bolǵan memlekettik organ qyzmetkerlerine kedergi keltirip, beınebaqylaý kameralaryndaǵy jazbalardy óshirgen, kameralardy sóndirip, telefondy basqa jerge aparǵan jáne meıramhanaǵa áıeldiń kıimderin ákelgen.
«Qylmystyq árekettiń jasalǵany jónindegi sot qorytyndylary men alqabıler úkiminde kórsetilgen mán-jaılar negizdi. Olar dálelder jıyntyǵy men sot otyrystary materıaldaryna súıengen. Qylmystyq is materıaldaryn zerdeleý barysynda sottyń prosessýaldyq zań talaptaryn buzbaǵany anyqtaldy. Onyń ishinde alqabıler alqasyn qalyptastyrý jáne dálelderdi zertteý kezinde shyǵarylǵan aıyptaý úkimi jáne alqabıler sheshiminiń zańdylyǵy men negizdiligine áser etýi múmkin buzýshylyqtarǵa jol berilmegen», dep túsindirdi Seralın.
Bıshimbaev isi: Baqytjan Baıjanov 4 jylǵa sottaldy
Sondaı-aq sot alqasy taǵaıyndalǵan jazany jasalǵan áreketke, sottalǵan adamnyń jeke basyna jáne qylmystyń qoǵamdyq qaýiptilik deńgeıine saı ekenin jetkizdi. Osyǵan baılanysty qorǵaý tarapynyń qoǵamnan oqshaýlamastan jaza taǵaıyndaý nemese shartty jaza berý múmkindigi týraly ýájderi negizsiz dep tanyldy.
Osydan eki jyl buryn Astanada apellıasııalyq sot alqasy Qýandyq Bıshimbaev pen Baqytjan Baıjanovqa qatysty qylmystyq isti qarady. Sot olardyń ótinishin qanaǵattandyrmaǵan bolatyn.