Almaty qalasy Polısııa departamenti Qoǵamdyq qaýipsizdik basqarmasy bastyǵynyń orynbasary Aıtan Eleýsizov Qazaqstanda áıel adamnyń er adamdy qýdalaýyna qatysty stalkıng deregi tirkelgenin málimdedi. Bul týraly ol О́ńirlik kommýnıkasııalar qyzmeti alańynda ótken brıfıngte aıtty, dep habarlaıdy Egemen.kz.
Polısııa ókiliniń málimetinshe, otbasylyq-turmystyq qatynastar salasyndaǵy quqyq buzýshylyqtar boıynsha tek erler emes, áıelder de kúdikti retinde jıi jaýapqa tartylyp jatady. Ondaı isterdiń qatarynda densaýlyqqa qasaqana zııan keltirý, aýyr dene jaraqatyn salý jáne stalkıng (artynan qalmaı qýdalaý) derekteri bar.
Aıtan Eleýsizov naqty oqıǵaǵa toqtalyp, áıel adamnyń burynǵy qarym-qatynasyn qaıta jandandyrǵysy kelgenin jetkizdi.
«Stalkıng jasaǵan áıel qarym-qatynasty qaıta jalǵastyrǵysy kelgen. Biraq ekinshi tarap (er adam) ol kezde úılengen bolǵandyqtan, óz nekesin saqtaý maqsatynda polısııaǵa aryzdanýǵa májbúr bolǵan», dedi ol.
Polısııa málimetinshe, er adamdardy qýdalaǵan áıelderge qatysty ázirge osy bir ǵana fakt tirkelgen. Oqıǵa bıyl bolǵan. Sonymen qatar Eleýsizov qazirgi ýaqytta balalarǵa qatysty stalkıng derekteri boıynsha óndiriste qylmystyq ister joq ekenin atap ótti.
Terezeden syǵalap, mazasyn alǵan: Atyraý oblysynda stalkıng týraly jańa bap negizinde úkim shyqty
Polısııa ókili qýdalaýǵa qatysty qoldanylatyn jazalardyń tıimdiligi týraly da pikir bildirdi. Tájirıbe kórsetkendeı, agressorlardyń kóbi sotqa deıingi tergeý kezeńiniń ózinde-aq qýdalaýyn toqtatady.
«Alǵash ustalǵan kezde adamǵa zań talaptary tolyq túsindiriledi. Eger ol sotqa deıingi tergeý barysynda da qýdalaýyn toqtatpasa, bul keıin sotta qosymsha aýyrlatatyn jaǵdaı retinde qarastyrylýy múmkin», dep túsindirdi Aıtan Eleýsizov.
Aıta keteıik, Qazaqstanda stalkıng úshin qylmystyq jaýapkershilik qarastyrylǵan.