Kýba astanasy Gavanada elektr jaryǵynyń óshýine baılanysty jappaı narazylyq sherýleri ótti. Jaǵdaıǵa AQSh-tyń Kýbaǵa qarsy engizgen blokadasy áser etken, dep habarlaıdy Egemen.kz.
Qalanyń birneshe aýdanynda turǵyndar kóshege shyǵyp, elektr energııasyn qalpyna keltirýdi jáne azyq-túlikpen qamtamasyz etýdi talap etti. Narazylyq aksııalary Kýba astanasynyń ártúrli bólikterinde tirkelgen burynǵy sherýlermen ulasty. San-Mıgel-del-Padron mýnısıpalıtetinde halyq úkimet ǵımaraty aldyna jınalyp, elektr jaryǵy men azyq-túlikti talap etip urandatqan.
Sherýler sońǵy jyldardaǵy eń aýyr energetıkalyq daǵdarystardyń saldarynan týyndaǵan. Eldegi elektr energııasynyń tapshylyǵy keshki ýaqytta shamamen 2000 megavattqa jetken. Turǵyndardyń aıtýynsha, aptap ystyq pen uzaqqa sozylǵan jaryq óshýi saldarynan azyq-túlik buzylyp, ómir súrý jaǵdaıy qıyndaǵan.
Jaǵdaıǵa AQSh-tyń Kýbaǵa qarsy engizgen blokadasy áser etip otyr. Bul shekteýler janarmaı jetkizýge kedergi keltirgen. Bılik málimetinshe, 2025 jyldyń jeltoqsanynan 2026 jyldyń naýryzyna deıin Kýba munaı jetkizilimderin múlde almaǵan.
«Bizde qazir múlde mazýt ta, dızel otyny da joq. Qolymyzda bary – óz ken oryndarymyzdan óndiriletin ilespe gaz ben ulttyq munaı ǵana. Onyń óndirisi de artyp keledi», dedi Kýbanyń energetıka jáne taý-ken ónerkásibi mınıstri Vısente de la O Levı.
Kýbadaǵy daǵdarys: 3 aı boıy munaısyz qalǵan elde elektr energııasy tolyǵymen óshti
Onyń aıtýynsha, qazir energııa júıesi tek ulttyq munaı, tabıǵı gaz jáne jańartylatyn energııa kózderi esebinen jumys istep tur.
Sońǵy eki jylda Kýbada shamamen 1300 megavatt kún energııasy qýaty iske qosylǵanymen, janarmaı tapshylyǵyna baılanysty elektr jelileriniń turaqsyzdyǵy bul áleýetti tolyq paıdalanýǵa múmkindik bermeı otyr.
Buǵan deıin BUU AQSh shekteýlerin zańsyz dep atap, olardyń azyq-túlik, densaýlyq saqtaý jáne basqa da qyzmetterge qol jetkizý quqyǵyn buzatynyn málimdegen.
Aıta keteıik, buǵan deıin Kýba prezıdenti Mıgel Dıas-Kanel X áleýmettik jelisindegi paraqshasynda Tramppen soǵysýǵa daıyn ekenin jetkizgen bolatyn.