Qazaqstanda elektrondy bank qyzmetterine qatysty jańa talaptar kúshine enedi. Bul ózgerister kıberqylmysqa qarsy kúresti kúsheıtýge baǵyttalǵan, dep habarlaıdy Egemen.kz.
Qarjy sarapshysy Aıbar Oljaevtyń aıtýynsha, endi 2 mıllıon teńgeden asatyn aqsha aýdarymdary kezinde mindetti bıometrııalyq sáıkestendirý júrgiziledi. Onyń pikirinshe, bul adal mámile jasaıtyn azamattarǵa qıyndyq týdyrmaıdy jáne alaıaqtyqtyń aldyn alýǵa kómektesedi.
Sarapshynyń sózinshe, sońǵy jyldary zeınetkerler men azamattardyń iri kólemdegi qarajatyn áleýmettik ınjenerııa men psıhologııalyq yqpal arqyly ıemdený jaǵdaılary kóbeıgen. Sondyqtan qosymsha tekserý júıesi qajet.
Sonymen qatar bıometrııa qarjylyq operasııalardyń ashyqtyǵyn arttyrady. Zańdy mámile jasaǵan azamattar keıin salyq organdary nemese basqa memlekettik mekemeler tarapynan artyq suraqtarǵa tap bolmaıdy.
Aıbar Oljaev alaıaqtar talaptardy aınalyp ótý úshin somalardy bólip aýdarýy múmkin ekenin, biraq bul jaǵdaıda jábirlenýshiniń jaǵdaıdy túsinip, aldanǵanyn ańǵarýǵa ýaqyty bolatynyn atap ótti.
Degenmen jańa talaptar bank júıesine aıtarlyqtaı tehnıkalyq júkteme túsiredi. Endi qarjy uıymdary bıometrııalyq sáıkestendirý kezinde jınalǵan foto jáne vıdeo materıaldardy bes jyl boıy saqtaýǵa mindetteledi.
Sarapshy mundaı kólemdegi derekterdi saqtaý iri ınfraqurylymdyq sheshimderdi qajet etetinin aıtady. Sebebi Qazaqstannyń qarjy júıesinde 9 mıllıonnan astam adam tirkelgen, al jınalatyn aqparat kólemi óte úlken bolady.
Aıta keteıik, Bas prokýratýranyń Quqyqtyq statıstıka jáne arnaıy esepke alý jónindegi komıteti ınternet-alaıaqtardyń Apple men PayPal atyn paıdalanyp, jalǵan habarlamalar taratyp jatqanyn málimdedi.
Elimizde alaıaqtardyń qońyraýyn sekýnd ishinde buǵattap, toqtatatyn júıe engiziledi.