Ulttyq ulannyń áskerı bóliminde aýyr mı jaraqatyn alǵan sarbaz Erbaıan Muhtardyń jaǵdaıy kúrt nasharlady. Qazir ol jansaqtaý bóliminde jatyr. Bul týraly sarbazdyń ońaltý jáne qalpyna keltirý mamany aıtty, dep habarlaıdy Egemen.kz.
Málimetke sáıkes, Erbaıan Muhtar 26 mamyr kúni jaǵdaıynyń nasharlaýyna baılanysty Ulttyq shuǵyl medısınany úılestirý ortalyǵyna jedel túrde jetkizilgen.
Zańger Inga Imanbaı sarbazdyń jaqyndarymen turaqty baılanysta ekenin málimdedi.
Erbaıan Muhtar aýrýhanaǵa 2023 jyldyń jeltoqsanynda túsken edi. Jas sarbaz qyzmet etken Ulttyq ulan bóliminiń ókilderi ata-anasyna onyń dárethanada qulap, basyn kafelge soǵyp alǵanyn aıtqan. Alaıda týystary bul nusqaǵa basynan kúmán keltirip, Erbaıannyń jaraqatty soqqydan alǵanyn dáleldeýge tyrysyp keledi.
2024 jyldyń maýsym aıynda Bas áskerı prokýratýra tergeý «Áskerı qyzmetshiler arasyndaǵy jarǵylyq qarym-qatynas qaǵıdalaryn buzý» baby boıynsha júrgizilip jatqanyn habarlaǵan bolatyn. Al Ulttyq ulan basshylyǵy istiń IIM áskerı-tergeý departamentiniń baqylaýynda ekenin málimdegen.
Bas áskerı prokýrordyń birinshi orynbasary Maqsat Qazıev tergeý sheńberinde birqatar adamnyń tekserilip jatqanyn aıtqan edi.
Qazaqstan turǵyndary Erbaıan Muhtardyń emine shamamen 230 mln teńge jınaǵan. Ol 2025 jyldyń qańtar jáne qarasha aılarynda Túrkııada em qabyldaǵan, ol qarashada Qazaqstanǵa oraldy.