Qazaq shahmatshysy Bıbisara Asaýbaeva (51.30 upaı) «FIDE Women’s Circuit» reıtınginde kósh bastady. Oslodaǵy «Norway Chess Women-2026» týrnırine deıin ol tórtinshi orynda turǵan edi. Ekinshi, úshinshi satyǵa qytaılyq Chjý Szıner (39.83) men úndistandyq Vaıshalı Rameshbabý (29.70) jaıǵasty. Erler arasynda alǵashqy eki oryndy О́zbekstannyń qos óreni – Nodırbek Abdýsattorov (56.17) pen Javohır Sındarov (57.70) oljalasa, úzdik úshtikti amerıkalyq Fabıano Karýana (54.58) túıindedi. Bul reıtıngtiń basty ereksheligi – maýsym qorytyndysynda aldyna jan salmaǵan oıynshy birden «Úmitkerler týrnırine» joldama alady.
«World Boxing» federasııasy erlerden keıin áıelderdiń de reıtıngin jańartty. Elimizdiń qurama komandasy músheleri arasynda 70 kg salmaqtaǵy Natalıa Bogdanova ǵana kósh bastap tur. Nazym Qyzaıbaı (48 kg) men Aıda Ábikeeva (65 kg) – 2, Nadejda Rıabes (80 kg) pen Dına Islambekova (+80 kg) 3-orynda. Sondaı-aq TOP-10-dyqtyń qatarynda myna burymdylar bar: Alýa Balqybekova (51 kg) men Vıktorııa Grafeeva (60 kg) – 4, Eldana Tálipova (+80 kg) – 5, Áıgerim Sáttibaeva (48 kg) – 8, Gúlsaıa Erjan (80 kg) – 9, Valentına Halzova (75 kg) – 10-oryn.
Japonııada «WR Women’s Chess Tour 2026 – Tokyo Asian Leg» týrnıriniń birinshi kezeńi aıaqtaldy. Rapıdten ótken saıysta Alýa Nurman kúmis medal ıelendi. Shırek jáne jartylaı fınalda bolgarııalyq Antoaneta Stefanova men reseılik Katerına Lagnony utqan ol sheshýshi synda úndistandyq Vaıshalı Rameshbabýge ese jiberdi.
Short-trekten elimizdiń ulttyq qurama komandasynyń bas bapkeri bolyp Azamat Sultanálıev taǵaıyndaldy. Konkı sportynyń tizginin Aleksandr Jıgın ustady.
Kórkem gımnastıkadan Ovedo qalasynda uıymdastyrylǵan Ispanııanyń klýbtyq chempıonatynda Aqmaral Erekesheva qos qola medalǵa qol jetkizdi. Qazaq qyzy «taspa», «shyǵyrshyq» jattyǵýlarynda kózge tústi.
Rımdegi Gran-prı týrnırinde otandyq taekvondoshylar tegis utyldy. Básekede Samırhon Ababakırov (68 kg) pen Beıbarys Qablan (+80 kg) shırek fınalǵa deıin jetse, qalǵandary alǵashqy aınalymdardan asa almady.
Túrkistanda baıdarka men kanoe esýden jastar men jasóspirimder arasyndaǵy Azııa birinshiligi óz máresine jetti. Jarysta elimizdiń quramasy 41 júlde (20 altyn, 17 kúmis, 4 qola) oljalady.