Inkýbatorlyq qus sharýashylyǵymen aınalysatyn «Moldex» seriktestiginiń qyzmetkerleri birneshe aýyldy aralap, turǵyndarǵa taýyqtyń saryúrpek balapandaryn úlestirdi.
Qaıyrymdylyq is-sharasy aıasynda seriktestik jumysshylary Qostanaı aýdanyna qarasty Oktıabr, Altyndala, Jambyl eldi mekenderiniń turǵyndarymen kezdesip, kópbalaly analarǵa, zeınetkerlerge, aýylǵa jańa qonys aýdaryp jatqan jas otbasylarǵa jáshiktep balapan taratty.
Igi jobaǵa «Aýyl» partııasy qoldaý kórsetip, joǵary oqý oryndarynyń oqytýshylary men stýdentteri volonter retinde atsalysqanyn da aıta ketý kerek.
Uıymdastyrýshylardyń sózinshe, mundaı qaıyrymdylyq is-sharalary aýyl turǵyndarynyń turmysyn jaqsartýǵa septigin tıgizip, kópshilikti eńbekke yntalandyrady.
«Biz bir úıge 30–40 balapannan qaldyryp ketip jatyrmyz. Bul, ásirese jas otbasylardyń jeke sharýashylyqpen aınalysyp, qosymsha tabys tabýyna jol ashady. Aýyl halqyna osyndaı naqty kómek asa mańyzdy. Bizdiń istep jatqanymyz bireýlerge bolmashy ǵana kómek bolyp kórinýi múmkin. Biraq balapan baǵa bilgen adamnyń úıine bereke kiredi, eńbegi eselep qaıtady. Onyń ústine, qazir jumyrtqa da qymbat. Sondyqtan biz múmkindiginshe kópbalaly otbasylarǵa kómektesýge tyrysyp jatyrmyz. Balalar jazdaı úıdiń jumyrtqasyn jesin, taýyq baqsyn, eńbekke úırensin degen oıdamyz», deıdi kásiporyn basshysy Dınara Moldabaeva.
Izgi nıetten týǵan qaıyrymdylyq is-sharasy aıasynda balapan alǵan júzshaqty otbasy uıymdastyrýshylarǵa shynaıy alǵystaryn bildirdi. Kásiporyn atalǵan aksııany jyl saıyn ótkizip turmaq.
Qostanaı oblysy