Oblys ákimi Nuralhan Kósherov Túrkistan qalasyndaǵy «Kongress Holl» kesheninde ótken saltanatty is-sharada medısına qyzmetkerlerin tól merekelerimen quttyqtady. Jıynda óńir basshysy keıingi úsh jylda oblysta 115 medısınalyq nysan salynǵanyn, búginde taǵy 25 nysannyń qurylysy júrip jatqanyn atap ótti.
«О́ńirde densaýlyq saqtaý salasyn damytý baǵytynda júıeli jumys atqarylyp keledi. Medısınalyq uıymdar 1 548 zamanaýı qural-jabdyqpen tolyqtyryldy. Joǵary tehnologııalyq qurylǵylar iske qosylyp, sapaly medısınalyq kómektiń qoljetimdiligi artty. Jedel járdem qyzmetine 60 sanıtarlyq avtokólik pen 2 arnaıy keshendi qurylǵy berildi. Osylaısha, shalǵaı aýyldardaǵy turǵyndarǵa der kezinde kómek kórsetýge múmkindik jasaldy. Kadr daıarlaý isi de nazardan tys qalǵan joq. Jergilikti bıýdjet esebinen 297 dáriger-rezıdent daıarlandy. Bıyl aýyldyq jerlerge barǵan 73 jas mamanǵa memlekettik qoldaý kórsetiledi», deı kele, oblys ákimi medısına qyzmetkerlerine el amandyǵy men ult saýlyǵy jolyndaǵy eseli eńbekteri úshin shynaıy alǵysyn bildirdi.
Oblystyń 80%-ǵa jýyq halqy aýylda turady. Osy oraıda óńirdiń densaýlyq saqtaý salasynda aýyl halqyna medısınalyq kómektiń qoljetimdiligin qamtamasyz etý, sapaly qyzmet kórsetý, aýrýlardyń aldyn alý baǵytyndaǵy jumystar júrgizilip keledi. Mysaly, «Aýylda densaýlyq saqtaýdy jańǵyrtý» Ulttyq jobasy aıasynda ázirlengen úlgili jobalardy qaıta qoldaný arqyly byltyr aýyldyq eldi mekenderde 35 medısınalyq-sanıtarlyq alǵashqy kómek nysandary, Túrkistan qalasynda balalardy ońaltý ortalyǵy paıdalanýǵa tapsyryldy. Osy baǵyttaǵy jumystar jalǵasyn taýyp, bıyl 21 medısınalyq-sanıtarlyq alǵashqy kómek, 4 jedel járdem nysandary salynyp jatyr. Budan bólek, oblys aýmaǵynda 4 iri medısınalyq nysan – Saryaǵash qalasynda 300 tósektik oryndyq kópbeıindi aýrýhana, Ordabasy aýdany, Temirlan aýylynda 200 oryndyq oblystyq perınataldyq ortalyq, Túrkistan qalasynda 570 tósektik oryndyq kópbeıindi aýrýhana, sondaı-aq Birikken Arab Ámirliginiń Ábý-Dabı qory tarapynan demeýshilik esebinde qarjylandyrylatyn Túrkistanda joǵary mártebeli sheıh Muhammed Ben Zaıd ál-Nahaıan atyndaǵy 80 tósektik oryndyq perzenthana salynyp jatyr.
«Aýyl turǵyndaryna medısınalyq kómek kórsetý deńgeıin kóterý maqsatyndaǵy Ulttyq joba aıasynda birqatar mindet júzege asyrylady. Mysaly, aýyldyq eldi mekenderdi normatıvterge sáıkes MSAK uıymdarymen qamtamasyz etý baǵytynda 49 nysan salyndy. Aýyl turǵyndaryna ýaqtyly shuǵyl medısınalyq kómek kórsetý ulǵaıdy. Bul oraıda Jetisaı, Ordabasy, Saıram, Saryaǵash aýdandyq aýrýhanalary kópbeıindi ortalyq aýdandyq aýrýhana retinde jańǵyrtyldy. «Mektep medısınasyn damytý tujyrymdamasynyń jobasy» aıasynda mektepterdiń medısınalyq kabınetteri 20 stomatologııalyq qondyrǵy, 348 defıbrıllıatormen qamtamasyz etildi», deıdi oblystyq densaýlyq saqtaý basqarmasynyń basshysy Ashan Baıdýálıev.
Medısınalyq uıymdarda «Jasandy ıntellektini qoldaný arqyly radıologııalyq zertteýlerdi ortalyqtandyrý» jobasyn iske asyrý aıasynda PACS-júıesin engizý jumystary júrgizilip jatyr. Sonymen qatar biryńǵaı baılanys nómirine medısınalyq shaqyrtýlarǵa arnalǵan daýystyq robottardy qosý, Túrkistan qalalyq ortalyq aýrýhanasyna Serebra-mı ınsýltin avtomattandyrylǵan dıagnostıkalaýǵa arnalǵan baǵdarlamalyq júıesin júzege asyrý josparlanyp otyr. О́ńir turǵyndary kásibı biliktiligin, kishipeıildigin, uıymdastyrýshylyq qabiletin joǵary baǵalap otyrǵan basqarma basshysy A.Baıdýálıevtiń málimdeýinshe, eń jańa, kúrdeli, biregeı medısınalyq tehnologııalardy qoldana otyryp, 2024-2026 jyldar aralyǵynda oblys kóleminde 375 joǵary mamandandyrylǵan medısınalyq kómek kórsetilgen. Atap aıtqanda, 38 búırek, 4 baýyr transplantasııasy, 28 ekstra-ıntrakranıaldy vaskýlıarly shýntırleý, 26 ıntrakranıaldy arterııalarǵa teri arqyly stentti ımplantasııalaý, 138 bas, moıyn tamyrlarynyń endovaskýlıarlyq embolızasııasy nemese okklıýzııasy, 17 avtomatty kardıoverter/defıbrıllıatordy ımplantasııalaý jambas, tize almastyrǵyshtaryn revızııalaý syndy operasııalar jasalǵan.
«Oblystyń 2 mıllıonnan astam halqyna qazirgi tańda 757 medısınalyq uıym qyzmet etedi. О́ńirde 24 059 medısına qyzmetkeri el densaýlyǵyn túzeý jolynda ter tógip júr. Keıingi jyldary áleýmettik mańyzy bar qan aınalym júıesinen bolatyn, onkologııalyq aýrýlar kórsetkishi tómendep, nátıjesinde oblys turǵyndarynyń ortasha kútiletin ómir súrý uzaqtyǵy 75 jasqa jetti», deıdi basqarma basshysy.
Medısına qyzmetkerleri, sala ardagerleri, qoǵamdyq uıymdardyń ókilderi, óńir turǵyndary qatysqan saltanatty jıynda oblys ákimi Nuralhan Kósherov úzdik atanǵan medısına salasynyń ókilderin marapattady. Atap aıtqanda, 2 maman «Qurmet» ordenimen, 1 qyzmetker «Eren eńbegi úshin» medalimen marapattaldy. Sondaı-aq medısına qyzmetkerlerine oblys ákiminiń «Oblysqa sińirgen eńbegi úshin» tósbelgisi, Alǵys gramotalary tapsyryldy. О́tken jyldyń qorytyndysynda oblystyq negizgi medısınalyq kórsetkishterdiń oryndalýynda úzdik nátıje kórsetken Saýran aýdandyq emhanasyna jańa avtokóliktiń kilti tapsyryldy. Sonymen qatar óńirdegi bes ońaltý ortalyǵyna demeýshiler esebinen medısınalyq qural-jabdyqtar satyp alýǵa arnalǵan 2 mln teńgelik sertıfıkattar berildi.
Is-shara aıasynda qaterli dertten aıyǵyp shyqqan azamattar sóz sóılep, óz ómirlerin saqtap qalǵan dárigerlerge alǵysyn jetkizdi. Elimizge tanymal ónerpazdar konserttik baǵdarlamalaryn usynyp, qatysýshylarǵa kóterińki kóńil-kúı syılady.
Túrkistan oblysy