Medısına qyzmetkerleri jaıynda sóz qozǵala qalsa, aýyl-aımaqtardaǵy jurttyń densaýlyǵyn saqtaý jolynda aıanbaı eńbek etip kele jatqan mamandar týraly az aıtylatyny shyndyq. Biz baıandaǵaly otyrǵan Tereńkól aýdandyq aýrýhanasynda adam janynyń arashasy bolýdy óz ómiriniń basty muratyna aınaldyrǵan jandar eńbek etedi.
Meıirbıkeler – naýqasqa shıpa syılaıtyn, júrek jylýyn tógip, tózimdiligi men isine beriktigi arqyly emdelýshiniń dertinen aıyǵýyna sebepker bolatyn jandar. Osynaý ıgilikti jolǵa sanaly ǵumyryn arnap, medısına salasynda uzaq jyl boıy aıanbaı ter tógip kele jatqan bilikti mamannyń biri – Lıýbov Rıajko.
Lıýbov Aleksandrovna 1986 jyly Pavlodar medısınalyq ýchılıshesin «meıirbıke» mamandyǵy boıynsha támamdaıdy. Sol jyly qazirgi Tereńkól aýdandyq aýrýhanasynda eńbek jolyn bastap, 30 jyldan astam ýaqyt boıy bir ǵana mekemede tapjylmaı qyzmet etip keledi. Osy ýaqyt ishinde ol ózin bilikti, jaýapty ári izgi nıetti maman retinde kórsete bildi.
«Búgingi medısına salasy kóz ilespes jyldamdyqpen damyp jatyr. Aýyldyq jerde bolsaq ta, kásibı bilim men daǵdylarymyzdy úzdiksiz jetildirip, biliktilikti arttyrý kýrstarynan turaqty túrde ótip turamyz. Bul medısınalyq kómekti joǵary deńgeıde kórsetýge múmkindik beredi. Qazirgi kúni aýrýhananyń jalpy keshendik bólimshesinde anestezıst-meıirger bolyp eńbek etýdemin», deıdi ol.
L.Rıajko joǵary kásibıligi, emdelýshilerge degen erekshe qamqorlyǵy men mamandyǵyna degen adaldyǵy arqyly áriptesteri arasynda ǵana emes, kópshilik arasynda da shynaıy qurmetke ıe bolǵan jan. Kópjyldyq qaltqysyz qyzmeti, densaýlyq saqtaý salasyn damytýǵa sińirgen esepsiz eńbegi laıyqty baǵalanyp, «Densaýlyq saqtaý isine qosqan úlesi úshin» tósbelgisimen marapattalǵan.
Lıýbov Aleksandrovna jubaıymen birge shańyraǵynyń shattyǵyn eselep, ónegeli otbasy atanyp otyr. Mamannyń aıtýynsha, búginde meıirgerlik qyzmetke ózgeristiń qajettigi kúnnen-kúnge aıqyn sezilýde. Eńbekteriniń baǵalanýy, jeke mamandyqqa aınalýy kún tártibine shyǵyp, memlekettik deńgeıde qarastyrylýy sony aıǵaqtaıdy.
Tereńkól aýrýhanasynda uzaq jyldan halyqtyń qurmetine ıe bolyp kele jatqan taǵy bir medısına qyzmetkeri – Svetlana Dvınıanına. 1989 jyly Pavlodar medısınalyq ýchılıshesin támamdap, arnaýly orta medısınalyq bilim alyp shyqqan soń birden aýdan ortalyǵyna kelip, aýrýhanaǵa jumysqa ornalasady. Meıirger retinde óziniń búkil eńbek jolynda únemi kásibı turǵydan ósýge umtylyp, mindetine erekshe jaýapkershilikpen qarap, bilimin toqtaýsyz jetildirip keledi. Eńbekqorlyǵynyń arqasynda 1996 jyldan bastap jumysyn rentgen-laborant retinde jalǵastyrdy. Bul qyzmette jınaqtaǵan mol tájirıbesin, qyraǵylyǵy men joǵary biliktiligin tolyqtaı kórsete bildi.
«Uzaq jylǵy qyzmet barysynda tájirıbeli maman retinde birneshe ret biliktilikti arttyrý kýrstarynan óttim. Zamanaýı dıagnostıkalyq tehnologııalardy meńgerip, óz bilimimdi únemi dáleldep otyrýǵa týra keledi. Kásibı jetistikterim kóptegen sertıfıkatpen, dıplommen, ózge de marapatpen baǵalandy», dep atap ótti maman.
Svetlana Petrovna iskerligi men eńbekqorlyǵy, kásibine degen adaldyǵy arqasynda áriptesteri arasynda zor abyroı men qurmetke ıe boldy. Emdelýshiler ony meıirimdiligi men ár adamǵa erekshe yqylaspen qaraıtyn qamqorlyǵy úshin qadirleıdi. Aıaýly jan kásibı bıikterdi baǵyndyryp qana qoımaı, otbasynda da ardaqty ana atana bildi. Tárbıelep ósirgen qyzy da anasynyń izin basyp, izgi mamandyqty tańdaǵan. Búginde ol aýdandyq aýrýhananyń jalpy keshendik bólimshesinde meıirger bolyp eńbek etip, áýlettik dástúrdi laıyqty jalǵastyryp keledi.
Pavlodar oblysy,
Tereńkól aýdany