Elordadaǵy «Avtokomponenty KZ» zaýyty arnaıy tehnıka óndirisin júıeli jolǵa qoıyp keledi. Onda kommýnaldyq tehnıkadan bastap órt sóndirý kóligine deıingi túrli qondyrǵy qurastyrylyp, jergiliktendirý úlesi artyp jatyr. Kásiporyn tájirıbesi otandyq mashına jasaý salasyndaǵy jańa múmkindikterdi aıqyn kórsetedi.
Saryarqa aýdanyndaǵy óndiris aımaǵyna aıaq basqan sátten-aq jumystyń qyzý qarqyny baıqalady. Bir jerde metall kesilip, endi bir jerde jańa tehnıkanyń qańqasy qurastyrylyp jatyr. Osy óndiristik alańdaǵy mańyzdy jobalardyń biri – «Avtokomponenty KZ» zaýyty. Astana qalasynyń Investısııalar jáne kásipkerlikti damytý basqarmasynyń, sondaı-aq «Astana damý ortalyǵy» JShS qoldaýymen iske qosylǵan kásiporyn búginde elordanyń ónerkásiptik áleýetin arttyrýǵa úles qosyp otyr.
Kópshilik arnaıy tehnıkany daıyn kúıinde kóredi. Al onyń artynda qanshama ınjenerlik esep, tehnologııalyq sheshim men jumysshy eńbegi turǵanyn ańǵara bermeıdi. Bul kásiporynda fýrgondar, kommýnaldyq-jol tehnıkalary, órt sóndirý mashınalary, vahtalyq avtobýstar men túrli arnaıy qondyrǵylar shyǵarylady.
Seh ishine kirgende óndiristiń birneshe kezeńi qatar júrip jatqanyn baıqaısyń. Lazerlik stanoktar metall tabaqtardy dáldikpen kesip jatyr. Arǵy bette bolashaq fýrgonnyń qańqasy dánekerlenip jatyr. Bir sehta panelder daıyndalsa, kelesi bólikte boıaý men qurastyrý jumysy júrgiziledi.
Kásiporynnyń óndiris jónindegi dırektor orynbasary Edgar Benda óndiristiń qalyptasý tarıhyna toqtaldy.
«Bastapqyda kompanııa ımporttyq jabdyqtardy jetkizýmen aınalysty. Keıin osyndaı ónimderdi óz elimizde óndirýge bolatynyn túsindik. Sóıtip, óz óndirisimizdi iske qostyq. Qazir fýrgondardy tolyq sıklmen shyǵaramyz. Buryn mundaı ónimderdiń basym bóligi syrttan ákelinetin edi», deıdi Edgar Benda.
Kásiporyn naryqta on jyldan astam ýaqyttan beri jumys isteıdi. Keıingi jyldary óndiristi jergiliktendirýge erekshe kóńil bólingen. Búginde fýrgon tehnıkasy óndirisindegi jergilikti qamtý úlesi 70 paıyzdan asqan.
Zaýytta kommýnaldyq qyzmetterge arnalǵan túrli tehnıkalar men arnaıy jabdyqtar da qurastyrylady. Qazir munda «Kópir» mekemesine arnalǵan jyljymaly avtojóndeý sheberhanasy daıyndalyp jatyr. Arnaıy kólik ishinde jóndeý jumysyna qajetti qural-jabdyqtyń bári qarastyrylǵan.
О́ndiris alańynda júrip, qazirgi zamanǵy tehnologııalardyń óndiris úderisine qalaı engenin anyq baıqaısyń. Lazerlik kesý qurylǵylary men avtomattandyrylǵan júıeler ónim sapasyn arttyryp qana qoımaı, jumys ónimdiligin de eseleı túsken. Zaýyttaǵy eńbek mádenıeti de nazar aýdartady. Sehtar jaryq ári taza. Qyzmetkerler qaýipsizdik talaptaryna saı arnaıy kıimmen qamtamasyz etilgen. Demalys oryndary da qarastyrylǵan.
Búginde kásiporynda elýge jýyq adam eńbek etedi. Aldaǵy jyldary jumysshy sanyn eki esege jýyq arttyrý jospary bar.
Alaıda óndiristegi negizgi máselelerdiń biri – bilikti kadr tapshylyǵy. Sondyqtan jańa mamandardyń kópshiligi jumys barysynda tájirıbe jınaqtap, qaıta daıarlyqtan ótedi.
Zaýyt qyzmetkeri Rýslan Garıfýllınniń mamandyǵy – mehanık. Búginde ol mehanıkalyq-qurastyrý jumysynyń slesary retinde eńbek etedi. «Eńbegińniń nátıjesin kórýdiń ózi erekshe sezim beredi. Búgin qurastyrǵan tehnıkań erteń el ıgiligine qyzmet etedi. Onyń ústine turaqty jumys pen laıyqty jalaqy adamǵa senimdilik beredi», deıdi jumysshy.
Mamandardyń aıtýynsha, mundaı kásiporyndardyń mańyzy jyl saıyn artyp keledi. О́ıtkeni olar daıyn ónim shyǵaryp qana qoımaı, ınjenerlik tájirıbeni qalyptastyrady, jańa jumys oryndaryn ashady ári óńdeý ónerkásibiniń áleýetin kúsheıtedi.
Zaýyt aýlasynan shyqqan kezde bir nárse anyq seziledi. Munda jaı ǵana tehnıka qurastyrylyp jatqan joq. Bul kásiporynda tájirıbe jınaqtalyp, jańa óndiristik mádenıet qalyptasyp keledi. Metall men mehanızmniń arasynda el ónerkásibiniń erteńi de shyńdalyp jatqandaı áser qaldyrady.