Eki Ánýar men Islam erledi

Bul kúnderi Ońtústik Koreıanyń Seýl qala­synda «IBSA» atty zaǵıp­tardyń álem­dik oıyndary ótýde. Osy baıraqty básekege elimiz­diń úmitin ar­qa­lap 14 azamat attanǵan edi. Osy aptada Seýlden súıinshi habar jetti. Sońǵy kezde júlde alýdan Qazaqstan paralımpıadashylarynyń kósh basynda turǵan Ánýar Ahmetov júzýden ótken jarysta qos kúmis medaldy ıelendi. Bir kúmis medaldy Islam Salımov jeńil atletıkadan utty. Al, boz kilemde jas dzıý­doshymyz Ánýar Sarıev qola medaldi jeńip aldy. «IBSA» oıyndary paralımpıadashylar ara­syndaǵy iri sporttyq jarystardyń biri. Bul oıyndar tórt jylda bir ret ótedi. Bıyl besinshi márte ótip jatqan jarysta sportshylar jeńil atletıka, shahmat, fýtbol, golbol, dzıýdo, paýerlıftıng, shoýdaýn, júzý, juptasqan velojarys jáne boýlıng syndy sport túrlerinen baq synasýda. Qazaqstan quramasynyń sportshylary tek júzý, jeńil atletıka, dzıýdo jáne shahmat jarystaryna qatysýda. Endi, naqty nátıjege kelsek, Ánýar Ahmetov 100 metrge shalqalap jáne erkin júzýden ótken saıysta joly bolmady. Tek brass ádisimen jarys­ta 50 metrdi 32:56 sekýndta júzip ótip bir kúmisti oljalasa, keıinnen batterflıaı ádisimen 50 metrdi 28:56 sekýnd ýaqytpen júzip ótip, taǵy bir kúmis medaldy utty. Ánýardyń áriptesteri Álibek Ýaqpaev, Bekjan Esirkepov, Mansurbek Ibrashevtardyń ázirge qanjyǵalary maılanar emes. Jeńil atletıka básekesinde qyzylordalyq Islam Salımov úmitti aqtady. Islam 400, 200 metrge júgirýden júldege ilikpese de, uzyndyqqa sekirýde nátıjeni 5.86 metrge jetkizip, kúmis medaldy keýde­sinde jarqyratty. Boz kilemdegi beldesýlerde Orynbasar Quralbaı, Temirjan Hasanǵalıev, Samat Bımuratov alǵashqy aınalymdarda qapy ketip, jarys jolynan shyǵyp qaldy. Tek atyraýlyq jas balýan Ánýar Sarıev bes qarsylasyn utyp, aqyrynda qola medalǵa qol jetkizdi. Bul – Ánýar baýyrymyzdyń halyqaralyq jarystaǵy alǵashqy iri tabysy. Dastan KENJALIN, «Egemen Qazaqstan».