PETROPAVL. 30 naýryz. Petropavlda úsh balasyn tastap, ún-túnsiz taban jaltyratqan kelinshek úsh aıdan keıin Atbasar qalasynan tabyldy. Bul týraly jergilikti «Dobryı vecher» gazeti habarlady.
«Balalar úıiniń» bas dárigeri Márýar Qapenovanyń aıtýynsha, Petropavl qalasynyń turǵyny Anastasııa Gýrıanova 4, 3 jáne1 jasar Sasha, Denıs, Igor esimdi balalaryn jańa jyl aldynda mekemeniń tabyldyryǵyna tastap ketipti. Al ózi belgisiz jaqqa zym-zııa joǵalǵan.
Qalalyq ákimdiktegiler men áleýmettik qorǵaý qyzmetkerleri kúıeýi túrmede otyrǵan, al ózi úsh ulymen kóshe kezip, tentirep júrgen jalǵyzilikti kelinshekke qoldan kelgen kómegin jasap baqqan. Ýaqytsha baspana da bólgen. Esik-terezelerin aýystyryp, jańalap bergen. Kıim-keshek pen azyq-túlik jetkizilip turǵan. «Semizdikti qoı ǵana kóteredi» degen ras-aý. Osynsha jarylqaýshylyq pen raqymshylyqtan mezi bolsa kerek, áıel balalaryn tastap, beti aýǵan jaqqa jónep bergen.
Úsh balasyn tastap ketken kelinshek Atbasardan tabyldy. Ol óziniń tasbaýyr is-áreketin «Atbasarǵa jumys izdep baryp edim. Kúıeýge shyqtym. Endi balalarymdy alyp ketemin», degen aqtalýmen jýyp-shaıǵysy kelgenin aıta keteıik.
О́mir Esqalı.
Derek: «Dobryı vecher» basylymy.
Sýret: voxpopuli.kz.