ASTANA. 30 maýsym. Bas Prokýrordyń orynbasary Jaqyp Asanov bastaǵan Qazaqstan delegasııasy Túrkııanyń Ádil sot akademııasynyń jumysyn uıymdastyrý tájirıbesimen tanysyp qaıtty. Top quramynda Parlament depýtaty Nurlan Ábdirov, Prezıdent Ákimshiligi bólim meńgerýshisiniń orynbasary Alekseı Kalaıchıdı, Joǵarǵy Sottyń, Bas prokýratýranyń jáne birqatar oblystyq prokýratýranyń ókilderi boldy. Bul týraly Bas prokýratýranyń baspasóz qyzmeti habarlady.
Delegasııanyń saparyna Túrkııa Úkimeti janyndaǵy Túrkııa yntymaqtastyq jáne úılestirý jónindegi agenttik (TIKA) pen Qazaqstannyń Túrkııadaǵy elshiligi qoldaý kórsetti.
Qazaqstannan barǵan meımandar Akademııa basshylyǵymen kezdesip, oqý orny qyzmetiniń negizgi baǵyttarymen tanysty. Túrkııalyq áriptester oqý mekemesiniń qurylymy, mundaǵy oqý isiniń erekshelikteri týraly jáne tyńdaýshylardyń sanattaryn arttyrý, ǵylymı-ádistemelik, sondaı-aq, materıaldyq-tehnıkalyq bazasy jaıynda áńgimelep berdi.
Ádil sot akademııasy sýdıa nemese prokýror mamandyǵyn tańdaǵan árbir zańger bilim alýǵa mindetti, aıryqsha mártebege ıe bilim berý mekemesi bolyp tabylady. Mekeme álemniń 80-nen astam elderiniń oqý oryndarymen jáne quqyq qorǵaý organdarymen belsendi yntymaqtastyq ornatqan. Mundaǵy oqý baǵdarlamasy tyńdaýshylarǵa teorııalyq bilimdi prokýrorlyq jáne sýdıalyq jumystarmen is júzinde baılanystyra otyryp sińiredi. Dáris berý jumystaryn tájirıbeli prokýrorlar men sýdıalar júzege asyrady.
Sapar barysynda Qazaqstannyń Túrkııadaǵy elshisi Janseıit Túımebaev Ádil sot akademııasynyń prezıdenti Ialmaz Akchıl myrzaǵa, onyń eki eldiń ókiletti organdary arasyndaǵy ózara yqpaldastyqty damytýǵa qosqan aıryqsha úlesin atap kórsete otyryp, «Qazaqstan men Túrkııa arasyndaǵy dostyq pen yntymaqtastyqty damytqany úshin» estelik medalin tapsyrdy.
Sonymen qatar, sapar aıasynda jekelegen memlekettik organdardyń birinshi basshylarymen qyzmettik kezdesýler uıymdastyryldy. Atap aıtqanda Parlamenttiń Bas hatshysy Irfan Nezıroglýmen, Konstıtýsııalyq sot tóraǵasynyń mindetin atqarýshy Býrhan Ýstýnmen, Qylmystyq jáne azamattyq ister boıynsha joǵarǵy sot tóraǵasy Ismaıl Rýshtýmen, Joǵarǵy áskerı sot tóraǵasy Ahmet Zıkılımanmen, Bas prokýror Mehmet Akardjamen, Bas áskerı prokýror Alı Ýzýnmen, odan bólek, Ádilet mınıstrligi jáne Joǵarǵy sot ókilderimen kezdesý barysynda qazaqstandyqtar Túrkııanyń zańnamalarymen jáne quqyqtyq júıesimen, ortalyq memlekettik organdardyń ókiletterimen jete tanysty.
Kezdesý barysynda qabyldaýshy taraptyń ókilderi Qazaqstannyń qaryshtap damyp kele jatqandyǵyn joǵary baǵalap, Elbasy Nursultan Nazarbaevtyń eki baýyrlas el dostyǵynyń nyǵaıyp, yntymaqtastyǵynyń artýyna qosyp jatqan eleýli eńbegin atap ótti.
Túrkııanyń Ádil sot akademııasynyń oń tájirıbesi Qazaqstandaǵy Bas prokýratýranyń janynan qurylyp jatqan Quqyq qorǵaý organdary akademııasynyń qyzmetinde keńinen paıdalanylatyn bolady.
Elaman Qońyr.
Derek, sýret: Bas prokýratýranyń baspasóz qyzmeti.