Sımpozıýmǵa qatysty

Esep komıtetiniń tóraǵasy Qozy-Kórpesh Jańbyrshın «2015 jyldan keıingi BUU-nyń damý kún tártibi: ornyqty damýdy qamtamasyz etýdegi joǵary qarjy baqylaý organdarynyń róli» taqyrybynda 2-4 naýryz aralyǵynda  Vena qalasynda (Avstrııa) ótken  BUU/INTOSAI 23-shi sımpozıýmyna qatysty. Atalǵan is-shara BUU-nyń Bas hatshysynyń orynbasary Vý Hong­bonyń, álemniń 75 eliniń, sonyń ishinde AQSh, Ulybrıtanııa, Polsha, Qazaqstan, Ońtústik Afrıka Respýblıkasy, BAÁ, Ońtústik Koreıa joǵary qarjy baqylaý organdary basshylarynyń, sondaı-aq BUU jáne birqatar basqa da bedeldi halyqaralyq uıymdar ókilderiniń qatysýymen ótti. Sımpozıým otyrysyn Avstrııanyń Federaldy Prezıdenti Haıns Fısher ashty. Qatysýshylar memleketterdiń áleýmettik-ekonomıkalyq damýyna járdemdesý maqsatynda bıýdjet qarajatynyń tıimdi jáne ashyq paıdalanylýyn qamtamasyz etýdegi joǵary qarjy baqylaý organdarynyń (JQBO) rólin talqylady. 2015 jyldan keıingi BUU-nyń damý kún tártibin jáne BUU-nyń ornyqty damý maqsattaryn daıyndaý sheńberinde JQBO-lardyń memlekettik basqarýdaǵy ashyqtyqty jáne tıimdilikti qamtamasyz etý máselelerine neǵurlym belsendi qatysý mańyzdylyǵy atap ótildi. Sondaı-aq, qyzmet tıimdiligin arttyrý joldary, aýdıtorlyq qorytyndylar men usynymdardy daıyndaý ádistemelerin jetildirý máseleleri qaraldy. JQBO-lardyń áleýetin arttyrý, memleket qarjysynyń tıisti deńgeıde basqarylýyn qamtamasyz etý, sondaı-aq bıýdjet qarajatyn paıdalaný kezinde sybaılas jemqorlyqqa jáne alaıaqtyqqa qarsy turý maqsatynda memlekettik aýdıt­tiń mańyzdy teorııalyq máselele­rin birlesip ázirleý boıynsha INTOSAI-ǵa qatysýshy elder JQBO-larynyń óz­ara­ is-qımylyn damytý qajettigi atap ótildi. Jumys qorytyndysy boıynsha ornyqty damýdy qamtamasyz etýde joǵary qarjy baqylaý organdarynyń rólin kúsheıtý boıynsha naqty kelisilgen usynystar jasaldy. Sımpozıým sheńberinde Q.Jań­byrshın Ázerbaıjan, Belarýs, Ún­distan, Indonezııa jáne Nıderlandy joǵary qarjy baqylaý organdarynyń basshylarymen ekijaqty kelissózder júrgizdi. Kezdesý barysynda taraptar ekijaqty negizde, sol sııaqty halyqaralyq uıymdar sheńberinde de yntymaqtastyqty retteýge jáne damytýǵa qyzyǵýshylyq bildirdi. «Egemen-aqparat».