Etıkalyq normalar Hartııasy qabyldandy

Keshe Astanadaǵy Ulttyq akademııalyq kitaphanada «Bas redaktorlar klýby» qoǵamdyq birlestigi buqaralyq aqparat quraldarynyń basshylarymen birlese otyryp, kezekten tys prezıdenttik saılaý barysynda Etıkalyq normalardy saqtaý týraly hartııa qabyldady. Búginde «Bas redaktorlar klýby» qoǵamdyq birlestigi 250-ge jýyq res­pýb­lıkalyq BAQ-tyń basshy­laryn biriktiretin iri medıa qaýymdastyqqa aınalyp úlgerdi. Uıym óz aldyna el egemendigin nyǵaıtý, demokratııalyq qoǵam qurý, kásibı aqparattyq keńistikti da­mytý, sondaı-aq, qoǵamda turaq­tylyq pen ultaralyq ynty­maq­tas­tyqty baıandy etý syn­dy min­detterdi qoıyp otyr. Oǵan bú­gingi kúnge deıin uıymdas­tyryl­ǵan san túrli is-sharalar dálel bola alady. Al keshegi jıynda Bas redaktorlar klýbynyń prezıdenti Bıbigúl Jeksenbaı 26 sáýirde ótetin kezekten tys prezıdenttik saılaý naýqanynyń demokratııalyq turǵyda, halyqaralyq talaptarǵa saı, ádil de ashyq bolýyna BAQ ta bir kisideı jumyla atsalysýy kerek ekenine toqtala kele, Hartııa mazmunymen tanystyrdy. Onyń aıtýynsha, atalǵan qujat Qazaqstan Konstıtýsııasy, Saılaý týraly, BAQ týraly zańdarǵa sáıkes ázirlenip, barlyq úmitkerdiń aqparat quraldarynda birdeı múmkindikke ıe bolýyna jaǵdaı jasaýǵa baǵyttalǵan. «Negizgi maqsat – saılaý naýqany barysynda áriptesterimizdiń qara pıar men teris aqparat taratýyna tosqaýyl qoıý, úmitkerlerdiń BAQ-ta birdeı aqparat taratýyna jaǵdaı jasaý. Qazirdiń ózinde elimizdiń ártúrli buqaralyq aqparat quraldarynda, sonyń ishinde respýblıkalyq BAQ-tyń ujymdarynda talqylaý ótip, 300-den asa áriptesimiz osy Hartııaǵa qoldaý kórsetti. Hartııanyń negizgi baptary mynadaı: Qazaqstan Respýblıkasynyń zańnamalaryn, jýrnalısterdiń kásibı etıkalyq normalary men minez-qulyq ere­jelerin buljytpaı saqtaý, saılaý naýqanyna arnalǵan barlyq ma­terıaldyń obektıvti, alalaýsyz, aqparattyq, sondaı-aq, Qazaqstan prezıdentinen úmit­kerlerge qatysty ádil bolýyna yqpal etý, úmitkerlerdiń abyroıy men iskerlik bedeline, jeke basyna nuqsan keltirýi yqtımal aqparattardy taratpaý, aqparat kózderin, ásirese, olar kúdik týdyratyn bolsa, tekserýge alý, úgittik jarııalanymdar men aqparattyq habarlamalar arasyndaǵy aıyr­mashylyqty naqty ajyratý, belgilengen tártippen áleýmettik saýaldamalar júrgizý sharttaryn ustaný, saýaldama nátıjelerin jarııalaý kezinde aýdıtorııaǵa berilgen saýaldama jaýaptary tek qana boljam ekenin eskertý jáne saýaldama nátıjeleri týraly nemese saılaýǵa bes kún buryn jáne daýys berý kúngi aldyn ala nátıjeler týraly materıaldardy taratpaý», dedi B. Jeksenbaı. «Egemen Qazaqstan» res­pýb­lıkalyq gazeti» AQ prezıdenti Saýytbek Abdrahmanov bul Hartııanyń mátini redaksııaǵa, aldyn ala jiberilgenin, aqyldasýǵa múmkindik bolǵanyn jetkizdi. «Bul Hartııanyń rýhyn da, mátinin de tolyq qoldaımyz. О́ıtkeni, kezekten tys prezıdenttik saılaý – búkil eldiktiń synaǵy degen kezde, bul alǵashqy kezekte buqaralyq aqparat quraldaryna da synaq. Bizdiń kásibıligimizge synaq, bizdiń ádildigimizge synaq. Osy synaqtan abyroımen ótý úshin aldyn-ala osyndaı Hartııaǵa qol qoıýymyz qaı jaǵynan da oryndy dep oılaımyn. Belgili bir dárejede Ortalyq saılaý komıssııasynyń talaptaryna sáıkes, barlyq kandıdattyń tıisti tártip boıynsha dál ornyn berý, birdeı oryn qarastyrý, saılaýaldy tuǵyrnamalaryn belgili bir bette, birdeı kólemde jarııalaý sııaqty erejelerdiń saqtalýyna múddelimiz, sony qamtamasyz etemiz. Kandıdattardyń saılaýaldy shtabtary da osy Hartııanyń talaptaryn eskerse deımiz», degen pikirin bildirdi basylym basshysy. «Qazaqstan teleradıo korporasııasy» AQ basqarma tóraıymy Nur­jan Muhamedjanova da Har­­tııanyń mátinimen aldyn ala ta­nys­qanyn aıtty. «О́zderińiz bile­siz­der, «Qazaqstan teleradıo korpo­rasııasy» AQ quramyna 3 tele­arna, 4 radıo jáne 14 aımaq­tyq telearna kiredi. Olarda 2,5 myń­nan astam qyzmetker bar. Bul qyzmetkerlerdiń tikeleı ja­ńa­lyq­tar qyzmetine qatystylary 800-ge jýyq. Olar jýrnalıster, operatorlar, montajerler, televızııalyq jańalyqtardy daıyndaýǵa qatysy bar azamattar. Qalǵandary radıojýrnalıster. Mine, osy áriptesterimizdiń barlyǵy da bir kisideı bul Hartııany qoldaıdy degen senimdemin. Biz elimizdegi kezekten tys prezıdenttik saılaýdyń durys ári ádil ótýine jáne osy saılaýǵa qatysamyn dep tilek bildirgen árbir úmitkerge birdeı, teń quqyqtyq múmkindikter berýdi qamtamasyz etýdi jaýapkershilik dep sanaımyz. Saılaýdyń qan­sha­lyq­ty ádil ótýine búkil álem kóz tigip otyrǵan kezde bul bárimiz úshin de synaq», dedi ol óz sózinde. Bul kúngi jıynǵa qatysqan «Kazahstanskaıa pravda» respýb­lıkalyq gazeti» AQ basqarma tóra­ǵasy A. Tarakov, «Qazaqparat» ha­lyq­aralyq aqparat agenttiginiń bas dırektory D.Dııarov, «Tú­gelmedıa» birlestiginiń basshysy S. Túgel, «Qazaqstan temir­jol­shysy» gazetiniń bas redak­tory Lılııa Erjanova, «Delo­voı mır» jáne «Otbasy» jýrnal­darynyń bas redaktory Sholpan Syz­dyqova qabyldanǵan qujattyń mańyzdylyǵyna jan-jaqty toq­talyp, Hartııany ózderi basqaryp otyrǵan ujym músheleri de biraýyzdan qoldaý bildiretinin aıtty. Láıla EDILQYZY, «Egemen Qazaqstan». Sýretti túsirgen Erlan OMAROV.