ITB halyqaralyq týrıstik kórmesiniń jumysyna qatysty
Berlınde EKSPO-2017 Komıssary – Qazaqstan Syrtqy ister mınıstriniń birinshi orynbasary Rápil Joshybaev bastaǵan qazaqstandyq delegasııa 49-shy «ITB-2015» halyqaralyq týrıstik kórmesiniń jumysyna qatysty.
Delegasııanyń quramyna Syrtqy ister, Investısııalar jáne damý mınıstrlikteriniń, qalalyq jáne oblystyq ákimdikterdiń, «Astana EKSPO-2017» ulttyq kompanııasynyń, týrıstik agenttikterdiń, servıstik sektorlardyń, Qazaqstannyń qolóner men zergerlik óneriniń ókilderi kirdi. Bıylǵy jyly atalǵan kórmede 180 elden 10 myńǵa jýyq stend ornatyldy.
Kórme sheńberinde EKSPO-2017 Komıssary BUU Búkilálemdik týrıstik uıymy (BTU) Jibek joly elderiniń týrızm mınıstrleriniń 5-shi otyrysyna qatysyp, Qazaqstandaǵy týrızmniń damýy, Jibek joly áleýetin iske asyrý boıynsha Qazaqstannyń róli jáne Elbasynyń «Nurly Jol» Joldaýynyń negizgi baǵyttary týraly sóz sóıledi.
R.Joshybaev aldaǵy ýaqytta Astana qalasynda ótetin halyqaralyq EKSPO-2017 kórmesiniń daıyndyq jumystary týraly habarlap, atalǵan shara Qazaqstan jáne búkil óńir úshin týrızmdi damytýdyń qozǵaýshy kúshi bolatynyn atap ótti.
«ITB-2015» barysynda qazaqstandyq delegasııanyń basshysy Búkilálemdik týrıstik uıymnyń Bas hatshysy Taleb Rıfaımen birge qazaqstandyq stendtiń ashylý rásimine qatysty. BUU BTU Bas hatshysy óz sózinde Qazaqstanǵa týrısterdiń kóptep kelýi aıasynda Astana qalasynda ótkiziletin EKSPO-2017 kórmesiniń mańyzdylyǵyn, qalanyń ınfraqurylymdyq damýyn jáne BTU tarapynan atalǵan másele boıynsha bizdiń elge qoldaý kórsetiletinin jetkizdi. Sondaı-aq, Rıfaı Qazaqstanǵa asa nazar aýdarylatyn BTU Jibek joly baǵdarlamasynyń júzege asyrylý mańyzdylyǵyn atap ótti. Jibek joly baǵdarlamasy BTU-nyń 31 múshe-memleketteriniń ózara yqpaldastyq tuǵyrnamasy bolyp sanalady.
Kórme qatysýshylary qazaqstandyq pavılonǵa asa qyzyǵýshylyq bildirýde. Olar qazaq ulttyq taǵamynan dám tatyp, dástúrli bılerdi tamashalap, ulttyq aspapta naqyshyna keltirilip oryndalǵan ádemi áýenderdi estip, sonymen qatar, qoldan jasalǵan kıiz kıimder men kúmis buıymdardy daıyndaý barysyn kórýge múmkindikter aldy. Sheteldik seriktestermen yntymaqtastyqty ári qaraı damytý maqsatynda qazaqstandyq delegasııa ekijaqty kelissózder júrgizdi, onyń ishinde GFR Ekonomıka jáne energetıka mınıstrligi týrızm dıreksııasynyń jetekshisi M. Vebermen, kórmeniń basshylyǵymen jáne sheteldik BAQ ókilderimen kezdesýler ótkizdi.
Qazaqstan álemdik týrızmniń bedeldi únqatysý alańy bolyp tanylatyn jáne eldiń baı tarıhy men mádenıetin, sondaı-aq, qaıtalanbas tabıǵatyn tanystyrýǵa múmkindik beretin ITB jumysyna jyl saıyn qatysady. Sonymen qatar, kórme týrıstik saladaǵy kóshbasshylarmen tájirıbe almasý men yntymaqtastyqtyń tıimdi tuǵyrnamasy bolyp sanalady.
«Egemen-aqparat».