Memlekettiń daǵdarysqa qarsy saıasaty týraly áńgime qozǵap, keshe Ortalyq kommýnıkasııalar qyzmetinde buqaralyq aqparat quraldary ókilderiniń aldyna Senat depýtattary, palatanyń Ekonomıkalyq saıasat, ınnovasııalyq damý jáne kásipkerlik komıtetiniń músheleri Marat Taǵymov pen Ashat Kúzekov shyqty.
Aldymen sóz alǵan M.Taǵymov Qazaqstan halqynyń órkendeýi, qaýipsizdigi jáne ál-aýqatynyń jaqsarýy árqashan da memlekettiń mańyzdy mindeti bolyp qala bererin erekshe atap ketti. Senator Elbasy Nursultan Nazarbaev óz Joldaýynda jahandaǵy álemdik syn-qaterler kezinde eldiń ınfraqurylymdyq damýynyń aýqymdy baǵdarlamasy – «Nurly Jol» Jańa Ekonomıkalyq Saıasatyn baıandaǵandyǵyn da qaperge saldy. «Búgin, mine, kórip otyrmyz: álemdik naryqtarda baǵa quldyraýda jáne, tutastaı alǵanda, ekonomıkalyq ósim baıaýlaýda. Álemdik ekonomıka qıyn kúnderdi bastan keshýde. Qalyptasqan ahýaldyń negizgi kórsetkishi – uzaq ýaqyt boıy munaı baǵasynyń quldyraýy bolyp tabylady (barreline 102-105 dollarlyq rekordtyq kórsetkishten barreline 30-40 dollarǵa deıingi daǵdarystyq mánge deıin tómendeýi)», dedi Marat Myrzaǵalıuly.
Depýtat álemniń iri ekonomıkalyq memleketteri (Reseı, Qytaı, Amerıka, Eýroodaq elderi) qarjy-ekonomıkalyq jaǵdaıdyń qolaısyzdyǵyna tap bolyp otyrǵandyǵyn, bul rette «Nurly Joldyń» basty mindetteriniń biri memleketti aýqymdy ınfraqurylymdyq damytý, sol arqyly ulttyq ekonomıkany jandandyrý jáne qosymsha jumys oryndary sııaqty strategııalyq mindetterdi sheship, halyqtyń ál-aýqatyn odan ári barynsha arttyrý ekendigine nazar aýdartty. Onyń aıtýynsha, Prezıdent 100-den astam sheteldik kompanııalardyń qatysýymen ınfraqurylymdyq damý josparyn Jańa Ekonomıkalyq Saıasattyń tiregi etip belgiledi.
Qazaqstanǵa Eýrazııa qurlyǵynyń barlyq tórt tarapyn kólik kúretamyrymen jalǵastyratyn tranzıttik torap róli boljanyp otyrǵandyǵymen bólisken M.Taǵymov baǵdarlamanyń negizgi bólikteriniń biri – kólik-logıstıka ınfraqurylymyn damytý ekendigin erekshe atady. Osy maqsattarǵa Ulttyq qordan 500 mlrd. teńge bólingen. Sonymen qatar, ındýstrııalyq, energetıkalyq, áleýmettik, turǵyn úı ınfraqurylymdarynda úlken jańǵyrtý kútip tur. Shaǵyn jáne orta bıznes úshin damýdyń qosymsha múmkindikteri berilýde. Joldaýda ishki naryqqa súıene otyryp, oılastyrylǵan ónerkásiptik ınvestısııalyq saıasat qalyptastyrylǵan. Qazirgi ekonomıkalyq jaǵdaılarda qosymsha qarjy resýrstarynsyz alǵa qoıylǵan maqsattarǵa qol jetkizý qıynǵa soǵady, sondyqtan da Ulttyq qorda jınaqtalǵan qarajattyń arqasynda memleket jańa ekonomıkalyq saıasatty sátti iske asyra alady, dedi senator sózin sabaqtaı túsip.
Depýtattyń aıtýynsha, qabyldanǵan respýblıkalyq bıýdjet shyǵystary qatań shekteýler jaǵdaıynda josparlanǵan. Elbasy Úkimetke halyq aldyndaǵy áleýmettik mindetterin oryndaýdy tapsyrsa, halyqtyń jumyspen qamtylýyn qamtamasyz etý, ınfraqurylymyn sapaly jańǵyrtý, shaǵyn jáne orta bıznesti damytýǵa qoldaý kórsetý bıýdjettiń negizgi basymdyqtary bolyp qalyp otyr. Qazaqstan jyldan jylǵa jalaqyny, áleýmettik tólemderdi ósirip qana qoımaı, jańa jumys oryndaryn qurýda. Jáne de 2015 jylǵy 1 qańtardan bastap zeınetaqy tólemderiniń mólsheri 9 paıyzǵa ulǵaıyp, zeınetaqynyń eń tómengi mólsheri 23 692 teńgeni qurady, al eń tómengi kúnkóris deńgeıi 19 966 teńgeden 21 364 teńgege deıin arttyryldy.
Ashat Kúzekov óz sózinde elimiz ekonomıkasy álem ekonomıkasynyń bólinbes bólshegi ekendigin alǵa tartty. Senatordyń paıymynsha, jahandyq daǵdarys jaǵdaıynda memlekettik organdar men el turǵyndaryna barynsha únemshil bolǵan oryndy. Bıýdjettiń ońtaılandyrylýy daǵdarysqa qarsy sharanyń negizgi jáne der kezinde qabyldanǵan elementi bolyp tabylady. Bul rette depýtat memlekettiń óz áleýmettik mindettemelerin oryndap kele jatqandyǵyn jáne oryndaı da bererin erekshe atady. Memleket basshysynyń «Nurly Jol» baǵdarlamasyn tolyqtyrý men keńeıtý baǵytyndaǵy tapsyrmalary Ulttyq qor qarjysymen kepildendirilgenin de aýyzǵa aldy.
Memlekettiń daǵdarysqa qarsy sharalary barysy sóz etilisimen, senatorlar buqaralyq aqparat quraldary jýrnalısteriniń birqatar suraqtaryna jaýap berdi.
Asqar TURAPBAIULY,
«Egemen Qazaqstan».