Ulttyq qundylyqtardy ulyqtaıyq

Jastar – táýelsiz elimizdiń bolashaǵy ǵana emes, búgini men erteńin jasaýshy da. О́ıtkeni, aǵa urpaqtyń elge úlgi bolar qaı isin de búgingi bilimdi, belsendi jas­tar ilip áketip, óz deńgeıinde atqaryp, óz zamandastarynyń kóshin ilgeri bas­taýda. Qazirgi ýaqytta «Nur Otan» partııasy janyndaǵy «Jas Otan» jastar qanatynyń negizgi maqsaty – jastardyń, sonyń ishinde, aýyl jastarynyń áleýmettik suranysyn qanaǵattandyrý, jastarǵa arnalyp jasalǵan memlekettik baǵdarlamalardy nasıhattaý, túsindirý. «Nur Otannyń» munyń aldyndaǵy  sezinde qabyldanǵan Doktrınada ulttyq qundylyqtarymyz ben tól mádenıetimizdiń, qazaqy otbasy men ǵasyrlardan úzilmeı kele jatqan dástúrimizdiń basym baǵyt berilýi barshanyń kóńilinen shyqty. Dýaly aýyzdy aǵalarymyz bul baǵytta kóńilge qonymdy oı aıtty. Elimizde ár azamattyń, ásirese, jastardyń óz dárejesinde bilim alýyna múmkindik jasalyp otyr. Elbasy partııa sezinde jastarǵa arnaıy kóńil bólip, olardyń erinbeı, jalyqpaı eńbek etýin, joǵary bilim alyp, el ıgiligine qyzmet etýi tıis ekendigin basa aıtty. Jastar Elbasynyń bul senimin aqtaıtyny daýsyz. Biz – san ǵasyrlardan beri ańsaǵan táýelsizdigimizdi bekem qylýǵa talpynyp, sol jolda kóptegen aýqymdy isterdi atqaryp kele jatqan aıbyndy eldiń urpaǵymyz. Bizdiń maqsatymyz –Táýelsiz Qazaqstannyń egemendigin saqtaý, elimizdegi ishki birlikti nyǵaıtyp, ulttar tatýlyǵyna selkeý túsirmeý. Jahandaný zamanynda óz eliniń tarıhyn, mádenıeti men dástúrin, ana tilin jetik meńgerip, onyń qasıetin túsine bilgen halyq qana máńgi jasaı alady jáne órkendeýdiń dańǵyl jolynan adaspaıdy. Bizdiń basty qun­dylyǵymyz – tól tarıhymyz, má­denıetimiz, tilimiz, dástúrli dinimiz. Bul qundylyqtar partııanyń Doktrı­nasynda aıqyn kórinis taýyp, anyq jazylǵan. Ultymyzdyń urpaqtar sabaqtastyǵy men úlkenderge qurmet, kishige izet kórsetý tárbıesi otbasynda qalyptasady. Sondyqtan otbasylyq tárbıe qazirgi ýaqytta basty nazarda turýy tıis. Biraq, qazirgi qazaq otbasyndaǵy áke men ananyń mindeti, ulttyq tárıbeniń mańyzy men nasıhattalýy óte tómen deńgeıde ekeni jasyryn emes. Kúndelikti keshki asty birge ishe otyryp, otbasylyq jaǵdaılardy talqylaý, ata-analar tarapynan balalarynyń jaǵdaıyn surap otyrý sekildi ádetke aınalýy tıis jaıttar kóp otbasylarda joǵalyp ketken. Sondyqtan da bolar, kóptegen ata-ana balalarynyń qaıda, ne istep, nemen aınalysyp júrgenin bilmeıdi. Bul jastar arasyndaǵy júgensiz áreketterdiń týyndaýyna sebep bolýy yqtımal jaıt. Osy máselelerdi negizge al­ǵan Doktrınadaǵy otbasylyq qun­dy­lyqtardy nasıhattaý negizindegi basym baǵyttar qazaq jastarynyń tálim-tárbıesine arqaý bolaryna senemin. Doktrınanyń basty qundylyǵyna tól mádenıet pen ulttyq rýh, halyqtyń baqýatty ómir súrýi úshin jaqsy jaǵdaı jasaý máseleleriniń bas­ty orynǵa qoıylýy da sol sebepten. Qazaq – erkindikti súıgen, erkindiktiń qadirin bilgen uly halyq. Sonaý Tonykók pen Kúlteginnen bastalǵan erlik rýhtyń óshpegeni haq. Biz áride aıbyndy Abylaı, beride er Isataı men ór Mahambet ańsaǵan erkindiktiń máńgilik jasaýyna qyzmet etýdi maqsat tutyp, ultymyzdyń uly murattary men asqaq armandaryn, ulttyq qundy­lyqtarymyzdy qasterleý, keleshek urpaqqa tolyǵymen amanattaýdy iske asyrýymyz kerektigin bilemiz. Sol sebepten, osynaý asyl muratty Qazaqstan jastary, ásirese, qazaqtyń ár balasy tolyq sezinedi dep oılaımyn. Asqar BOPYLDYQOV, «Jas Otan» jastar qanaty Atyraý oblystyq fılıalynyń atqarýshy hatshysy, Atyraý qalalyq máslıhatynyń depýtaty.