Keshe Ortalyq saılaý komıssııasynda Qazaqstan Respýblıkasynyń prezıdenttigine kandıdattardyń Memlekettik tildi erkin meńgergendigin anyqtaý jónindegi lıngvıstıkalyq komıssııaǵa synaq tapsyrýy ári qaraı jalǵasty.
Alǵashqy bolyp synaq tapsyrýshy Erjan Serǵazınniń nátıjesin Komıssııa tóraǵasy Myrzataı Joldasbekov habardar etti. «Erjan Merekeuly Serǵazın myrzanyń búgin qazaq tilinen tapsyrǵan synaǵynyń nátıjesi mynadaı boldy. Jazba jumysynyń taqyryby «Konstıtýsııa – turaqty damý kepili». Ol eki bet jumys jazypty. Jumystyń bas jaǵynda ájeptáýir jaqsy tarıhı derekter bar. Biraq, qazirgi bizdiń Konstıtýsııamyzdyń turaqty damý kepildigi jaıy ashylmaı qalǵan. Onyń ústine jumysynda 24 qate ketken. Emlesi – 6, tynys belgisi – 13, stıldik qate – 5. Jalpy, Komıssııanyń talabyn prezıdenttikten úmitkerler saýatty jazýy kerek, saýatty sóıleýi tıis», – dedi ol.
Kandıdat ekinshi kezeńde Abaıdyń poezııasy men qara sózderinen 3 bettik mátin oqyǵan. «Shynyn aıtý kerek, Erjan ejiktep oqydy. Keıbir mátinniń maǵynasyn tolyq túsinbedi. Sol mátin ishinde kezdesetin qazaqtyń baıyrǵy sózderin, máselen, qareket, kókirek tazalaý syndy sózderdi túsindirip aıta almady», – dedi M.Joldasbekov. Komıssııa tóraǵasynyń aıtýynsha, úshinshi kezeńde «Qazaq óneriniń bel-belesteri» degen taqyrypta 15 mınýt sóılegen E.Serǵazınniń oıy shashyrańqy shyqqan. «Jalpy, sóılem quraýy ózge bir sheteldik azamattyń qazaq tilin jańa úırenip júrgenindeı estildi. Logıka, júıe joq. Osynyń bárin eskere kelip, Komıssııa Erjan Merekeuly qazaq tilin erkin meńgermegen degen qorytyndy shyǵaryp otyr», – dedi ol.
Al Qazaqstannyń Kommýnıstik halyq partııasynan prezıdenttikke kandıdat Turǵyn Syzdyqov memlekettik tildi jetik meńgergenin dáleldedi. «Birinshi synaqta «Bizdiń kúshimiz birlikte» degen taqyryptaǵy jazbasha jumys boldy. Taqyryp ashylǵan, 6 qate jiberipti. Onyń ishinde 3-eýi emle, 2-eýi tynys belgisi, 1-eýi stıldik qate. Aıtaıyn degenim, L.Qoıshıevadan keıin saýatty, taqyryby ashylǵan jumys osy Syzdyqov myrzanyń jumysy boldy», – dedi M.Joldasbekov.
Komıssııa tóraǵasynyń atap ótkenindeı, ekinshi kezeńde kandıdat Baýyrjan Momyshulynyń prozasynan úsh bettik mátin oqyǵan. «Jaqsy oqydy. Biz oqyǵan mátindi túsindi me, túsinbedi me degen oımen barlyq kandıdattarǵa suraq qoıyp júrmiz. Al Syzdyqov myrza ózi oqyǵan mátindi óte jaqsy aıtyp berdi», – dedi Komıssııa tóraǵasy. Kandıdat úshinshi kezeńde «Astana – táýelsizdik tuǵyry» taqyrybynda 15 mınýt sóz sóılegen. «Sátti taqyryp kelgen sııaqty. Jaqsy jaýap berdi. Komıssııa Turǵyn Ysqaquly Syzdyqovty memlekettik tildi erkin meńgergen degen qorytyndyǵa keldi», – dedi M.Joldasbekov.
Ortalyq saılaý komıssııasynyń múshesi Marat Sársembaev memlekettik tildi erkin meńgergendigin anyqtaý synaǵyna kelmegen úmitker Qaırat Maıshevqa taǵy bir múmkindik beriletinin málim etti. «Kandıdattarymyzdyń biri memlekettik tildi erkin meńgergendigin anyqtaý synyna kelmeı qaldy. Biz qazirgi ýaqytta bul azamattyń ne úshin kelmeı qalǵandyǵyn anyqtaý ústindemiz. Eger synaqqa kelmeýi shynaıy sebepterdiń saldarynan bolsa, onda atalǵan azamatty memlekettik tildi qanshalyqty deńgeıde meńgergendigin anyqtaý úshin Lıngvıstıkalyq komıssııa synaǵyna jiberý týraly sheshim qabyldaıtyn bolamyz. Sodan keıin onyń prezıdenttikten úmitker retinde tirkelýine nemese tirkeýden bas tartylýyna qatysty naqty sheshim qabyldanady», – dedi osy jóninde M.Sársembaev.
Álısultan QULANBAI,
«Egemen Qazaqstan».