«Oralý» atty kórkem fılm oqıǵasy jelisinen aıqyn kórinis tapqan
Perzenttik paryz
Atamekendi sheksiz súıýdiń qadir-qasıetin, tálim-tárbıesin shynaıy uqtyratyn «Oralý» kórkem fılminiń premerasyn ózge kórermender sekildi bir demmen kórip shyqqannan keıin kópke deıin úlken áserden aryla almadym. Jol boıy Abaı hakimniń «Mahabbatsyz dúnıe bos...» degen paıymy oıyma oraldy. Aýylda týyp-óskendikten áli kúnge deıin búıregimiz buryp, perzenttik paryzymyz pen qaryzymyz ótelmegendeı kúı keshetinimiz ras. «Bolashaq» halyqaralyq baǵdarlamasynyń túlegi retinde Ulybrıtanııanyń Olster memlekettik ýnıversıtetinde oqyǵan kezderim eske tústi. Shetelde oqý, bilimimizdi álemdik standarttarǵa saı tolyqtyrý sekildi armanymyz oryndalyp, úlken qýanyshqa bólengenimizben, elge, dostarymyzǵa, týǵan-týystarymyzǵa tezirek jetkenshe asyqqan edik. «Týǵan jerdiń tútini de ystyq» demekshi, jyraqta júrgende Qazaqstan degen ataýǵa ıe tarıhı jerdiń eshteńege teń kelmes bıik ornyn, otandy súıý jan-júregińdi baýrap alatyn ishki túısik arqyly ǵana óriletinin anyq sezingen edik. Ata-baba topyraǵyna aıaǵymyz tıip, saf aýasyn keýde kere jutqandaǵy sátimizdi tilmen jetkizý qıyn. Sh.Aımanov atyndaǵy «Qazaqfılm» kınostýdııasy sátti shyǵara bilgen fılm elge, jerge degen tunyq sezimdi, máńgi ólmes súıispenshilikti bıolog-ǵalymnyń ómir joly arqyly shynaıy beıneleı bilgen. Shetelde oqyp, qalyp qoısa da keıin baıyrǵy jurtqa oralý arqyly otanǵa degen adal mahabbatyn eren eńbek, qaltqysyz qyzmet arqyly óteýi ılandyrady. Prezıdentimizdiń tikeleı qoldaýymen ómirge qanat qaqqan halyqaralyq «Bolashaq» baǵdarlamasynyń myńdaǵan túlekteri búginde elimizdiń ár qıyrynda, san-salada jemisti jumys istep júr. Men Qaraǵandy memlekettik ýnıversıtetin ekonomıst mamandyǵy boıynsha támamdaǵannan keıin eńbek jolymdy energetıka mınıstrliginde bastap, salyq komıtetinde jalǵastyrdym. Ulybrıtanııada oqyp kelgen soń jas maman retinde teriskeıge jiberildim. Prezıdent janyndaǵy Memlekettik basqarý akademııasyn bitirip shyqtym. Elbasymyz Qyzyljar óńirinde bolǵan jumys saparynyń birinde shetelde oqyǵan bir top jastarmen arnaıy kezdesip, halyqqa qaltqysyz qyzmet etý amanatyn júktegen bolatyn. Bile bilgenge, Otan aldyndaǵy perzenttik paryzdy óteýden artyq baqyt ta, mártebe de joq! Arman О́TEGENOV, Oblystyq básekelestikti qorǵaý jáne tabıǵı monopolııalardy retteý departamentiniń basshysy, halyqaralyq «Bolashaq» baǵdarlamasynyń túlegi. Soltústik Qazaqstan oblysy.Eldiń erteńine eńbek etýge úndeıdi
Men kenshilerdiń otbasynda óskendikten, oblys kóleminde ári-beri kóp kóship júrdik. D.Serikbaev atyndaǵy Shyǵys Qazaqstan memlekettik tehnıkalyq ýnıversıtetin 2013 jyly támamdadym. Mamandyǵym – metallýrg. Qazir qoǵamdyq jumystarǵa belsene aralasyp júrmin. Stýdent kezimde ózara tájirıbe almasý baǵytynda Germanııa men Avstrııa elderinde qysqa merzimdi kýrstardan óttim. Germanııa eliniń Drezden qalasyndaǵy tehnıkalyq ýnıversıtette jáne Avstrııanyń astanasy Venanyń agromádenı ýnıversıtetinde stýdenttik uıymdar arasyndaǵy qarym-qatynasty damytý maqsatynda uıymdastyrylǵan kýrstarda eki apta oqydym. Sondaı-aq, eki jyl buryn Birikken Ulttar Uıymynyń sammıtine delegat retinde qatysýǵa múmkindik alyp, tórt aı ýaqytymdy Nıý-Iork qalasynda ótkizdim. Bıyl «Bolashaq» baǵdarlamasyna qujat tapsyryp, baǵymdy synap kórmekpin. Qazir daıyndyq ústindemin. AQSh-tyń Massachýset tehnologııalyq ýnıversıtetine oqýǵa tapsyrýdy kózdep otyrmyn. Bul – ınjenerlik mamandyqtardy oqytý boıynsha álemdegi jetekshi oqý oryndarynyń biri sanalady. «Bolashaq» baǵdarlamasy boıynsha aǵaıyndarym men dos-jarandarym shetelderde oqyp keldi. Olardyń barlyǵy Astana men Almatyda, óńirlerde túrli deńgeıdegi memlekettik qyzmetterde, jetekshi kompanııalarda eńbek etedi. «Bolashaq» – adamnyń talanty men jolyn ashatyn biregeı baǵdarlama. Elbasy Nursultan Nazarbaev qazaqstandyq jastarǵa álemniń úzdik ýnıversıtetterinde bilim alýǵa jan-jaqty jaǵdaı jasady. Sondyqtan, bul baǵdarlama men onyń túlekteri elimizdiń qaryshtap damýyna qyzmet etýi tıis dep bilemin. «Bolashaqtyń» negizgi maqsaty – Qazaqstannyń ǵylymı-ınnovasııalyq áleýeti men deńgeıin kóterý. Kórermenge jol tartqan «Oralý» fılminiń negizgi túıini – osy. Aǵaıyndy eki jigittiń kózqarasy men tanymy arqyly túp qazyǵymyzdan adaspaý, qarashańyraq – Qazaqstanymyzǵa, Otanymyzǵa oralý ekenin dál beıneleı bilgen. Jańa tusaýyn kesken kınolenta osynysymen de áserli, tartymdy. Bul kartınany kórýge kelgen jastarymyzǵa úlken oı saldy, ómirlik ustanymdaryna qozǵaý boldy dep oılaımyn. Aıbek BAÝKENOV, Shyǵys Qazaqstan oblysy jastar ortalyǵy ádistemelik jumystar sektorynyń jetekshisi. О́SKEMEN.Sabaq alar sátti dúnıe
«Oralý» atty kórkemsýretti fılmdi arnaıy baryp kórdik. Bul fılm jastarǵa, ásirese shetelderde oqyp, bilim alyp júrgen balalarymyzǵa óte kóp oı salatyndyǵyn ańǵardym. Fılm jelisinde aýyldyń aqsaqaly jeke sharýa qojalyǵynda jylqy ósirip júrip shaǵyn ǵana zerthana ashqan. Ǵylymı negizdi qazaqy danalyqpen ushtastyryp jylqy etiniń, qymyzynyń adamǵa beretin paıdasynyń kóp ekendigin zerttegen. Adam densaýlyǵyn jaqsartýǵa, áleýetiniń artýyna tıgizetin dárýmenderiniń moldyǵyn dáleldeı bilgen. Biraq ómir óz degenin istep, jalǵyz uly men kelini kólik apatynan qaıtys bolǵan soń, olardan qalǵan jalǵyz nemeresin shetelge oqýǵa jiberedi. Sóıtip, qarııa kóregendikpen nemeresiniń ýaqyt talabyna saı bilim alýyna jol asha biledi. Nátıjesinde aǵylshyn jáne orys tilderin jetik meńgerip, óte saýatty bolyp ósken nemere ana tilinen shet qalady. Ǵylymnyń qyryn, qupııasyn jetik meńgerý qanynda bar azamat úlken jetistikke jetip, arada 20 jyl ótkende issaparmen Qazaqstanǵa kelgende eski tanys kisiden atasynyń qaıtys bolǵanyn, ol kisiden úlken sharýashylyq qalǵanyn estip, birden muragerlik jolmen sol qyrýar dúnıeni alýdy, satýdy oılaıdy. Qazaq jerinde atasynyń izi qalǵan ólkeni, atasynyń qolymen jasalǵan óte qundy zerthanalyq buıymdardy kórip, elge, jerge, Otanǵa degen patrıottyq sezimi ashylady. Atasy qorǵap ketken ǵylymı jumysty sheteldik áriptesteri satyp alýǵa qyzyǵýshylyq tanytady. Biraq bul qundylyq Qazaqstandiki osy jerde bolýy, saqtalýy, urpaq qajettiligine jaraýy kerek degen toqtammen baǵa jetpes qundylyqty qazaq jerinde qaldyrýǵa atsalysady. Átirgúl TEZEKBAEVA, Almaty oblystyq I.Jansúgirov atyndaǵy mádenıet saraıy ádistemelik bóliminiń meńgerýshisi.Shynaıy ómir kórinisi
Taǵy bir tamasha kınotýyndy kórermenge jol tartty deý oryndy mundaıda. Aqtóbe qalasyndaǵy «Lokomotıv» kınoteatrynda rejısser Rashıd Súleımenovtiń «Oralý» kórkem fılminiń premerasy boldy. Kınofılmniń tusaýkeser kórsetilimine halyq kóp jınaldy. Ásirese, jastar. Olardyń arasynda joǵary oqý oryndarynyń stýdentteri, kolledjder men lıseılerdiń oqýshylary basymyraq, árıne. Munyń ózi jaqsy kıno bolsa, kórermender kóp bolatynynyń dáleli bolsa kerek. Jalpy kıno unady. Shynaıy ómirdiń kórinisindeı áserge bóledi. Bul fılmdi Sháken Aımanov atyndaǵy «Qazaqfılm» AQ-tyń adamgershilikti, patrıotızmdi, adamdardyń ózara qarym-qatynasyn sýrettegen tolymdy týyndysy dep tanýǵa ábden bolady. Rólderde oınaǵan ártister de jasandylyqqa boı urmaı, ózderi somdaǵan beınelerin shynaıy jetkizgen. Sońǵy jyldaryn Eýropada ótkizgen Maqsattyń atasynan muraǵa qalǵan jylqy sharýashylyǵyn qaıta baǵalaýǵa qatysty elge oralyp, basynan ótkizgen oqıǵalardaǵy sátteri nanymdy shyqqan. Ol atasynyń ǵylymı zertteýler júrgizgen qujattaryn taýyp alyp, ony ózi ıemdenip ketpeı, atasynyń rýhyn syılaýy, ǵylymı jańalyqtyń ıesi Qazaqstan dep baǵamdaýy patrıottyq sezimge bóleıdi. Elin súıýdiń, halqyn qurmetteýdiń úlgisindeı týǵan jerine degen qımastyq sezimniń oıanýy fılmniń basty keıipkeri Maqsattyń kindik qany tamǵan topyraqqa oralatynyna sendiredi. Kınofılm oqıǵasynyń jelisi jatyq, qarapaıym kórermenge túsinikti. Sondyqtan da bolar, tartymdy. Ásirese, jastarǵa aıtar ulaǵaty mol. Ol týǵan jerge degen patrıottyq sezimniń qaıda júrseń sýymaıtyn qasıeti der edim. Fılmde, eń bastysy, Otanǵa, aǵaıynǵa degen súıispenshilik, mahabbat sezimi ózektes óriledi.Kınofılm Elbasy N.Nazarbaevtyń sara saıasatynyń arqasynda táýelsiz Qazaqstannyń qol jetken tabystarymen túıindeledi. Marat ǴABDRAHMANOV, Aqtóbe oblystyq óner mýzeıiniń dırektory. Aqtóbe oblysy.Taǵylymdy týyndy
Shyndyǵyn aıtqanda, fılm unady. Bizdiń aımaǵymyzda da basty keıipker Maqsat sııaqty «Bolashaq» baǵdarlamasy boıynsha shetelde oqyp, elge oralyp, jemisti eńbek etýshiler az emes. Solardaı bilim tereńdetýdi armandaýshylar da kóp. Fılmdi kórýshilerdiń edáýir bóligi oqýshylar men stýdentter bolýy sony baıqatty. О́kinishke qaraı, búgingi jastar ómirine arnalǵan mundaı týyndylar ázirge sırekteý. Sondyqtan, bul shyǵarmany zor yntamen tamashaladyq. Talaby janyp, ozyq bilimmen qarýlanǵan zamandasymyzdyń biraz jyldan keıin týǵan jerine oralýdaǵy oı-tanym silkinisteri, perzenttik, baýyrlyq paryzǵa adaldyǵy tartymdy oqıǵa jelisi arqyly nanymdy sýrettelýi jaǵymdy áser qaldyrdy. Onyń eline degen joǵary azamattyq sezimi boıymyzdy baýrady. Atasy mura etken ǵylymı izdenisti jetildirip, eleýli zertteýlik jańalyq retinde paıda tabýǵa satylmaı, tek Qazaqstannyń óz múddesine jaratýǵa taımaýy tárizdi kórinister sátti shyqqan eken. Otanǵa súıispenshiliktiń úlkeni, kishisi joq. Bári de osyndaı shynaıy patrıottyq parasattylyqtan týady. Avtorlarǵa osy úshin de úlken alǵys aıtamyn. Qazir jastarymyzdyń qaı salada da ózderin tanyta alýǵa múmkindikteri keń, oǵan qolaıly jaǵdaılar bar. Ol taza azamattyq jaýapkershilikpen jarasyp jatsa, tipti jaqsy-aq. Fılmnen osyndaı oı túıildi. Mundaı taǵylymdy týyndylardyń úlken ekrannan jıirek kórine túsýin tileımin. Ernat Kemalov, Qaraǵandy oblystyq jastar bastamashylyǵy ortalyǵynyń qyzmetkeri. QARAǴANDY.Kıeli meken qudireti
«Oralý» – ýaqytynda túsirilgen fılm. Táýelsizdiktiń alǵashqy jyldarynda kórsetilse Qazaqstandy sortańda qalǵan, tot kemirgen kemedeı kóretin, keýdesi aıaqaptaı, Eýropany maqsatyna jetkizer asqar taýyndaı kóretin jastar túsinbes edi. Búgingi Qazaqstan – Elbasy Nursultan Nazarbaevtyń syndarly saıasatynyń arqasynda aldyna bıik maqsattar qoıǵan, órkenıetti eldermen terezesi teń, tórt qubylasy túgel memleket. Shetelde alǵan bilimdi óz Otanyńda alyp, josparyńdy iske asyra alatyn úlken múmkindik te bar. Fılmdi kórip otyryp, áýelde óz Otanyn mensinbeı, Eýropany asqaq kórgen Maks-Maqsattyń is-áreketine namysymyz kelgenimen, sońynda oǵan degen qurmetimiz kúsheıdi. Atasynan qalǵan mura – fermasy, sáıgúlikterdi satyp, qaltasyn aqshaǵa toltyryp Eýropasyna ketýdi oılap kelgen jigit aýylǵa kelip, týǵan jerdiń tútinin ıiskep, tirshiligin jan-tánimen sezingennen keıin óziniń shetelde jat azamat ekenin túsinedi. Týǵan jerdiń ıisi bólek, mahabbaty erek. Jas muǵalıma Arýjanmen tanysqan Maqsat aýyldyń kúıbeń tirshiligi óziniń janyna jaqyn ekendigin, osy jerdiń bir perzenti ekendigin uǵynady. Otanyńdy eshqandaı memleket almastyra almaıdy. Ol – júregińniń túkpirinde saqtaıtyn asylyń, eń ardaqtyń. Elbasynyń jas urpaqty eljandylyqqa, óz Otanynyń adal azamaty bolýǵa úndegeni fılm jelisinen kórinedi. Maqsat – Sanjar Mádıev, Arýjan Jazybaeva, ssenarıı avtory Rashıd Súleımenov jastarǵa osyndaı oıdy tamasha jetkize bilgen. Rahmet! Baýyrjan MOLDABEKOV, «Jas Otan» jastar qanaty Ońtústik Qazaqstan oblystyq fılıalynyń Atqarýshy hatshysy. ShYMKENT.Úlken ásermen tamashaladyq
Sońǵy jyldary «búgingi zamannyń shyndyǵy nege kórsetilmeıdi?» degen másele jıi aıtylatyn edi. Búgin rejısser Rashıd Súleımenovtiń «Oralý» atty týyndysyn kórip, odan biz ómir súrip jatqan ýaqyttyń bet-beınesin anyq baıqadym. Túp-tamyrynan úzilip, jahandaný úrdisine jutylyp ketip jatqandar az emes. Fılmdegi Maqsat ta sondaı. Oǵan tikeleı «qazaqsyń ba?» dep suraq qoıylady. Sonda ol marǵaý ǵana «solaı deýge de bolady» deıdi. Ultyn, jurtyn umytqany sonsha, qazaqsha Maqsat degen atyn aıtqandy jaratpaıdy. Atasynyń qazasyn estigende de qaıǵyrmaıdy. Tek artynda qalǵan dúnıege ıelik qylyp, ony satyp, paıda tabýdy ǵana oılap týǵan aýylyna barady. Al Maqsattyń baýyry Meırambektiń beınesi tipti basqa. Ol qazaqylyǵyn joǵaltpaǵan, adamgershilik qasıetterdi bárinen de joǵary qoıatyn azamat. Maqsat sekildi úlken ǵalym bolmasa da, ótken men bolashaqtyń aldyndaǵy mindetin aıqyn sezinedi. Fılmdegi Ińkárdiń beınesi júrekke jylylyq uıalatady. Joǵary oqý ornyn qyzyl dıplommen bitirip, bir úıdiń jalǵyz qyzy bolsa da Astanada qalmaı, aýylǵa eńbek etýge kelgen. «Dıplommen – aýylǵa!» baǵdarlamasynyń qatysýshysy. Aýyl balalarynyń jaqsy bilim alyp, myqty azamat bolyp qalyptasýy úshin óziniń jaıly ómirin qıyp otyr. Kıno týra búgingi zamandy kórsetedi. Siz ben bizdiń janymyzda júrgen adamdardyń beınesi shyǵarmaǵa aınalǵan. Árbir keıipkeri tanys. Ár sáti etene jaqyn. Atasy ashqan, ózi shyrqaý shegine jetkizgen ǵylymı jańalyqty Qazaqstannyń menshigi dep, ushaq ishinde «men óz Otanymda qalǵym keledi» dep kúrsinýi Maqsattyń óz jolyn, óziniń túpki maqsatyn tapqanyn aıqyndaıdy. «О́zge elde sultan bolǵansha, óz elińde ultan bol» degen halyq danalyǵyn naqty túsinedi. Solaısha, óziniń eli, jeri, memleketi úshin, onyń jarqyn bolashaǵy úshin jumys isteýge bekinedi. О́z basym fılmdi úlken ásermen tamashalap shyqtym. Jasulan ALDABERGENOV, «Jastardy qoldaý ortalyǵynyń» basshysy. QYZYLORDA.Otandy súıý eshteńemen ólshenbeıdi
Elimizdiń otandyq kınoındýstrııasy jańa týyndylarmen tolyǵyp keledi. Sonyń biri «Oralý» týyndysy. Mundaǵy basty keıipker Maqsatty atasy bilim alýǵa ınternatqa jiberedi. Bilimge qushtar kóńil Maqsatty shetelge jeteleıdi. Ol shet memlekette bilimin jetildirýmen ǵana shektelmeı, ǵylymı jumystarmen de aınalysady. Maqsat ǵylym jolyna túsý qıyn ekenin de biledi. Týǵan jerinen jyraqta bolashaǵy zor mıkrobıolog-ǵalym retinde tanymal bolsa da, júrek túkpirinde Otanyna, kindik qany tamǵan atamekenine degen saǵynyshy bir tolastamaıdy. Bir túp jýsanynyń ıisi ańqyǵan týǵan jerine degen saǵynyshy úlken mahabbatqa ulasady.
Týǵan aýylyna kelip, atasynyń ǵylymı jobasyn jalǵastyrady. Ol qatardaǵy ǵylymı joba emes eken. Álemde emi tabylmaǵan aýrýdyń birin emdeýge jol ashatyn biregeı ǵylymı jańalyq bolyp shyǵady. Ony sheteldik áriptesteri shetelde patentteýge úgitteıdi. Alaıda, qazaqstandyq ǵylymnyń mártebesin kóterýdi maqsat etken Maqsat ǵylymı jańalyqty shetelde patentteýden bas tartady. Tipti, sheteldik áriptesteri bir mıllıon eýro kólemindegi qarjy usynady. Árıne, bul az qarjy emes. Biraq, qazaqstandyq mıkrobıolog-ǵalym Otanǵa, týǵan jerge degen mahabbatymen materıaldyq qundylyqtan bıik turatynyn dáleldedi. Osy kınotýyndyny kórip otyryp, ózimniń de shetelde bilim alǵan kezim oıyma oraldy. Men de ózge zamandastarym sekildi Qazaqstan jastarynyń mańdaıyna jazylǵan erekshe baq – «Bolashaq» halyqaralyq baǵdarlamasymen shetelde bilim alý múmkindigine ıe boldym. Sóıtip, 2008 jyly áıgili tumandy Albıon astanasy – Londondaǵy ekonomıka mektebinde magıstrlik baǵdarlamamen bitirip shyqtym. Týǵan elińnen, jerińnen alysta júrgende Otanǵa degen saǵynysh júrekti kerneıdi. Eldegi ata-ananyń, qurby-dostardyń, tipti, týǵan jerdiń bir túıir tasy men jýsanynyń da, aýasy men sýynyń da qadiri arta túsedi. Eń bastysy, sheteldegi zamandastaryńnyń aldynda qazaq halqynyń ulandary da bilimge qushtar, jańany bilýge qumar, órkenıettiń ıgilikterin eliniń ıgiligine jumsaýǵa umtylatynyn tanytqyń kelip turady. О́ıtkeni, týǵan eldiń, Otannyń abyroıyn asqaqtatýdy bárinen bıik bolǵanyn qaladyq. Londondaǵy oqýymdy sátti aıaqtaǵan tusta birden elge oralýdy uıǵardym. Sebebi, ózimniń shetelde alǵan bilimimdi táýelsiz Qazaqstanymnyń qarqyndy órkendep, álemdegi eń ozyq 30 eliniń qatarynan laıyqty ornyn alýyna úlesimdi qosqym keldi. Qazir sol oıymdy iske asyra bastaǵanyma qýanamyn. Al kıno avtorlaryna myna týyndysy úshin úlken rahmet. Nurjan ǴANIMURATULY, Atyraý oblysy kásipkerler palatasy dırektorynyń orynbasary. Atyraý oblysy.«Bolashaqtan» ushtyq, «Bolashaqpen» qaıta oraldyq
Bizdiń «Qazaqfılmniń» «Oralý» atty jańa týyndysyn kórgen árbir jas tolqıdy, oılanady dep oılaımyn. Basty keıipker Maqsattyń týǵan aýylyna kelip, eldiń, jerdiń qymbat ekenin uǵyndy. Budan artyq qudiret joq ekenin túsindi. Men Sharbaqty aýdany Kólbulaq aýylynda dúnıege keldim. Bilim qýyp aýyldan kettik. Biraq, eshqashan da oıyma kelmepti, týǵan eldi, aýyldy tastap ketý, elge kelmeý degen. Bul fılmdegi basty taqyryp elimizdiń damýyn aýyldan shyqqan, keıin Eýropada oqyp bilim alǵan, sol jaqta eńbek etip júrgen jas mıkrobıolog-ǵalymnyń jetistikteri arqyly kórsetýdi maqsat etipti. Ekinshisi, jas mamandardyń shetelderge ketpeýi, týǵan jerdiń damýyna úles qosý kerektigi aıtylady. Bul joǵary bilikti mamandarǵa da, «Bolashaq» baǵdarlamasymen shetelderge baryp bilim alǵan jastarǵa da qatysty. Fılm oqıǵasy-búkil qazaqstandyq jastarǵa, ásirese, qazaq jastaryna sabaq boldy dep oılaımyn. Men de 2013 jyly elimizdegi «Bolashaq» halyqaralyq baǵdarlamasy stıpendıaty atandym. Osylaı Máskeýdegi «Memlekettik qyzmet jáne halyq sharýashylyǵy» akademııasynda «Saıasattaný» mamandyǵy boıynsha oqydym. Úlken ǵylymı kitaphanalarda otyryp, oqyp-úırenýge múmkindik aldyq. Aýylda ósken bizderge el kórip, jer kórip, órkenıetti bilim alýǵa jol ashqan, árıne, Elbasyna rahmet. Ol kisi ylǵı da jastar oqyńdar, bilimdi bolyńdar deıdi ǵoı. Sondyqtan, fılm rejısseri Rashıd Súleımenovtiń aıtar oıy da sol – qaıda júrseń de týǵan Otanǵa oralyńdar, eldi, jerdi súıýge shaqyrady. Patrıottyq sezimdi oıatar osyndaı fılmder dál qazir bizdiń jastarǵa óte qajet. О́z elimizde júrip, óz elimizdi myqty elge aınaldyrýǵa úles qosqannan artyq baqyt joq. Men qazir oblys ortalyǵyndaǵy Innovasııalyq ýnıversıtette stýdentterge sabaq berip júrmin. Stýdentterge bilim qýyp alysqa ketseń de, elimizdi kórkeıtý úshin qaıta oralýyń paryz, mindet deımin. Aısulý JÁKIShOVA, Innovasııalyq Eýrazııa ýnıversıtetiniń oqytýshysy. PAVLODAR.О́zekti taqyrypty arqaý etken
«Oralý» fılmi der ýaqytysynda kórermenge usynylyp otyr. Ol ózekti taqyrypty arqaý etýimen qymbat der edim. Sebebi, qazir shetelderde bilim alyp, tez ózgerip shyǵa keletin zamandastarymyz az emes. Jaıly ómirge tez boıy úırengen qyzdar men jigitter oqýyn bitirgen soń, týǵan elge qaıtqysy kelmeıdi. Keleńsiz kórinisterdiń keıde oryn alǵany jasyryn emes. Meniń bir synyptas dosym Anglııadaǵy Lıverpýl qalasynda ınjener-baǵdarlamashy mamandyǵyn ıgergen bolatyn. Ýnıversıtetti bitirgen soń, sonda jumysqa qaldy. Eki jyldan soń, báribir Qazaqstanǵa qaıtyp keldi. «Bóten elde, týyssyz, dossyz ómir súrýdiń qıyndyǵyn sezindim, óz elime eshteńe jetpeıdi eken», dep moıyndaǵan bolatyn. Onyń týǵan ata-anasy, baýyrlary elge qaıtýyna kóp yqpal etti. Al «Bolashaq» baǵdarlamasymen oqyp jatqan taǵy bir tanysymyz jaqynda Vena qalasynda qalǵysy keletinin aıtty. «Onda ǵylymmen aınalysýǵa tolyq múmkindik bar» deıdi. Biz, dostary onyń bul sheshiminiń durys emestigin aıttyq. Onyń kózqarasy «Oralý» fılminiń bas keıipkeri Maqsatqa uqsaıtyn sekildi. Ol da túbi patrıottyq sezimi oıanyp, týǵan jerge týyn tigetin bolady dep oılaımyn. Adam qaıda júrse de óziniń túp-tamyryn úzbeýi tıis. «Bir joqty bir joq tabady» dep halqymyz beker aıtpaǵan eken. Atasynan qalǵan murany izdep kelgen Maqsat týǵan jerden onan da qadirli altynyn tapty. Atynyń Maqsat ekenine shamdanǵan, ana tilinen, dilinen qol úzip bara jatqan jigittiń júregindegi patrıottyq sezimniń oıanýy kórermenge keremet oı salady. Jastar fılm aıaqtalǵanda dúrligip turyp, qol shapalaqtady. Biz bas-aıaǵy jıyrma jyldaı ýaqyttyń ishinde osynsha damydyq, munan da ozyp damıtyn bolamyz. Al memlekettiń mıllıondaǵan qarjysyn tógip, shetelde oqyǵan jastarymyzdyń tamyry, túbiri myqty bolýy tıis. Baqyt tek týǵan jerde ekenin ár jas túsinse ıgi. Erlan TО́LETAEV, «Nur Otan» partııasynyń «Jas Otan» jastar qanaty oblystyq fılıalynyń atqarýshy hatshysy. QOSTANAI.