Ombyda ótken sheshýshi oıynda «Avangard» 3:1 esebimen jeńiske jetti
ASTANA. 11 naýryz. «Barys» hokkeı komandasy bıylǵy maýsymdy aıaqtady. Gagarın kýbogy úshin jarystyń alǵashqy aınalymynda Ombynyń «Avangardymen» aıqasyp, sheshýshi sátte qarsylasyna ese jiberdi. Jeti serııadan turǵan tartystyń jalpy esebinde «Avangard» 4:3 esebimen basym tústi. Bul týraly egemen.kz habarlady.
Sońǵy oıyn Ombyda ótti. Astanalyqtar tartystyń nebári 5-mınýtynda esep ashty. Dastın Boıdtan pas alǵan Naıdjel Doýs shaıbany birden qaqpaǵa baǵyttady. Degenmen, «Barys» hokkeıshileri bul basymdyqty bes mınýt qana ustap tura aldy. Oıynnyń 10-mınýtynda aıdyn ıeleri sapynan Chad Kolarık mergendigimen kózge túsip, esepti teńestirdi. Osy tusta aıta keter jaıt, Kolarık gol salmastan buryn «Barystyń» qorǵaýshysy Alekseı Lıtvınenkoǵa óte joıqyn kúshtik ádis qoldanǵan edi. Sonyń saldarynan astanalyq hokkeıshi aıdynnan kóterile almaı qaldy. Iаǵnı, «Avangard» esepti teńestirgen kezde bizdiń bir oıynshymyz aıdynda sulap jatty. Alaıda, bul jaıtqa tóreshiler nazar aýdarǵan joq.
Ekinshi kezeń asa tartysty ótti. «Barys» sapynan úsh birdeı hokkeıshi kishi aıyppen jazalansa, «Avangardtyń» qos oıynshysy eki mınýttyq «demalyspen» marapattaldy. Áıtse de, qarsylastar bul múmkindikterdi paıdalana almady. Ekinshi úziliske tórt mınýt qalǵan kezde Aleksandr Perejogın Iаn Lasonyń osal tusyn taýyp, komandasyn alǵa shyǵardy.
Sońǵy sheshýshi kezeńde «Avangard» kóbine qorǵanysqa kóńil bóldi. «Barystyń» bas jattyqtyrýshysy Andreı Nazarov oıyn órnegine ózgeris engizip, komandasyn shabýylǵa shaqyrǵanymen nátıje bolmady. Tipti oıynnyń bitýine 2 jarym mınýt qalǵan kezde Lasonyń ornyna altynshy oıynshyny shyǵardy. Alaıda, bul áreket kerisinshe aıdyn ıelerine qol boldy. О́z aımaqtarynan oıynǵa qosylǵan shaıbaǵa birden ıelik etken ombylyqtar aıdynnyń dál ortasynan úshinshi goldaryn soǵyp, «Barys» jankúıerleriniń úmitin birjola óshirdi. Bos qaqpany dál kózdegen taǵy da Chad Kolarık edi.
Osymen «Barys» 2014-2015 jylǵy maýsymdy aıaqtady. Endi otandyq hokkeıshiler sáýir aıynda ótetin birinshi dıvızıonnyń álem chempıonatyna daıyndalady. Aıta keteıik, atalǵan doda 13-24 sáýir aralyǵynda Polsha men Nıderlandyda ótedi. «A» tobynda oınaıtyn Qazaqstan Italııa, Japonııa, Ýkraına, Vengrııa jáne Polsha quramalarymen kúsh synasady.
Gagarın kýbogy úshin jarysty jalǵastyratyn «Avangard» «Shyǵys» konferensııasynyń jartylaı fınalynda Qazannyń «Aq Barsymen» oınaıdy. Al osy konferensııadaǵy kelesi jartylaı fınaldyq jupty Magnıtagorskiniń «Metallýrgy» men Novosıbırskiniń «Sıbır» komandalary qurady. «Batys» konferensııasynda Máskeýdiń «Dınamosy» Sankt-Peterbýrgtiń SKA-symen aıqasqa túsedi. Al SSKA (Máskeý) Fınlıandııanyń «Iokerıt» komandasymen konferensııanyń fınalyna beriler joldamany sarapqa salady. Alǵashqy oıyndar 12-13 naýryz kúnderi ótedi.
Elaman Qońyr.
Derek: egemen.kz.
Sýret: hawk.ru.