ASTANA. 11 naýryz. Aǵylshynnyń «Manchester Iýnaıted» komandasynyń oıynshysy Anhel dı Marııanyń basy bálege qaldy. Osydan eki kún buryn Anglııa kýbogynyń shırek fınalynda tóreshiniń artynan túıgishtegeni úshin ekinshi sary qaǵazyn alyp, alańnan qýylǵan. Sóıtsek, másele múldem basqada eken. Bul týraly egemen.kz habarlady.
Sol oıynda manchesterlikter Londonnyń «Arsenalymen» oınap, 1:2 esebimen ese jibergen edi. Bul jeńiliske tartystyń 76-mınýtynda dı Marııanyń alańnan qýylýy da óz septigin tıgizgeni sózsiz. Oıyn barysynda ózinen ózi jasyl alańǵa jalp etip qulap, tóreshiden aıyp dobyn surap jatyp aldy. Bárin baqylap turǵan bas qazy Maıkl Olıver fýtbolshynyń bul áreketin sımýlıasııa dep baǵalap, eskertý jasady. Sol-aq eken argentınalyq bul sheshimge qarsylyq bildirip, tóreshige tura umtyldy. Tipti oıynnyń basty qojaıyny sanalatyn adamdy jeıdesinen tartyp toqtatpaq boldy. Ol azdaı, ashýǵa erik bergen fýtbolshy sol sátte Olıver myrzanyń jer-jebirine jetip, aýzyna kelgenin aıtyp ta úlgergen eken. Arnaıy mamandar onyń qaı tilde, qandaı sózder aıtqanyn anyqtap berdi. Sóıtse, dı Marııa ıspan tilinde tóreshiniń anasyna til tıgizgen eken.
Osylaısha argentınalyq fýtbolshy bir mınýttyń ishinde eki sary qaǵaz alyp, oıyndy ózgelerden erte aıaqtady. Bir qyzyǵy, áp-sátte eki ret eskertý alyp, alańnan qýylý dı Marııa úshin tańsyq emes. Buǵan deıin Ispanııa chempıonatynda oınap júrgen kezinde osyndaı jaǵdaı tirkelgen. 2013 jyly «Deportıvo» men Madrıdtiń «Realy» arasyndaǵy oıynda dı Marııa eki ret tóreshiniń aıtqan sózine qulaq aspaı, tilin almaǵan. Ol kezdegi jaǵdaı bylaı bolǵan edi. Fýtbolshy «Deportıvonyń» aıyp soqqysyn oryndaýǵa kedergi keltirip, dopqa tym jaqyn turady. Tóreshi bir kelip eskertip ketedi. Onysyn shybyn shaqqan qurly kórmegen oıynshy odan ári jaqyndap, qazynyń yzasyn týdyrady. Mundaı erkelikti kóteretin tóreshi bar ma? Sózge kelmesten ekinshi sary qaǵazdy qaltasynan sýyrdy. Bas-aıaǵy 10 sekýndtyń ishinde qyzyl qaǵazdyń ıesi atanǵan dı Marııa amalsyz alańnyń jıegine betteı berdi. «Tegis jerde súrindi» dep osyndaıda aıtsa kerek. Tóreshini artynan túıgishtep, balaǵattap júrgen endigi qylyǵy mynaý.
Elaman Qońyr.
Derek: egemen.kz.
Sýret: eurosport.ru.