Qaı zamanda bolsyn adamzatty bolashaqtyń qalaı bolatyndyǵy qyzyqtyrǵan. Keıbir adamdar tipti osy sharýanyń sońyna túsip, búkil ómirlerin sony zertteýmen ótkizgen. Biraq bul máseleniń sońyna jetý múmkin emes edi! Bul týraly qasıetti Quranda bylaı jazylǵan: «Kókterdegi jáne jerdegi syr Allaǵa tán» (16-Nahyl súresi, 77-aıat) jáne de «Kómestiń kiltteri Onyń (Allanyń) janynda. Ony Ol, ózi ǵana biledi» (6-Ánǵap súresi, 59-aıat). Al adamdar arasynda bolashaqty boljaı bilý tek Alla Taǵala elshileri paıǵambarlar quzyrynda ǵana bolǵan, ony Qurannyń myna joldarynan kóremiz: «Kómesti bilýshi Alla, onyń syryn eshkimge ashpaıdy. Biraq unatqan elshisine bildiredi. О́ıtkeni, Alla elshisiniń aldy artyna kúzetshi qoıady» (72-Jyn súresi, 26, 27-aıattar).
Degenmen de, adamdar arasynda bolashaqty boljaýǵa umtylys jasap, sol arqyly óz attaryn tarıh betine jazyp ketkisi kelgender bolǵan. Solardyń biri XVI ǵasyrda ómir súrgen Nostradamýs degen dáriger. Ol 1503 jyly Fransııanyń ońtústigindegi Sen-Remı qalasynda evreı otbasynda týǵan, shyn aty-jóni Mıshel de Notr Dam. 1525 jyly Monpele ýnıversıtetiniń medısına fakýltetin bitirip, eńbek jolyn bastaıdy. Bul kezde Fransııanyń ońtústigin oba derti qatty sharpyǵan edi. Nostradamýs ózin dáriger retinde óte tamasha kórsete bilip, kóptegen adamdardy emdep jazady. 1529 jyly medısına doktory ataǵyn alady. Alǵashqy áıelinen bir ul men bir qyzy bolǵanmen, obadan olardy Nostradamýs aman alyp qala almaıdy. Biraz jyl shet elde júrip, 1544 jyly Fransııaǵa qaıta oralady. Ekinshi ret úılenedi. Obaǵa qarsy kúresin ol odan ary jalǵastyrady. Sonymen qatar kóripkeldik qasıetin kórsete bastaıdy. Onyń ataq-dańqy patsha qulaǵyna da shalynady. Ol patsha janyna shaqyrtylyp, sol jerde kóptegen tarıhı boljaýlar aıtypty-mys jáne onyń aıtqandary oryndalǵan eken degen áńgimelerdiń shet jaǵasyn qazir kóbimiz bilemiz. Alaıda, onyń kóripkel emes, jaı ǵana kóz boıaýshy bolǵanyn ekiniń biri bile bermeıtindeı.
Nostradamýs shynymen kóripkel bolǵan ba? Onyń bolashaqty boljaýshy emestigine kóz jetkizý úshin myna jaǵdaılardy bilsek te jetkilikti.
Sonymen, birinshiden, ol joǵaryda aıtqanymyzdaı bolashaqty boljaı biletin Qudaıdyń elshisi paıǵambar emes, jaı ǵana qarapaıym adam bolǵan.
Ekinshiden, qarapaıym da sengish qara halyqty ol kezde aldaý tipten ońaı edi. Qazirgi zamanda, bárimizdiń kózimiz ashyq degenniń ózinde balger-alaıaqtardyń aldaýyna senemiz. Oǵan qarapaıym bir mysal, jaqynda tanymal bloger Elvıra Erǵalına Elordadaǵy bazarda balgerge jolyǵyp, onyń qalaısha ótirikti sapyratynyn dáleldep bergen vıdeomaterıalyn jarııalady.
Úshinshiden, Nostradamýsty zerttegen ǵalymdar E.Rýssel, P.Ýıtmor men E.Berzınderdiń aıtýy boıynsha, ol boljaǵan 946 oqıǵanyń tek 70-i ǵana oryndalǵan. Bul degenińiz 7 paıyz ǵana degen sóz! Onyń aıtqan boljamy oryndalsa, onyń ataq-dańqyn asyra siltep madaqtaǵan da, al oryndalmasa ol jaǵdaı umytylyp ketip otyrǵan. Iаǵnı, kez kelgen adam balasy qolyna qalam alyp, birneshe myńdaǵan bolashaqqa boljaýlar jasasa, onyń keıbireýi árıne óte az mólsherde bolsa da oryndalyp iske asýy ábden yqtımal. Sol úshin de ol paqyrymyzdy kóripkel bilgish eken dep qabyldaýǵa bolmaıdy ǵoı. Bul da óte-móte eskeriletin jaǵdaı.
Tórtinshiden, ol boljaǵan kezeń 3 797 jylǵa deıingi aralyqty qamtıdy dep aıtylady da, al XXI ǵasyrdan bastalǵan boljaýlar týraly derekter joǵalyp ketken. Al endi nege joǵalǵandyǵyn ózińiz túsine berińiz.
Besinshiden, Nostradamýstyń boljaýlary jumbaqtap (keıbireýlerdiń aıtýy boıynsha latyn tilinde) jazylǵandyqtan, olardyń maǵynasyn ashý kezinde boljamdardy kez-kelgen baǵytqa burmalap kórsetýge bolatyndyǵyn eskerý kerek..
Altynshydan, zamandasy Charlz Ýardtyń jazýynsha Nostradamýs Poýzen qalasyndaǵy órtti boljap aıtyp, qalany óz qolymen órtegen. Bul adamgershilik turǵysynan alyp qaraǵanda óte qynjylarlyq jaǵdaı jáne ony tipti qylmysqa teńeýge de bolady.
Jetinshiden, Nostradamýs mamandyǵy dáriger bolǵandyqtan, mańaıyndaǵy biraz adamdardyń qashan óletinin dárigerlik tájirıbesine súıene otyryp-aq, mólshermen boljaı bilgen. Bul másele sol zamandaǵy Fransııa patshasy Genrıh II-niń otbasyna da qatysty. Ol patshanyń otbasy men týystaryn emdep, jazyp otyrǵan, ári olarǵa da tıisinshe boljamdaryn aıtqan.
Segizinshiden, onyń boljaýlarynyń astrologııaǵa negizdelýi. Al astrologııa zańdaryna sensek, belgili bir mezette birneshe mıllıondaǵan adamdardyń ómiri birdeı bolatynyna qalaı sene alasyz. Mysal keltirsek, juldyz-joramal boıynsha men Shaıan bolyp eseptelemin. Sonda dúnıe júzindegi mıllıondaǵan shaıandardyń bir kúndik nemese bir aptalyq taǵdyry birdeı bolǵany ma? Aqylǵa sıǵysyz deýge bolady.
Atalǵan jaılardy zerdelep qarap, oı tarazysyna salsańyz áńgime etip otyrǵan «kóripkelimizdiń» kim ekenin ózińiz-aq anyqtap alarsyz.
Ataqty degen Nostradamýstyń óziniń jaǵdaıy osyndaı bolǵannan keıin bárimiz kúndelikti kórip júrgen baqsy-balger, kóripkelderdiń aldap-arbaýyna qalaı senersiz. О́kinishke qaraı, ańqaý halyqtyń senimine kirýshiler ońaı aqsha taýyp, balgerlikti ózinshe bir úlken kásipke aınaldyrǵan.
Sol úshin de aǵaıyn, bir Allaǵa degen senimdi kúshti ustap, óz-ózimizge berik bolaıyq! Bolashaǵymyzdyń jarqyn da baıandy bolatynyna «kóripkeldersiz-aq» seneıik.
Serikqazy Kákibalanov.
Derek: Islam.ru.
Sýret: news.nur.kz.