Atyraý oblysynda resmı qujatty burmalap jazyp, ózi oǵan qol qoıyp, jalǵandyq jasaǵany úshin polısııa qyzmetkerine sot úkimi shyqty. Bul týraly Maqat aýdany prokýrorynyń orynbasary Dosbol Baǵytjanov bylaısha áńgimelep berdi:
– Polısııa qyzmetkeri Maqat aýdandyq ishki ister bóliminiń jol-patrýldik polısııa rotasynyń polıseıi qyzmettik jalǵandyq jasaý maqsatynda bir azamatpen Atyraý qalasyndaǵy Atyraý yqsham aýdanynda kezdesken. Ol ózimen kezdesken azamattyń 2014 jylǵy 5 qarashada Maqat aýdandyq sotynyń qaýlysymen 1 jyl merzimge júrgizýshilik quqyǵynan aıyrylǵanyn bile tura, ózimen birge alyp kelgen 06 №030583 sandy ákimshilik quqyq buzýshylyq týraly hattamaǵa Ákimshilik quqyq buzýshylyq týraly kodeksiniń 163-1-babyn buzǵany úshin degen jalǵan málimetter engizip, hattama toltyrǵan qyzmetkerdiń ornyna A.Armanuly jol-patrýldik polısııa rotasynyń qyzmetkeri degen jalǵan ishki ister organy qyzmetkeriniń aty-jónin kórsetip, resmı qujatty shyn máninde burmalap, ózi jalǵan qol qoıǵan. Sosyn jalǵandyq jasaǵany úshin álgi júrgizýshi azamattan 15000 teńge alǵan. Alaıda, artynsha onyń jalǵandyǵy áshkere bolǵan.
Osyǵan baılanysty ótken sot otyrysynda polısııa qyzmetkeri óziniń kinásin tolyq moıyndaǵan. Maqat aýdandyq sotynyń úkimimen ol Qylmystyq kodekstiń 314-babynyń 1-bóligimen kináli dep tanyldy. Sóıtip, oǵan 1 jyl 6 aı merzimge bas bostandyǵynan aıyrý jazasy taǵaıyndaldy. Sonymen qatar, júrgizýshi de jalǵan qujatty kórineý bile tura paıdalanǵany úshin aýdandyq sottyń úkimimen eki saǵatqa qoǵamdyq jumysqa tartyldy.
Joldasbek ShО́PEǴUL,
«Egemen Qazaqstan».
Atyraý oblysy.