Keshe Astanada «Birlik» saıası partııasynyń atqarýshy komıtetiniń keńeıtilgen otyrysy ótip, onda birliktikter Prezıdent Nursultan Nazarbaevtyń 26 sáýirde ótetin kezekten tys saılaýǵa qatysýǵa kelisimin bergenin qoldaıtynyn jetkizdi.
Partııa tóraǵasy Serik Sultanǵalı: «Keshe «Nur Otan» partııasynyń sezinde memlekettik eń joǵary laýazymǵa Nursultan Ábishuly Nazarbaevtyń kandıdatýrasy usynyldy. Bizdiń qoǵamymyzdyń eń basym bóligi saılaýǵa Nursultan Nazarbaevtyń qatysýyn qalaıdy. Bizdiń «Birlik» partııasy da osy ustanymda. О́ıtkeni, biz odan ári de osy tanymal tulǵanyń el tizginin óz qolynda ustaýyn qalaımyz», dedi. Sondaı-aq, ol Nazarbaevtyń zamanaýı Qazaqstandy qalyptastyrǵan adam ekenine toqtalyp, Memleket basshysynyń bastamasymen iske asyrylyp jatqan «Qazaqstan-2050», «Nurly Jol» jáne basqa da baǵdarlamalardyń el bolashaǵy úshin qanshalyqty mańyzdy ekenine ekpin túsirdi.
Sondaı-aq, ol sózinde Prezıdentimizdiń basshylyǵymen iri reformalar júzege asqanyn, qandaı aýyr kezeńderde Elbasynyń memleketti alyp tolqyndardan aýdarmaı alyp shyqqanyn, sonyń nátıjesinde tıimdi naryqtyq ekonomıka qalyptasyp, halyqtyń ál-aýqaty artqanyn atap kórsetti. «Memleketimizde tıimdi saıası júıe qalyptasyp, qoǵamdyq kelisim saltanat qurdy. Qazaqstannyń álem aldyndaǵy bedeli artyp, memleketimiz aldyna álemniń básekege qabiletti 30 eliniń qataryna kirý jóninde bıik maqsattar qoıyp otyr. Alysty boljaıtyn Prezıdent Ulttyq qor quryp, endi álemdi daǵdarys sharpýy eseńgiretken tusta, sol qarajatty el ıgiligine baǵyttap otyr», degen S.Sultanǵalı naqty qadamdardyń partııasy retinde, osyndaı el úshin mańyzdy kezeńde biz Elbasyna úlken senim artyp, ony tolyq qoldaımyz dep oı qorytty.
Partııanyń oblystyq, qalalyq fılıaldarynyń jetekshileri men ókilderi, 120-dan astam belsendi músheleri men buqaralyq aqparat quraldarynyń ókilderi qatysqan otyrysta sóz alǵan partııa múshesi Pavel Klımov: «Árbir qarapaıym qazaqstandyq úshin Elbasynyń memleket basshylyǵyn ári qaraı jalǵastyrýy óte mańyzdy, barlyǵymyzdyń erteńgi kúnge degen senimimiz de osy esimmen baılanysty. Bizdiń memleketimizdiń jeńisteri men jemisteriniń bas sáýletshisi – Nursultan Nazarbaev», dese, Tólegen Qýanyshbaev el taǵdyry sheshiletin jaýapty kezeńde nyq sheshimder qabyldaı alatyn tulǵanyń memleketti basqarýynyń mańyzyna toqtalyp, «Sondaı qadamdarǵa baratyn qaıratker dep Nursultan Nazarbaevty esepteımin. Olaı deıtin sebebim, Elbasy memleketimizdiń ordasyn Almatydan Astanaǵa kóshirý týraly qaýly qabyldap, elimiz irgesiniń bekýine, ekonomıkasynyń qarqyndy damýyna jáne bolashaǵynyń jarqyn bolýyna orasan zor áserin tıgizgenine barlyǵymyz kýámiz. Al sondaı kezde batyl qadamǵa baryp, bolashaqty aldyn ala boljap, onyń oń nátıje beretinine senimdi boldy, táýelsiz elimizdiń tarıhyna óz esimin altyn árippen jazdy», deı kelip, halyqaralyq arenadaǵy onyń bedeldi saıasatker ekendigin, beıbit bastamalary men bitimgerligin aıryqsha atap ótti.
Jıynda Elbasynyń kandıdatýrasyn qoldap Baǵdat Aldabergenov, Krıstına Bekmurzaeva sóz sóıledi.
Otyrys sońynda aldaǵy kezekten tys prezıdenttik saılaýǵa qatysý úshin qazirgi Memleket basshysynyń kandıdatýrasyn qoldaý týraly málimdeme biraýyzdan qabyldandy. Qazaqstan óziniń aldyna ekonomıkanyń jańa sapalyq ósýine qol jetkizý jáne álemniń eń básekege qabiletti 30 eliniń qataryna kirý jónindegi keýdeli maqsattar qoıyp otyr. Memleket basshysy bastama jasaǵan uzaq merzimdi «Qazaqstan-2050» Strategııasy, «Nurly Jol» baǵdarlamasy, sondaı-aq, basqa da strategııalyq baǵdarlamalar osy maqsatty iske asyrýǵa arnalǵan. «Sondyqtan «Birlik» partııasy – halyq birligi partııasy, óziniń saıası qaǵıdattary men qundylyqtaryna sáıkes, 2015 jyly 26 sáýirdegi Qazaqstan Respýblıkasy Prezıdentiniń saılaýyna qatysý úshin Nursultan Nazarbaevtyń kandıdatýrasyn berik qoldaıtynyn bildiredi», delingen málimdemede.
Anar TО́LEÝHANQYZY,
«Egemen Qazaqstan».