QYZYLORDA. 25 mamyr. Qyzylordada aýyr atletıkadan eki dúrkin Olımpıada, tórt dúrkin álem chempıony Ilıa Ilın atyndaǵy sport alańy ashyldy. Bul týraly oblys ákimdiginiń baspasóz qyzmetine silteme jasaǵan egemen.kz tilshisi habarlady.
Osydan birneshe jyl buryn bul sport alańyn ziltemirshi óz qarajaty esebinen salǵan edi. О́tken jyly bıznestiń áleýmettik jaýapkershiligi negizinde «Petro Qazaqstan Qumkól Resorsız» AQ-tyń demeýshiligimen 30 mıllıon teńge qarjy bólinip, sport alańy qaıta jańǵyrtýdan ótti.
Sport alańynyń aýmaǵy tolyq qorshalyp, 121 kúl-qoqys jáshigi, 64 dana oryndyq, 158 dana jaryq shamdary ornatyldy. Shaǵyn fýtbol, shahmat, balalar oıyn alańy men trenajer jáne strıtbol alańdary paıdalanýǵa berildi.
«Oblysta sportqa qyzyǵýshylyq tanytýshylardyń qatary kúnnen-kúnge artyp keledi. Bıyl Qyzylorda qalasynda boks ortalyǵy men ıppodrom, Naǵı Ilııasov aýylynda stadıon men sport kesheni, Qazaly, Jańaqorǵan aýdandarynda dene shynyqtyrý-saýyqtyrý keshenderi paıdalanýǵa beriletin bolady. Sondaı-aq, qala ortalyǵynda Ilıa Ilın atyndaǵy aýyr atletıkadan sport kesheni jáne 3 myń oryndyq jabyq fýtbol maneji boı kóteredi. Munyń barlyǵy buqaralyq sportty damytý úshin jasalyp jatqan jasampaz jumystar», – dedi oblys ákimi Qyrymbek Kósherbaev.
Aıta keteıik, shara Olımpıada chempıonynyń týǵan kúnine jerlesteriniń atynan úlken syı boldy. Ilıa Ilın sportshylarǵa qoldaýdyń artyp kele jatqanyna rızashylyǵyn bildirdi.
Saltanatty sharadan soń shaǵyn fýtboldan áýesqoılar arasynda jazǵy maýsym lıgasynyń oıyndary ótkizildi.
Erjan Baıtiles.
Derek, sýret: egemen.kz.