Keshe Memleket basshysy Nursultan Nazarbaev aýyl sharýashylyqty sanalatyn Aqmola oblysynyń Selınograd aýdanynda jumys saparymen bolyp, jergilikti jerdegi birqatar uıymdar men kásiporyndarda boldy. Osyndaǵy iri ári kópsalaly aýylsharýashylyq qurylymy sanalatyn “Aqmola-Fenıks” AQ-tyń jumysymen jaqyn tanysty.
Aldymen Memleket basshysy jalpy aýdany 19,6 myń gektardy quraıtyn dándi jáne burshaq daqyldary egistigin aralap kórdi. Sodan keıin Nursultan Ábishuly astyqty bastapqy satyda óńdeıtin mehanıkalandyrylǵan qyrmanda bolyp, munda jınalǵan “Aqmola-Fenıks” AQ-tyń jumysshylarymen kezdesý ótkizdi. Qyrman basyna jınalǵan dıqandar óz aýylsharýashylyq tehnıkalaryn da qaz qatar tizip, kópshilik nazaryna usynypty. Barlyǵynyń da arnaıy jumys kıimimen júrgeninen mundaǵy jumystyń oıdaǵydaı uıymdastyrylǵandyǵyn uǵýǵa bolady. Kezdesý barysynda N.Nazarbaev bıylǵy aýa raıynyń qolaısyzdyǵyna qaramastan negizgi astyqty óńirlerdiń eginshileri ortasha egin túsimine qol jetkizetinin aıtty. Ásirese egin túsimine Qostanaı, Soltústik Qazaqstan jáne Aqmola oblystarynda qol jetkiziletin bolsa, al Batys Qazaqstan men Aqtóbe oblystarynda aýa raıynyń aptapty bolýyna baılanysty egin bitik shyqpaýy múmkin. Byltyrǵy jylǵy egin túsiminiń qory áli de saqtaýly ekendigin tilge tıek etken Memleket basshysy elimizdiń eksporttyq áleýeti áli de mol ekenin aıtyp sharýalar kóńilin bir kóterip tastaǵandaı boldy.
– El nannan tapshylyq kórmeıdi, – dedi óz sózinde Prezıdent. Dıqandarmen áńgime kezinde egin alqaptaryn baryp kórgendigimen bólisken Nursultan Ábishuly olardyń jumysyna degen rızashylyǵyn da jetkizdi. Bıyl elimizdiń aýyl sharýashylyǵy salasyn qoldaýǵa qyrýar qarjy bólingeni memleket tarapynan qoldaýdyń bola beretinin aıǵaqtaıdy. Osy rette Memleket basshysy aýyl sharýashylyǵyna 96 mıllıard teńge bólingendigin erekshe atap óte kelip, bunyń úlken kómek ekendigin qadap aıtty. Qazaqstannyń astyq eksportyndaǵy óz áleýetin saqtap qalatynyn atap ótti. Bul – memlekettiń aǵymdaǵy jyly janar-jaǵarmaımen qamtamasyz etý, ónimdi taratý, tyńaıtqysh satyp alýǵa sýbsıdııa bólý turǵysynan aýylǵa úlken qoldaý kórsetip otyrǵanynyń nátıjesi.
Elbasy sondaı-aq osy Selınograd aýdanynda kópsalaly iri aýylsharýashylyq kásiporny bolyp tabylatyn “Aqmola-Fenıks” aksıonerlik qoǵamynyń jumysymen tanysty. Astananyń aınalasynda azyq-túlik qaýipsizdigi beldeýin qurý maqsatymen “QazAgro” UH” AQ qoldaýymen qus fabrıkasy tehnologııalyq jaǵynan qaıta jaraqtandyrylǵan bolatyn. Sonyń nátıjesinde qus basy 400 myńǵa, jumyrtqanyń jyldyq sany 50 mıllıon danaǵa jetkeni málim bolyp otyr. Budan basqa aýdanda qus mamyǵy zaýyty, et óńdeý men tigin sehtary, un tartý kesheni jumys isteýde.
Budan soń Prezıdent aýdan ortalyǵynyń Aqmol kentindegi jańa nysandarmen tanysty. Atap aıtqanda, “Qazaqtelekom” AQ-tyń aýdandyq telekommýnıkasııa torabyn, mádenıet úıin jáne Selınograd aýdandyq sotynyń jańa ǵımaratyn aralap kórdi. Aýdandyq sot janynan prokýratýranyń ǵımaraty da boı kóterip jatqany belgili boldy. Qurylys ústimizdegi jyldyń mamyr aıynda bastalsa, aldaǵy aıda paıdalanýǵa berilýi tıis. Qurylystyń quny 70,3 mıllıon teńgege baǵalanyp otyr.
Asqar TURAPBAIULY. Sýretterdi túsirgender S.BONDARENKO, B.OTARBAEV.