ASTANA. 14 qańtar. Astanada ıntellektýaldyq baılanys ortalyǵy ashyldy. Onyń jumys jospary jáne astanalyq smart-bastamalar týraly shahar basshysynyń orynbasary Nuráli Álıev baıandap berdi. Bul týraly Astana qalasy ákimdiginiń resmı saıty astana.gov.kz-ke silteme jasaǵan egemen.kz tilshisi habarlady.
Astana qalasynyń ıntellektýaldyq baılanys ortalyǵy elorda turǵyndarynyń ótinishterin neǵurlym tıimdi óńdeýge múmkindik beredi. Osylaısha jetildirilgen baılanys ortalyǵy birden 60 qońyraýǵa deıin qabyldaıdy.
Ákim orynbasarynyń aıtýynsha, operatordyń qatysýynsyz avtomatty túrde ózekti aqparat berý múmkindiginiń arqasynda 50 myńǵa jýyq ótinish óńdeldi, bul jalpy qońyraýlar sanynyń 62 paıyzyn quraıdy.
2015 jyldyń tek jeltoqsan aıynda baılanys ortalyǵynda 6 operator jumys istegen kezde 80 myńǵa jýyq ótinish óńdeldi, bul 2014 jyldyń sáıkes merzimimen salystyrǵanda, 2 esege kóp. Qazirgi kezde operatorlar sany 15-ke jetti, bul astanalyq «109» qyzmetiniń tıimdiligi men jedeldigin arttyrýǵa múmkindik beredi.
Buǵan qosa, Nuráli Álıev: «Baılanys ortalyǵynyń maqsaty ótinishterdi tek telefon qońyraýlary, smart.astana.kz portaly jáne elektrondy poshta arqyly óńdeý ǵana emes, endi Astana turǵyndary óz ótinishterin #astana109 heshtegin kórsete otyryp Facebook, Twitter jáne Instagram áleýmettik jelileri arqyly da bere alady. Sondaı-aq, Astana 109 paraqshasynda da astanalyq bilim mekemelerinde sabaqtyń bolý/bolmaýy týraly habarlamalar lezde jarııalanatynyn aıta ketý qajet. Mundaı tásil halyq tarapynan joǵary baǵa alýda. Sońǵy málimetter boıynsha, bar-joǵy eki táýliktiń ishinde Facebook jelisiniń 5800-den astam qoldanýshysy baılanys ortalyǵynyń resmı paraqshasyna kirgen. Anaǵurlym tanymal áleýmettik platforma Instagram bolyp tabylady. Ol jerde sanaýly ýaqytta Astana 109 akkaýntyna 4800-den astam jazylýshy tirkelgen», – dedi.
Budan bólek, jýyrda Astana ákimdigi «Astana Innovations» AQ birlese otyryp, aýa raıynyń jaǵdaılaryna baılanysty mektepterde sabaqtyń bolý/bolmaýy týraly habarlama alýdyń taǵy bir smart-tásilin usynady.
«Aldaǵy eki aptada astanalyq oqýshylardyń ata-analary Smart Astana mobıldik qosymshasynyń beta-nusqasyn birinshi bolyp paıdalanyp kóredi. Atalǵan qosymsha sabaqtyń bolmaýy týraly push-habarlamany lezde alý fýnksııasymen qolaıly bolyp otyr. Bul tek basy ǵana jáne «Smart Astananyń» áleýmettik-mańyzdy jobalary elorda turǵyndarynyń ómirin barynsha jeńildetetinine senimdimin», – dedi Nuráli Álıev.
Osylaısha, alǵashqy eki kúnniń ishinde 18 000-nan astam elordalyq ata-ana men muǵalimge Smart Astana qosymshasy taratylyp, ornatyldy.
Aıta keteıik, 2016 jylǵy 1 qańtardan bastap «051-qyzmet» MM negizindegi Astana qalasynyń ıntellektýaldyq baılanys ortalyǵy tájirıbelik paıdalanýǵa berildi. Bul barlyq kommýnaldyq-turmystyq sıpattaǵy máseleler boıynsha elorda turǵyndarynyń ótinishterin qabyldaýdyń biryńǵaı ortalyǵy bolyp tabylady.
Elaman Qońyr.
Derek, sýret: astana.gov.kz.