ASTANA. 14 qańtar. AQSh-ta eki adam djekpot somasy 1,5 mlrd. dollar bolatyn Powerball lotereıasyn utyp aldy. Bul týraly Interfax aqparat agenttigine silteme jasaǵan egemen.kz tilshisi habarlady.
Associated Press-tiń habarlaýynsha, júldeli bıletter AQSh-tyń Florıda jáne Tennessı shtattarynda satylǵan. Osylaısha amerıkalyq Powerball lotereıasynyń jeńimpazdar sany úsh adamǵa jetip otyr. Rekordtyq júlde qoryna ıe bolǵan jeńimpazdar 1,5 mlrd. kólemindegi djekpotty ózara bólisedi. Agenttiktiń mádimdeýinshe, taıaý ýaqytta jeńimpazdardyń qatary kóbeıýi múmkin. Júldeli bılet ıeleri týraly ázirge aqparattar jasyryn ustalýda. CNN telearnasy habarlaǵandaı, lotereıany uıymdastyrýshylar djekpotty utyp alǵan jeńimpazdarǵa ázirge qupııalyq saqtap, júldelerin alyp ketpes buryn qarjy keńesshisin jaldaýǵa keńes bergen.
Budan buryn qutty bıletterdiń biri Kalıfornııadaǵy Chıno-Hılls qalasynda satyp alynǵany týraly habarlanǵan edi. Utys bıletiniń sandary 4-8-19-27-34 jáne 10 bolǵan. Lotereıa ókilderiniń biriniń sózine qaraǵanda, bul sátti bılet 7-Eleven dúkeninde satylǵan eken. Ereje boıynsha, satýshy dúken bonýs retinde 1 mıllıon AQSh dollaryn alady.
Lotereıa talaptaryna sáıkes, júlde sandary Powerball dep atalatyn bes aq tústi jáne bir qyzyl tústi sharlarmen sáıkes kelgen adamǵa buıyrady. Powerball lotereıasy AQSh-tyń 44 shtatynda, Vashıngtonda (Kolýmbııa okrýgi), Amerıkanyń Vırgınııa araldarynda jáne Pýerto-Rıkoda oınatylady. Bılet quny 2 jáne 3 AQSh dollary arasynda ózgerip turady.
Jeńimpaz djekpotty 30 jyl boıyna bólip te ala alady, nemese bárin birden alyp ketýge quqyly. Alaıda, djekpottyń bárin birden alǵan jaǵdaıda júlde qory azaıady. Salyq tólegennen keıin baqytty jan ózimen birge 930 mıllıon AQSh dollaryn qolma-qol sanap alady. Sarapshylar mundaı júldege ıe bolý 292,2 mıllıonǵa shaqqanda 1 adamǵa ǵana buıyrýy múmkin dep baǵa berdi.
Esterińizge sala keteıik, Amerıka tarıhynda eń qomaqty júlde qory 656 mıllıon AQSh dollary bolǵan edi. Bul qarjyny 2012 jyly MegaMillions utys bıletiniń ıegeri jeńip aldy.
Elaman Qońyr.
Derek: Interfax.ru.
Sýret: reuters.