Atyraý oblysynyń Qurmanǵazy aýdanynda turatyn 32 jastaǵy Samal Shamhanova úshem týyp, 8 balanyń anasy atandy. Buǵan deıin eri Dıdarbekpen birge 4 qyz ben 1 ul tárbıelep otyrǵan Samal Shamhanova qursaǵyna úshem bitkende tóbesi kókke jeterdeı qýanypty. «Bir qozy artyq týsa, bir túp jýsan artyq shyǵady» deıtin qazaqy támsildi jetik biletin kópbalaly ana Samal da muny Allanyń erekshe syıy dep qabyldaǵan. Árıne, dárigerler de Samaldy erekshe baqylaýǵa alypty.
Jańa jyl qarsańynda, ıaǵnı, ótken jyldyń 26 jeltoqsanynda Samal Shamhanova úsh uldy bir mezette jaryq dúnıege ákeldi. Oǵan, árıne, oblystyq perzenthananyń dárigerleri ota jasaý arqyly kómegin berdi. Sóıtip, ata-anasy ózderin kól-kósir qýanyshqa keneltken úsh ulǵa Álemhan, Erhan, Tileýhan esimderin beripti. Úshemniń salmaq qosyp, jaǵdaıy jaqsarýyna bas-kóz bolyp júrgen dáriger-neonotolog Aıgúl Súndetovanyń aıtýynsha, 18 táýlik boıy úshem aıryqsha kútimge alynypty.
Osy aptada ómirge ińgálap kelgen úshemnen soń 8 balanyń anasy atanǵan Samal Shamhanova oblystyq perzenthana dárigerlerine alǵysyn jaýdyryp, Qurmanǵazy aýdanyndaǵy óz aýylyna attanyp ketti.
Joldasbek ShО́PEǴUL,
«Egemen Qazaqstan».
Atyraý oblysy.