Sandyqtaý aýdanyndaǵy Petrovka aýylynyń turǵyndary jańa jylda aıryqsha qýanyshqa ıe boldy. Jýyrda munda jańartylǵan mádenıet oshaǵy paıdalanýǵa berildi.
Aýyl qýanyshyna qutty bolsyn aıtqan aýdan ákimi Asylbek Ismaǵambetov bul klýbtyń jergilikti aýylsharýashylyq qurylymdarynyń qarjysy arqyly ashylyp otyrǵanyna rızashylyq bildirdi. Áleýmettik mańyzdy nysannyń boı kóterýine «Sandyqtaý-Astyq», «Balqyshyn» asyl tuqymdy mal zaýyty» jáne «Jabaı» jaýapkershiligi shekteýli seriktestikteri demeýshilik kómek kórsetti.
Jańa mádenıet oshaǵy 100 orynǵa laıyqtalǵanymen, saltanat sharasyna kórshi aýyldardyń ónerpazdary da qatysyp, arnaıy konserttik baǵdarlamalaryn usyndy. Aýdan ákimdigi tarapynan syı-saýǵalar jasaldy.
Osy oraıda, aýdanda sońǵy bir aıda memleket-jekemenshik áriptestigi bastamasymen aýyldarda feldsherlik-akýsherlik pýnkt, kitaphana, klýb jáne dúken kúrdeli jóndeýden ótkizilgenin atap ótken jón. Bul jumystarǵa 30 mıllıon teńge qarjy jumsaldy.
Baqbergen AMALBEK,
«Egemen Qazaqstan».
Aqmola oblysy,
Sandyqtaý aýdany.