ASTANA. 19 qańtar. Búgin Qurlyqtyq hokkeı lıgasy sheńberinde Astananyń «Barysy» óz aıdynynda Mınskiniń «Dınamosyn» qabyldap, 4:2 esebimen basym tústi. Bul týraly egemen.kz tilshisi habarlady.
Oıynnyń birinshi kezeńinde komandalar bir-birine laıyqty qarsylyq kórsetti. Alaıda, bul bólikte gol soǵylmady. Esesine, ekinshi kezeńde jankúıerler 4 goldyń kýási boldy. Kezeń bastala salysymen alǵa umtylǵan aıdyn ıeleri 21-mınýtta qorǵaýshy Kevın Dallmenniń kómegimen esep ashty. Arada 8 mınýt ótkende «Barys» sapynan Maksım Hýdıakov mergendigimen kózge tústi.
Qaqpalaryna eki shaıba jiberip alǵanyna qaramastan, qonaqtar shabýylda saýatty oınady. Nátıjesinde 32-mınýtta dınamolyq hokkeıshi Pol Shehýra esep aıyrmasyn qysqartty. Áıtse de, birneshe sekýndtan keıin «Barys» qaıtadan eki shaıba aıyrmasymen alǵa shyqty. Bul joly Dastın Boıd nátıjeli soqqynyń avtory atandy.
Sońǵy kezeńde astanalyqtar taǵy bir shaıba soqty. Atap aıtqanda, 44-mınýtta Brendon Bochenskı «Dınamonyń» qaqpasyn dál kózdegen bolatyn. Bul golǵa mınskilikter 49-mınýtta qarymta qaıtara bildi. Atalǵan gol Raıan Veskeniń enshisine jazyldy.
Matchtyń sońǵy mınýttary asa tartysty ótkenin atap ótken jón. Qos komandanyń da jattyqtyrýshylary taım-aýt alyp, shákirtterine nusqaý berdi. Alaıda, oıynnyń esebi tóreshiniń ysqyryǵy estilgenge deıin ózgergen joq.
Osylaısha, «Barys» maýsymdaǵy 26-jeńisine qol jetkizdi. Lıganyń turaqty chempıonatynyń aıaqtalýyna áli 8 týr bar. Búginde Andreı Nazarovtyń shákirtteri 78 upaımen Shyǵys konferensııasynda 7-orynda keledi. 6-orynda turǵan Qazannyń «Ak Barsynda» da osynsha upaı bar. Desek te, ol komandanyń bizden eki oıyny kem ekenin eskerýimiz kerek.
«Barys» kelesi kezdesýin 21 qańtarda Astanada Ombynyń «Avangardymen» ótkizedi.
Elaman Qońyr.
Derek: egemen.kz.
Sýret: hcbarys.kz.