ATYRAÝ. 26 qańtar. Atyraý qalalyq №2 soty «QazTransGaz Aımaq» aksıonerlik qoǵamynyń menedjerin urlap, óltiremiz dep qorqytqan jergilikti 2 turǵynǵa qatysty sot úkimin shyǵardy. Bul týraly oblystyq sottyń baspasóz qyzmetine silteme jasaǵan egemen.kz tilshisi habarlady.
«Is qujattarynan anyqtalǵandaı, Astana qalasynyń «QazTransGaz Aımaq» AQ-nyń 27 jastaǵy qyzmetkeri Atyraý qalasynda qyzmettik issaparda bolyp, 2015 jyldyń 22 shildesinde kúndizgi reıspen Astana qalasyna ushpaqshy bolady. Ony áriptesi «Toyota Camry» markaly avtokóligimen shyǵaryp salady. Atyraý halyqaralyq áýejaıynyń kólik turaǵynda olarǵa sottalýshylar jáne oǵan qatysty qylmystyq is bólek óndiriske bólingen belgisiz adam kelip jaqyndaıdy da, menedjerdi kúshtep kólikke otyrǵyzyp, alyp ketip qalady. Tas jolǵa shyqqasyn, urlaýshylar menedjerdi qaýipsizdik beldigimen baılap jáne kózin de matap qoıady. Sodan soń, belgisiz bir jerge toqtaǵan. Ony kólikten shyǵaryp, tizerlep otyrǵyzady. «Sen ómir súresiń, biraq seniń dosyń bul týraly polısııaǵa habar berse, biz seni óltiremiz. Tipti, Astana qalasynan da taýyp alamyz», – dep qorqytady. Sondaı-aq, odan kompanııanyń jergilikti fılıalyn tekserý qujattaryn tartyp alǵan. Menedjerdi kózi baılaýly kúıinde dalada qaldyryp, oqıǵa ornynan qashyp ketken», – dep habarlady Atyraý oblystyq sotynyń baspasóz hatshysy Boranbaı Ǵalıev.
Sotta eki sottalýshynyń da «QazTransGaz Aımaq» AQ-nyń Atyraý qalasyndaǵy fılıalynda qyzmet jasaıtyndyqtary anyqtaldy. Sot úkimimen olar Qylmystyq kodekstiń 125-babynyń 2-bóligi 1-tarmaǵy, 191-babynyń 2-bóligi 1 jáne 3-tarmaqtary boıynsha kináli dep tanylyp, ekeýine de 3 jyl 6 aı merzimge bas bostandyǵynan aıyrý jazasy taǵaıyndaldy. Jaza óteý orny retinde jalpy rejimdegi túzeý kolonııasy belgilendi.
Joldasbek Shópeǵul.
Derek: Atyraý oblystyq sotynyń baspasóz qyzmeti.
Sýret: vestipmr.info.