QOSTANAI. 26 qańtar. Qostanaıda oblystyq ishki ister departamentiniń jedel toptar qyzmetiniń 2015 jylǵy jumys qorytyndysy boıynsha keńeıtilgen jedel májilisi bolyp ótti. Onda Qostanaı oblysy boıynsha qylmystyq ahýal birshama turaqty bolǵanymen, onyń ashylý kórsetkishi tómen ekeni aıtyldy. Bul týraly ng.kz saıtyna silteme jasaǵan egemen.kz tilshisi habarlady.
Májiliste oblystyq ishki ister departamentiniń bastyǵy Tilegen Mátkenov oblysta jasóspirimder qylmysynyń azaımaı otyrǵanyn aıtty. Onyń sebebiniń birin departament bastyǵynyń orynbasary Meıirhan Torǵaev qylmys jasaǵan jasóspirimderdi ýaqytsha ustaıtyn arnaıy mekemeniń joqtyǵy jáne ata-analarǵa bergenmen nátıje bolmaı otyrǵanynan dep túsindirdi.
Májiliste oblys kóleminde jasalǵan qylmystyń ashylýy da nashar ekeni aıtyldy. Oblystyq ishki ister departamenti bastyǵynyń orynbasary Meıirhan Torǵaev: «О́zgeniń múlkin urlaý orta aýyr qylmystyń 88 paıyzyn quraıdy. Al onyń jyl boıyndaǵy ashylý kórsetkishi 25 paıyzdan aspady. Sonymen qatar ortasha aýyrlyqtaǵy qylmystardyń ashylýy 29 paıyz boldy», – dedi. Munyń sebebin suraǵan ishki ister mınıstrligi jedel josparlaý departamentiniń bastyǵy Qaırat Tynybekovke ol izdestirý, tergeý qyzmetkerleriniń tájirıbesiz jastar ekendigin alǵa tartty. Ol tergeý qyzmetkerleriniń 60 paıyzynyń jumys tájirıbesi áli 5 jylǵa jetpeıtindigin aıtty.
Oblysta ár 10 000 turǵynǵa 257 qylmystan keledi eken. Sondyqtan Tynybekov qyzmetkerlerdi úıretip, bar kúshti profılaktıkalyq jumystarǵa salý kerektigin aıtty. Degenmen ár tergeýshige 135 isten keledi. Norma boıynsha ol 41-den aspaýy tıis. Qylmystardyń ashylmaýyna qyzmetkerlerdiń tájirıbesiniń azdyǵy sebep pe, álde jumys júktemesiniń shekten tys kóptigi sebep pe? Sonymen qatar Qostanaıdaǵy qylmys jasaǵandardy ýaqytsha ustaıtyn mekemede jaǵdaı joq, sondyqtan is sotqa berilgenshe olardy Rýdnyıǵa aparýǵa týra keledi. Bul da polıseılerdiń jumysyn qıyndata, ýaqytty tyǵyzdata túsedi.
Názıra Járimbetova.
Derek, sýret: ng.kz.