Kıik degen janýar bar edi. Dobaldaı tumsyǵymen aýa tartyp, basyn jerge tuqyrtyp atqan oqtaı zaýlaǵanda shapqan atqa jetkizbeıtin. Sáken Seıfýllın ánge qosqan kıeli janýardyń bir ǵadeti, jol boıynan mashına kórse quıǵyta shaýyp aldyn kesip ótpeı toqtamaıtyn.
Quralaıdyń salqyny kezinde aýyl syrtyna syımaı azan-qazan bolyp mańyrap jatatyn. Mań dalada bosyp júretin sol mıllıondaǵan kıikterdi jurt «bul dúnıesin ózine qımaǵan sarań Qarynbaıdyń maly» deıtin.
Sol san mıllıondaǵan kıikterden aıyrylyp qaldyq. Saıyn dala bos. Ajalyn, búgingideı aıtyp júrgen, ýly shópten emes, negizinen qyryp taýyspasa kóziniń qany tarqamaıtyn eki aıaqty jyrtqyshtardan keldi. О́tken ǵasyrdyń toqsanynshy jyldaryndaǵy toqyraýda Qytaıǵa múıiz ótkizip paıda tapqandar jazyqsyz janýarlardyń tek tekesin tańdap atyp, etin alyp kete almaı dalany qan sasytqan.
Búginde mań dalanyń sáni kıik joq. Endi eki aıaqty jyrtqyshtar túnde jaıylymda júrgen malǵa tynyshtyq berýdi qoıdy. Kózke túrtse kórgisiz túnde ań qaraýǵa shyqqandaı myltyǵyn asynyp jaıylymǵa barady da, qońdylaýlaryn atyp, qyryp salady. О́z malyndaı muqııat soıyp, jiliktep et bazarlaryna satyp jiberedi. Talaıy ustaldy, sotty boldy. Aýyldarda medıator shaldar bar.
Keshirimge aldyndaǵy malyn mal urlatqanǵa sypyryp bergen, medıatorlarǵa da at mingizgen ury eki-úsh apta urty salbyrap júredi de, úırengen mashyǵyna qaıta basady.
Maqtaaralda turǵyndardyń jaıylymda dep alańsyz júrgen 18 bas iri qarasyn aıdap áketip, Shymkentke kelip mal bazarynda satyp jibergen ekeý ustaldy. Kúdiktiniń biri buryn sotty bolǵan eken. Temir tordyń ar jaǵy ashy sabaq bolmaǵanǵa uqsaıdy. Ekeýdiń budan bólek taǵy úsh urlyqqa qatystylyǵy anyqtalǵan.
Dalanyń erkesi kıik týraly beker áńgime qozǵamadyq. Olardy qyryp tastaǵandar endi jaıylymda júrgen tórt túlikti de Qarynbaıdyń ıesiz maly kóretin syńaıly. Atyp alady, aıdap ketedi. Ustalsa at-shapan aıybyn tóleıdi.
Qazir ustalǵan ekeýdiń ústinen QR QK-niń 188-babymen «Urlyq» boıynsha qylmysty is qozǵaldy. Qamaýǵa alyndy.
Baqtııar TAIJAN,
«Egemen Qazaqstan».
Ońtústik Qazaqstan oblysy.