Keńesten kómek kóp

Qostanaı qalasyndaǵy «Otaý-saýda» saýda orta­ly­ǵyna senbi, jeksenbi kún­deri qalalyqtar da, aýyldan bazarlaýǵa kelgender de soqpaı ketpeıdi. Kók­bazarǵa kelgender saýda or­talyǵynan keregin taba­dy. Munda kıim-keshek, tur­mystyq buıymdardan bas­tap, altynǵa deıin bar. Senbi kúni ámbebap dúkenge kelgender altynnan kem emes tegin keńes te alyp ketti. «Nur Otan» partııasy oblystyq fılıalynyń «Jas Otan» jas­tar qanaty ádettegideı keńes ortalyǵyn osy «Otaý-Saýda» saýda ortalyǵyna ákeldi. Dúkenniń jergilikti daýyskúsheıtkishinen ekinshi qabatta keńes ortalyǵynyń jumys istep jatqanyn habarlap jibergen edi, áp degenshe emhanalardan, oblystyq saılaý komıssııasynan, jumyspen qamtýdy úılestirý jáne áleýmettik baǵdarlamalar basqarmasynan, jumyspen qamtý ortalyǵynan kelip otyrǵan mamandardyń aldynda jurt kezekke turyp úlgerdi. Kezektiń aldynda turǵan jigit Denıs Borsýkov ótken jyly Avtomobıl joldary kolledjin bitirgen eken. Tehnık-me­hanık mamandyǵyn ıgergen. Alaıda, kó­ńiline qo­nymdy jumysty áli tappapty. Qazir jumyssyz júr. Ol jumyspen qamtý ortalyǵynan kelip otyrǵan mamandarǵa óziniń túıindemesin tastap ketti. Ázirge olarǵa Denıstiń ma­mandyǵyn izdep, suranys jasaǵan jumys berýshi bo­la qoımapty. Al Rathan Ah­metov bolsa Qostanaı mem­­lekettik pedagogıkalyq ıns­­tıtýtynyń sport já­ne deneshynyqtyrý fa­kýltetinde oqyp júr. О́zi­niń bolashaǵyn oılaǵan azamat keńes berý ortalyǵynan bola­shaq jumysynyń jaı-japsary týraly bilgisi ke­lipti. – Shynymdy aıtsam, múmkindiginshe jumysty qa­ladan tapqym keledi. Sonyń múmkindigi qalaı bolatynyn bilgim kelgen. Men oqý ornyn kelesi jyly bitiremin, sonan keıin qaladan jumys tappasam, «jastar praktıkasyna» jazylýyma bolady eken, – deıdi Rathan. – Men bıyl saılaý­da birinshi ret daýys bere­min. Maǵan oblystyq saılaý ýchaskesinen kelgen kisi qandaı qujatpen, qaı saı­laý ýchaskesine baratynymdy, aldyn ala saılaý­shylar tizimine engenimdi qaıdan bilýim qajet­tigin naqtylap túsindirip berdi, – dedi Qos­tanaı memlekettik pedagogıka ınstı­týtynyń birinshi kýrs stýdenti Rýslan Muhtarov. Keńes ortalyǵynda psı­hologtar men medısına qyz­metkerleri de jurt­shy­lyqtyń saýaldaryna naqty jaýap berip jatty. Olar­dyń qan qysymyn, qan quramyndaǵy qant mólsherin de sút pisirim ýaqytta anyqtap berdi. Ke­ńes berý ortalyǵyn «Nur Otan» partııasy oblys­tyq fılıalynyń jastar qanaty jıi uıymdastyrady. Ol 2013 jyly qurylǵan edi, osy ýaqytqa deıin 5447 adam medısına, zań, quqyq, qol­jetimdi turǵyn úı, bilim alý salasynan tıimdi keńester alypty. – Keńes berý ortalyǵy halyqtyń kómekke zárý sanatyna keńes berip, demep jiberedi. Onyń artyqshylyǵy da osynda. Olar keıde em­hanalarǵa, keıbir memle­ket­tik organdarǵa baryp, bú­gingideı sanaýly mınýttarda su­raqtaryna jaýap ala almaıdy, barlyǵyna ýaqyt kerek. Al biz jumysty kúnine eki saǵat osyndaı adamdar kóp júretin oryndarda uıymdastyramyz, – deıdi «Nur Otan» partııasy oblystyq fılıalynyń «Jas Otan» jastar qanatynyń tór­aǵasy Erlan Tóleýtaev. Keńes berý ortalyǵy «Jas Otan» jastar qanatynyń jo­basy bolǵandyqtan, ke­ńes surap kelgenderge qan­shalyqty kómek berilgeni par­tııanyń oblystyq fılıaly jastar qanatynda qadaǵalanyp otyrady. Názıra JÁRIMBETOVA, «Egemen Qazaqstan». Qostanaı.